¹ Yesu taa kong taa kaa nɗǝgǝn chii am mǝn waa dǝr gǝfǝr afe. ² A nnǝgǝn mǝn mǝ jya gǝ me dagwuo wu shik muutkum ɓuǝtɗok gǝ karam. Yesu naa pǝn-naduk amuop mǝn laa dǝr dagwuo wu shik muutkum nanyi yen "Laanǝ, chin tookpya. Mǝ kon wubis agǝ." ³ Pak mǝbyiyil mǝ laa dǝr shak mǝ yen, "Dagwuo nhǝ nyi fu damsǝm Naan." ⁴ Yesu man enɗye amuop mǝn yen, "A me saa gun fu ɗye bii wubis nbǝzung eh? ⁵ A me wuɗa ɓes laa yi? A wu laa yen 'Mǝ kon wubis agǝ a'? a wu yen 'Yagal gǝ mwaan-mwaan eh'? ⁶ Npe ɗǝ gu man kan Laa Gurum nyi gǝ kamshik gǝyil dǝr kon wubis, mǝn laa gǝ wu shik muutkum nanyi yen, "Yagal gǝ mang karam agǝ gǝ waa dǝr lǝgǝ." ⁷ Lat mǝn dagwuo nanyi yagal mǝn waa dǝr lǝmuup. ⁸ Gurum wukǝrgǝi mǝ naa kam mǝn rǝng muop, mǝn mǝ saam Naan wu pǝn kamshik kam hǝ ngurum. ⁹ Yesu ɗel pee nanyi dat mǝn naa me dagwuo wu sǝm muup a Matiu hǝ, tongɗok gǝpe lap gǝngung. Mǝ laa gǝnyi yen "Lang gǝdǝrnǝ." Mǝn yagal wagap lang gǝdǝr muup. ¹⁰ Yesu taatong nlǝ nanyi npe sǝsǝ mǝn mǝ lap gǝndung gǝ gurum wu chan wubyas muop jya sǝsǝ gǝpe gǝme gǝnyi gǝ jepgǝdǝr muop. ¹¹ Farisiyawa muop mǝ naa kam mǝn mǝ laa dǝr jepgǝdǝr muup mǝ yen, "A waa nme wusheepee agu nyi fu sǝsǝ gǝpe gǝme gǝ mǝ lap gǝndung gǝ gurum wu chan wubyas muop eh?" ¹² Yesu kǝlǝng kam mǝn yen "Gurum muop wu a kagam hǝ, mǝbi ɓyak muop gǝ wuɗak mou, a wugok muop dat gǝ mǝ tangkop wuɗak. ¹³ Wak gu ben gǝkang ɓǝlǝp wu yen, 'A tang a kop naachigir, a byiwap mou.' Nsa a wul a dǝr yong wukǝkagat mou, a wul a dǝr yonh wulǝlǝk muop." ¹⁴ Lat mǝn jepgǝdǝr Yahaya mǝ jya dǝr muup mǝn mǝ yen, "A waa nme mǝn gǝ Farisiyawa muop bii mǝ sǝnfu mu, ɗe jepgǝdǝr gǝ muop gǝ mǝ sǝnfu mou eh?" ¹⁵ Yesu laa gǝmuop yen "Mǝshaar wupin mat bii gǝ mǝ chigir wa nyi kutnyi dǝr muop a?Ɓit kwǝt nwawul wu gǝ mǝ mang wupin mat nbaa gǝnyi dǝr muop, a shi nanyi ɓǝ mǝ sǝnfu muop. ¹⁶ Mǝgwuo jet gǝ ɓam byaat wufuo nlǝ shi wusǝgǝr mou, nsa wufuo nanyi tee wusǝgǝr, ɓǝ tee nanyi bǝn maa wujet nhǝ. ¹⁷ A kam shi gurum bii mǝ wur am-laatǝng wufuo nɗǝgǝn kagat wusǝgǝr mou. Mǝ nchin kam ɓǝ kagat nanyi gǝ tee, am-laatǝng gǝ kon mǝn kagat nanyi ndam. A waa nnyi, gǝ mǝ wur am-laatǝng