¹ Yesu dok laa bii chin shen jeplep gǝfe wu sarkaavǝl hǝ mǝn lat mǝn nyit pee nanyi mwaan nde gǝfǝr npe ɗǝ mwaan gǝ sheepee mǝn shakɓǝlǝp yi nnǝgǝn. ² Yahaya wudok nyi nlǝɓal kǝlǝng jepe wu Yesu fu chan mǝn sat njeplep gǝfe mǝ mwaan jya ³ mǝ laa gǝnyi mǝ yen, "A gǝ a gwo wudok kwǝt nwul ha, mǝ lǝngyit mǝ naa a nde ɗyik yi?" ⁴ Yesu laa gǝ muop yen, "Wak gu la bii wu gu naa mǝn gu kǝlǝng hǝ gǝ Yahaya. ⁵ Wuvagam muop fu naape, wu kǝgǝl muop fu mwaan-mwaan, muop fu saar tǝlogom muop, wu duagar mǝ chin kǝlǝngpe, mǝdiɗem mǝ yigil mǝ kat nooklang, muop fu laa langship shen wupǝpya muop. ⁶ Wuret lang-nkaa mǝgwuo wu tuup muup lee gǝ an mou hǝ." ⁷ Gurum muop nanyi mǝ yigil dat wak mǝn Yesu ɓǝm laa bǝlǝp gǝkaa Yahaya gǝ gurum wukǝrgǝi yen "Dok mwaan gu naa a me ngǝgǝr yi—a ɓuu wu piip fu yogon a? ⁸ Ɗe dok mwaan gu naa a me—a dagwua wu ruan byaat long a? Muop wu mǝ ruan ɓyaat long bii mǝ tugatɗok a lǝ long. ⁹ Ɗǝ dok mwaan gu naa a me wagap yi—a lalepnaan a? A kam, a laa gǝgun, nyi a wuma lalepnaan. ¹⁰ Dok mǝ yil bii a kaa muup mǝ yen, 'Gǝ naa, an npe paar gǝ lalep gǝnǝ dǝr gǝ; a nyi gǝ myap war ngǝ.' ¹¹ A laa naduk yi gǝgun, nau gǝnaar gurum wu surǝp ɓee hǝ, me muop ma Yahaya Wukǝnpe mou. Nau kam hǝ, gurum wu kǝkat nnǝgǝn yil-long gǝbǝtǝng a ma Yahaya. ¹² Yil-long gǝbǝtǝng kat twang wagap pogot, ɗagat gǝshi Yahaya Wukǝnpe waa ji wul gǝɗǝt hǝ; ɗe a mǝ twangpe dat par gǝ mǝ ɗuan gǝkagam. ¹³ Nsa byiyil Jeplepnaan gǝ byitǝt nau mǝ laa ɓǝlǝp ba waaaji rǝ gǝshi Yahaya. ¹⁴ Ɗǝh gu ɗem ɓǝ a nyi a Iliya wudok kwǝt nwul hǝ. ¹⁵ Mǝgwuo wu gǝkom kǝlǝngpe ɓǝ kǝlǝng. ¹⁶ Gu a kok yii yigil ndung a kang a gǝme? A kabi jep wu muop fu ɗǝgǝl gǝ lǝtuk hǝ, mǝ tugatɗok fu yong shak, ¹⁷ mǝ yen 'Mǝ taa ɓel ngun mǝn gu nyang gya. Mǝ wal-wal muut mǝn gu nyang nǝ gu wal.' ¹⁸ Yahaya dok wul nyang sǝsǝ, nyang sua am-latǝng, mǝn gu yong, 'Nyi gǝ damwam nshik.' ¹⁹ Laa Gurum wul nyi fu sǝsǝ, nyi fu sua am-latǝng ɓǝn chin gu yong, 'Gu naa wuɓǝɓǝlak gǝ wumuos-tǝ, wushaar mǝlap gǝndung gǝ mǝ chan wubyas.' Nau gǝ kam hǝ soon bii kat pǝpǝt a shi ɓǝlang gǝfe." ²⁰ Yesu ɓǝm ɓyaal gǝfǝr muop wudok chan ɗyeer gwet nnǝgǝn mǝn mǝ nyang bat hǝ. ²¹ "Lat nkaa yi Korazin! Lat nkaa yi Betsaida! Ɗyeer wu mǝ chin nɗǝgǝn gu hǝ, ɗyin dok chin a gǝyil Taya gǝ Sidon ɓǝ dok gǝ mǝn nyit wubis gǝdu gwe, mǝn mǝ nɓyang chisɓyaat mǝn mǝ ntugat nfat. ²² Par ɓit sheep ɓǝ gǝ mǝ naachigir kaa Taya gǝ Sidon ɗekaa gu. ²³ Kaparnawum, yi kat gǝ mǝ mang yi kaa nlang a gǝtǝng ko? A kam mou, gǝ mǝ sam yi ntak a gǝpe tǝgǝrchin. Bii ɗyeer wu mǝ chan nnǝgǝn yi hǝ, ɗyin dok mǝ chan a kam nɗǝgǝn Sodom ɓǝ ɗyin nkut nyi nɓit wu chinyi. ²⁴ A laa gǝ yi par ɓit sheep, ɓǝ nung Sodom gǝ zheel nma nǝmik." ²⁵ A shii nanyi mǝn Yesu yen "A tǝgǝr gǝ, Ndaa, Miskagam gǝbǝtǝng gǝ gǝyil, nsa gǝ sok jepe nhǝ fu wǝsǝsoon gǝ mǝbyiman, mǝn gǝ nyin njep wuɗyen. ²⁶ A kam wagap Ndaa, nsa dok a nyi ɗongɓǝt gǝ. ²⁷ Ndaanǝ nyit jepe dip gǝsarnǝ; mǝgwuo man Laa nanyi mou, a Ndaa muup dat man nyi; mǝgwuo zak man Ndaa nanyi mou, a Laa nanyi dat man nyi gǝ gurum wu Laa nanyi kat gǝ ji nyin nnyi hǝ. ²⁸ Gu wak gu jya dǝr nǝ gun wu fu ɓǝlang mǝn gun gǝ lee wutegen hǝ; gǝ a shen nyak ngun. ²⁹ Gu kok lee gǝnǝ mǝn gu shee jepe funǝ nsa an a wu zugum gurum mǝn an a wu kaaleen, a kam ɓǝ gu kat nyak nchelem gu. ³⁰ Lee gǝnǝ a wu ɓes mang nsa nyi a wu fǝfyel"