¹ Yesu dok yong jepgǝdǝr sarkaavǝl mǝn pǝn kamshik nmuop gǝkaa damwam ɗewar mǝ chen muop yi, ɗǝ mǝ ɗak gurum muop wu gǝ gǝ byiyaa gǝ gok dǝɗyak-dǝɗyak yi hǝ. ² Sǝm jeplep wu sarkaavǝl nanyi a kam. Wupel a Simon (wu yong nyi yi Bitrus hǝ), gǝ Andrawas emnǝgǝn muup; Yakubu laa Zabadi gǝ emnǝgǝn muup Yahaya; ³ Filibus gǝ Bartilomi; Tomas gǝ Matiu wulap gǝndung; Yakubu laa Halfa, gǝ Tadewus; ⁴ Simon Wurǝgǝt, gǝ Yahuza Iskariyhoti wu seet gǝnyi hǝ. ⁵ Yesu lep muop wu sarka-vǝl nanyi. Ɓyang ɓǝlǝp shen muop yen "Tap gu mwaan gǝpe wu Mǝjong mǝ tugatɗok nǝgǝn mou; naa yi gu ruo gǝyil gurum Samariya muop mou. ⁶ Mwaan gu tang a vung tǝm Izraila muop wu mǝ lǝn hǝ. ⁷ gu mwaan ɓǝ gu shakɓǝlǝp gu yen, 'Yil-long gǝbǝtǝng wulduk gwe.' ⁸ Gu ɗak wugok muop, gu ap mǝdiɗǝm mǝ kat nooklang yi, gu saram tǝlogom muop mǝn gu chen damwam muop. Gu lap a gǝ ɓolong, gu pǝn zak gǝ ɓolong. ⁹ Gu zinariya, gǝ azurfa gǝ tagula nbang shagal gǝgu mou. ¹⁰ Gu kok lau mwaan, gǝ byaat nɓǝl, gǝ kogop, gǝ kam dagar npe mwaan mwaan nanyi mou, nsa wuɓǝlang ɗong ɗyin nkat sǝ gǝnyi. ¹¹ Ɗǝ gu ruo nme gǝfǝr gǝ me wang mǝn gu kat mǝgwuo wukǝr nnǝgǝn ɓǝ gu tugat nnǝgǝn ɗǝ par ɓit wak agu dat. ¹² Gu ruo nlǝ nanyi ɓǝ gu nangpe. ¹³ Ɗǝ lǝ nanyi a wukǝr ɓǝ tugatchagap agu ɗe nnǝgǝn. Ɗǝ nkwǝt a kam mou, ɓǝ tugatchagap agu waa gǝdǝr gu. ¹⁴ Muop wu mǝ nyang lap gun, mǝ nyang kǝlǝng ɓǝlǝp gǝgu ɓǝ gu vak dǝr nyit lǝ gǝ gǝfǝr nanyi ɓǝ gu fas orong lǝ muop gu vak gǝnyi shi kwakgu. ¹⁵ A laa naduk yi gǝgun, par ɓit sheep ɓǝh gǝ mǝ naa chigir ka Saduma muop gǝ Gwamrata ɗekaa gǝfǝr nanyi. ¹⁶ Gu naa, a lep gun a kabi tǝm gǝnaar aslaar, gu ɗyam gǝ soon agu kabi wuo mǝn gu tugat nzugum kabi ɓǝl hǝ. ¹⁷ Gu tugat gǝ en gu! Gurum par gǝ kok gun nmwaan ntagam gǝwur daskagam gǝnyi, mǝn mǝ nnas gun nɗǝgǝn lǝwp gǝmuop. ¹⁸ Nlat ɓǝ mǝ mwaan gǝgun ntagam wapna gǝ long muop nsa sǝm nǝ ɗǝ gu twamshik yi kaanǝ ntagam muop gǝ Mǝjong. ¹⁹ Mǝ nchin kam gǝgun ɓǝ gu weel gǝ ɓǝlǝp wu gu laa mou, nsa gu kat byilaa shide. ²⁰ Nsa a gun gu laa ɓǝlǝp nanyi parde mou, a Mǝrip Ndaagu par gǝ laa gǝfu gu. ²¹ Mǝgwuo nlat ɓǝ nyin wu emnǝgǝn npe tǝ; ndaa gǝ chin a kam gǝ laa muup. Jep gǝmǝ nyang yit ndaa muop mǝn