wufuo a nɗǝgǝn kagat wufuo ɓǝ mǝbi chin mou." ¹⁸ Yesu nyi fu laa ɓǝlǝp nhǝ dat gǝ muop mǝn me mǝgwuo wuyoon wul ji zǝnshik ntagam muup. Mǝn yen "Reepnǝ a muut dat gǝɗǝt nhǝ, ji gǝ lang sargǝ kaa muup, ɓǝ bar." ¹⁹ Mǝn Yesu yagal mwaan gǝdǝr muup, mǝn jepgǝdǝr Yesu mǝ mwaan zak. ²⁰ Muop nmwaan mǝn me namat wu tǝgǝm sǝ nnyi nung yii sarkaa-vǝl hǝ bat kyagat-kyagat mwaan gǝ ɓǝm fukyep tǝgoo afe. ²¹ Nsa ɗye yong, "Ɗyin a ɓǝm wa byaat gǝfe dat ɓǝ a kagam." ²² Yesu bat naa nyi mǝn yen, "Reepnǝ, duan tugur yi, pǝn-naduk gǝyi kagam yi." Mǝn namat nanyi kagam wagap shide. ²³ Yesu rǝ nlǝ dagwuo wuyoon nanyi mǝn kat mǝ taa ɓǝl gǝ gurum wukǝrgǝi muop fu wal. ²⁴ Laa gǝ muop laa yen, "Gu takpe, lareep nanyi muut mou, nyi a fu saam dat." Mǝn mǝ swar kaa muup ba mǝ zhal nyi. ²⁵ Gurum mǝ vak lat mǝn rǝ nlǝ, mǝn yaa lareep nanyi mǝn yagal tong. ²⁶ Ɓǝlǝp nanyi haan ngan gǝyil nanyi dip. ²⁷ Yesu yagal nnǝgǝn mǝn wuvagam vǝl mǝ lǝng gǝdǝr muup. Mǝ aar ɗǝgǝl muop mǝ yen, "Naachigir kaa mu, laa Dauda!" ²⁸ Shi wu Yesu waaji rǝ gǝpang mǝn wuvagam muop nanyi mǝ jya dǝr muup. Yesu laa gǝ muop yen, "Gu pǝn naduk kwǝt gǝ a ɓoot npe chin nyi a?" Mǝ lap yen. "A kam hǝ Miskagam." ²⁹ Lat mǝn Yesu ɓwam yit muop mǝn yen, "Ɗagat nnyi kabi pǝn-naduk agu," ³⁰ mǝn mǝ naapee. Yesu dǝn shi muop yen, "Naa mǝgwuo yi nman." ³¹ Mǝn wuvagam nanyi wak mǝ dwam ɓǝlǝp ngan gǝyil nanyi dip. ³² Wuvagam muop nanyi mǝ yigil dat wak mǝn mǝ jya dǝr Yesu gǝ me dagwuo wu fuɓǝm wu me damwam fu weel nyi. ³³ Yesu chen damwam lat mǝn dagwuo wu fuɓǝm nanyi laa lǝfu. Ɓǝlǝp rǝng gurum muop mǝn mǝ yen, "Jet mǝ kat bii nakam duk gǝyil Izraila mou!" ³⁴ Ɗe a Farisiyawa mǝ yen, "Nyi fu chen damwam a shi long damwam muop." ³⁵ Yesu zar gǝfǝr gǝ wang dip. Nyi fu sheepee nlǝwap gǝmuop, nyi fu shakɓǝlǝp langship yil-long, mǝn ɗak muop wu gǝ gok dǝɗyak-dǝɗyak hǝ. ³⁶ Yesu naa gurum wukǝrgǝi mǝn naachigir kaamuop nsa took muop dam mǝn sar muop waam. Muop dok a kabi tǝm wu muop gǝ wutap mou hǝ. ³⁷ Laa gǝ jepgǝdǝr muup yen, "Ɓǝlang ɗyip nyi nɓǝl ɗe a mǝpyan ɓǝlang mǝ kat. ³⁸ A waa nnyi, gu ɗang Miskagam wupin ɗyippe ɗewar nyi lep yi gǝ mǝpyan ɗyippe."