¹ A shide mǝn Yesu mwaan gǝnaar mar par Ɓitnyak. Ɓelak dok tǝ jepgedǝr muup mǝn mǝ tǝlǝng sagar swa mǝ aar. ² Farisiyawa mǝ naa mǝn mǝ laa gǝ Yesu mǝ yen "Gǝ naa jepgǝdǝrgǝ muop fu chin bii wu gǝ mǝ tǝt par Ɓitnyak." ³ Mǝn Yesu laa gǝ muop yen, "Jet gu bil bii wudok Dauda chin shi ɓǝlak tǝ muop gǝ gurum gǝfe mou a? ⁴ Dok mǝ mwaan yaa nɗǝgǝn lǝ Naan mwaan mǝ sǝ nawe wuwaar. Jet a ndaawang muop dat gǝ mǝ sǝ. ⁵ Jet gu bil nɗǝgǝn byitǝt gǝgu nkwǝt bii par Ɓitnyak mǝn ndaawang muop mǝ nroop mǝbi nɗǝgǝn lǝwap wuyoon ɓǝ a ɗǝs dat mou a? ⁶ A laa yi gǝgun, mǝgwuo wu ma lǝwap wuyoon nyi npeen. ⁷ Ɗyin gu man ɓǝlǝp laa wu bii mǝ yen 'A ɗem a nachigir, a ɗem a byiwap mou,' ɓǝ ɗyin gu dam dagwu wu fufii mou. ⁸ Nsa Laa Gurum a Miskagam nkaa Ɓitnyak." ⁹ Yesu nyit pee nanyi mǝn mwaan nlǝwap. ¹⁰ Me dagwuo wu sar ween dok nyi nnǝgǝn. Farisiyawa mǝ nang fu Yesu mǝ yen, "Ɗǝ mǝ nɗak gurum par Bitnyak ɓǝ waar a?" Mǝ nang kam a dǝr mǝ kat war pam nyi yi. ¹¹ Yesu nang fu muop yen, "A wuɗa nkwǝt gǝ tǝm gǝme mǝn tǝm nanyi npǝta ntugun par Ɓitnyak ɓǝ mang mou yi? ¹² Gurum a wu ma tǝm mou a? A waa nyi mǝ nchin wuret par Ɓitnyak ɓǝ waar mou." ¹³ Lat mǝn Yesu laa gǝ dagwuo nanyi yen, "Shang sar gǝ." Dagwu shang sar mǝn ween nanyi lat, sar muup ɗe nchat gǝ nde. ¹⁴ Mǝn Farisiyawa muop mǝ fat gǝɓang fat mǝ kul ɓǝlǝp kaa muup. Mǝ tang war tǝ nyi. ¹⁵ Yesu naa kat a kam mǝn nyit pee nanyi. Gurum gwet mǝ lǝng gǝdǝr muup mǝn ɗak muop dip. ¹⁶ Laa gǝ muop yong nua gǝ nyin jin ngogot gurum mou, ¹⁷ ɗewar ɓǝlǝp wudok mǝ laa nfu Ishaya, lalepnaan hǝ, waa naduk yi, ¹⁸ "Gu naa frang gǝnǝ, wu a mang hǝ; nyi a laa gǝbok gǝnǝ, wu tooknǝ pya gǝ nyi hǝ. Gǝ a shen Mǝrip nǝ nnyi, a nyi gǝ laa ɓǝlǝp war naduk gǝ Mǝjong muop. ¹⁹ Nyi gǝ klak shik ɗǝ n-aar ɗǝgǝl yi mou; mǝgwuo gǝ kǝlǝng ɗǝgǝl muup gǝwar mou. ²⁰ Nyi gǝ taganyit wugok mou; gǝ tǝ wus wu gǝwar pit mou, a nyi gǝ lang war ɗǝ naduk petkaa yi. ²¹ Mǝjong gǝ mǝ ɗǝk endu a nsa sǝm muup." ²² Lat mǝn mǝ jya gǝ me dagwuo wu a wuvugum, nyi a wu fuɓǝm mǝn me damwam fu weel nyi hǝ dǝr Yesu. Yesu ɗak nyi mǝn dagwuo laa lǝfu mǝn naape. ²³ Rǝng gurum wukǝrgǝi dip mǝn mǝ yen, "Ɗe a dagwuo nhǝ a laa Dauda a?" ²⁴ Yahudawa mǝ kǝlǝng ɗyeer nanyi mǝn mǝ yen "Dagwuo nhǝ nyi fu chen damwam a shi Belzebul wu a laa long damwam hǝ." ²⁵ Yesu man enɗye gǝmuop gwe mǝn yen, "Yil-long wu gapɗǝgǝn shik nsa jagar ɓǝ gǝ lat baan, gǝfǝr gǝ gǝlǝ wu gapɗǝgǝn shik gǝ kwal ɓǝ gǝ pǝtkaa mou. ²⁶ Ɗə Shetan gə nchen Shetan ɓə wawu gapɗəgən shik. Chin a shime yil-long gəfe nrəgət yi? ²⁷ Ɗə an a chen damwam a shi Belzebul ɓə ɗe jepgu mə chen muop a shi me? A muop gə mə wak mǝsheep gun. ²⁸ Ɗə gə a chen damwam a shi Mərip Naan ɓe yil-long waa gwe