mǝ nnyit gurum ntuo muop. ²² Gurum gǝ mǝ nyang yit gu nsa sǝmnǝ. Mǝgwuo wu mogor mwaan gǝ rǝ nogot ɓǝ gǝ mǝ angka muup. ²³ Mǝ ntwang gun gǝfǝr nhǝ, ɓǝ gu suo gu wakdǝr nde, a laa naduk gǝgun par gu zar gǝyil Izraila nlat she laa Gurum nwul mou. ²⁴ Lagǝdǝr gǝ maa wushee nyi mou; frang gǝ maa miskagam gǝfe mou. ²⁵ Lagǝdǝr gǝ ɓoot fu kǝgǝt ka wushee nyi hǝ, frang gǝ ɓoot fu kǝgǝt ka miskagam gǝfe hǝ. Ɗe mǝ nyong wupin lǝ shi Belzebul ɓǝ nung gurum lǝmuup ya gǝ bis nma nǝmuop. ²⁶ A waa nnyi, gu yigil lugut muop mou, mǝbi waakwǝt wu mǝ kwoomka wu maa ep mou. Mǝbi waakwǝt gǝsok wu gǝ maa man mou. ²⁷ Ɓǝlǝp wu a laa gǝgun nlǝpar ɓǝ gu laa nfuus; ɓǝlǝp wu gu kǝlǝng nchiin ɓǝ gu laa dar. ²⁸ Gu yigil lugut muop wu gǝ mǝ tǝ a dǝngshishik dat, mǝn tǝ chelem maa muop hǝ mou. Gu yigil a lugut mǝgwuo wu gǝ dam chelem nau gǝ dǝngshishik nlǝwus. ²⁹ Bii shagal jep ɓǝl vǝl a til dat mou a? Nau gǝ kam hǝ, me muop gǝ lan nǝ Ndaagu nman mou. ³⁰ Naan kun swoopkaa gu nau. ³¹ Gu yigil lugut mou. Gun a wuret maa jep ɓǝl. ³² Mǝgwuo wu twamshik kaanǝ ntagam gurum ɓǝ an zak gǝ a twamshik kaa muup ntagam Ndaanǝ wu gǝbǝtǝng hǝ. ³³ Mǝgwuo wu nyang an ntagam gurum, ɓǝ an zak gǝ a nyang nyi ntagam Ndaanǝ wu fugǝtǝng hǝ. ³⁴ Naa yi gu ɗye nkwǝt a wul a gǝ tughatchagap gǝyil. Dok awul a gǝ tugatchagap mou; a wul a gǝ nggoo. ³⁵ A wul a npe ɗen jagar gǝnaar gurum gǝ ndaa muup, gǝnaar lareep gǝ nǝgǝn muup, gǝnaar namat gǝ mat laa muup. ³⁶ Mǝnyangyit mǝgwuo gǝ kwǝt a gurum lǝmuup. ³⁷ Mǝgwuo wu ɗem ndaa muup gǝ nǝgǝn muup ma an, ɓǝ mak npe waa nǝmaan mou; mǝgwuo wu ɗem laa muup, gǝ reep muup ma an, ɓǝ mak npe waa nǝmaan mou. ³⁸ Mǝgwuo wu mang shepɓeel gǝfǝ langgǝdǝr nǝ mou, ɓǝ mak mpe waa nǝmaan mou. ³⁹ Mǝgwuo wu kat tenglang gǝfe, ɓǝ tenglang nanyi gǝ kyem. Mǝgwuo wu nyit tenglang gǝfǝ kyem nsa an ɓǝ gǝ chin nkat. ⁴⁰ Mǝgwuo wu lap gun ɓǝ lap a an, mǝgwuo wu lap an ɓǝ lap a wulep an. ⁴¹ Mǝgwuo wu lap lalepnaan nsa nyi a lalepnaan ɓǝ gǝ kat kopgǝshi lalepnaan; mǝgwuo wu lap gurum wukǝr nsa nyi a gurum wukǝr ɓǝ gǝ kat kopgǝshi gurum wukǝr. ⁴² A laa naduk yi gǝgun, mǝgwuo npǝn ɗa am wu zugum njep wuɗyen nhǝ nsa muop a jepgǝdǝr, ɓǝ kopgǝshi muup gǝ lat baan mou."