kat gun. ²⁹ Məgwuo gə rə nlə gurum wubəɓal mən nkok lee gəfe ɗagat nə nɓugat nyi ɗəng a? Nɓugat nyi ɓə shee kat war kok wat lee gəfe. ³⁰ Məgwuo wu gə lap gədərnə mou, ɓə nyi a wu nyang an; məgwuo wu təpɓǝtnǝ tǝllə mou, ɓə nyi a fu ber. ³¹ A waa nyi a laa yi gǝgun, mǝgwuo nchin wubis mǝn dam sǝm Naan ɓǝ gǝ mǝ kon wubis nanyi, ɗǝ ndam sǝm Mǝrip ɓǝ gǝ mǝ kon wubis gǝfe mou. ³² Mǝgwuo nlaa wubis gǝkaa Laa Gurum ɓǝ gǝ mǝ kon wubis gǝfe. Ɗǝ mǝgwuo nlaa wubis gǝkaa Mǝrip Wuret ɓǝ gǝ mǝ kon wubis gǝfe gǝyil nhǝ, gǝ gǝyil wu kwǝt ntagam hǝ mou. ³³ Tǝng wuret gǝ ɓee jep wuret, tǝng wubis gǝ ɓee jep wubis; bii mǝ man tǝng a shi jep muup. ³⁴ Gun jep zem, gun a mweng, chin a shime gu laa ɓelep wuret yi? Gurum bii gǝ laa a ɓǝlǝp wu nɓǝt muup. ³⁵ Gurum wuret nyi gǝ ɓǝlǝp wuret nɓuzung muup, bii laa a wuret; gurum wuɓis nyi gǝ ɓǝlǝp wubis nɓǝzung muup, bii laa a wubis. ³⁶ A laa yi gǝgun, par ɓit sheep ɓǝ ko wuɗa gǝ yakdang ɓǝlǝp wudok pǝt nfu muup hǝ. ³⁷ Nsa a lǝfu wu tong nfugǝ pǝt yi gǝ pǝt gǝgǝ; a lǝfu wu tong nfugǝ pǝt yi gǝ nogol gǝ." ³⁸ Lat mǝn mǝ byiyil muop gǝ Farisiyawa mǝ lap gu Yesu mǝ yen, "Wusheepee, mǝ tangkop naa me byinyin dǝr gǝ." ³⁹ Mǝn Yesu laa gǝ muop yen, "Seen gurum wubis gǝ muop wubǝɓwaar muop fu tangkop byinyin. Gǝ mǝ kat byinyin wu ma nung Jona, lalepnaan mou. ⁴⁰ Kabi wudok Jona chin ɓit kun gǝ lǝpar kun nɗǝgǝn nɓǝt cherep hǝ, a kam zak Laa Gurum par gǝ chin ɓit kun gǝ lǝpar kun nɗǝgǝn tugun. ⁴¹ Par ɓit sheep ɓǝ gurum Nineva gǝ mǝ yigil nɗyam gǝ seen gurum wu chinyi nhǝ mǝn mǝ nwatyit muop, nsa dok mǝ kǝlǝng shakɓǝlǝp Jona mǝn mǝ bat chin wuret. Gǝdes hǝ mǝgwuo wu ma Jona nyi npeen. ⁴² Par ɓit sheep ɓǝ Mat-Long wudok tong ngan Wang hǝ gǝ yagal nwatyit seen gurum wu chinyi nhǝ, nsa dok tong gǝpe wu jijong wul ji kǝlǝng soon Sulemanu yi. Mǝn mǝgwuo wu ma Sulemanu nyi npeen. ⁴³ Ɗǝ damwam npǝt nshik mǝgwuo mǝn mwaan ntang pee nyak, mǝn nkat mou, ⁴⁴ ɓǝ yen 'A waa a yaa lǝnǝ wudok a tong nnǝgǝn a pǝt yi hǝ.' Ɗǝ waaji nkat mǝ nkum pee nanyi mǝn mǝ nmyap nyi kweet ⁴⁵ ɓǝ mwaan gǝ kok nde damwam pogovǝl wu mǝ ɓyaal ma nyi, wakjya mǝ tugat nnǝgǝn. Dagwuo nanyi gǝ dam nma wudok pel hǝ. Gǝ kot a kam gǝ seen gurum wubis muop wu gǝdet nhǝ. ⁴⁶ Yesu kutnyi fu lǝfu nanyi gǝ laa yi, mǝn nǝgǝn muup gǝ mǝjepnǝgǝn muup jya mǝ ɗyam gǝɓang, mǝ ɗemkop laa ɓǝlǝp yi gǝnyi. ⁴⁷ Mǝgwuo mwaan gǝ laa gǝnyi yen, "Nǝgǝngǝ gǝ mǝjepnǝgǝngǝ muop gǝɓang, mǝ ɗemkop laa ɓǝlǝp gǝgǝ." ⁴⁸ Yesu lap fu dagwuo nanyi yen "A wuɗa muop a nǝgǝnnǝ gǝ mǝjepnǝgǝnnǝ yi?" ⁴⁹ Mǝn lat mǝn kam jepgǝdǝr mǝn yen, "Gu naa, a nǝgǝnnǝ muop gǝ mǝjepna! ⁵⁰ Mǝgwuo wu chin bii wu Ndaanǝ wu gǝbǝtǝng ɗemkop ɓǝ a nyi a emna wumat, a nyi a emna wumis, a nyi a nǝgǝnnǝ."