¹ Gǝshii wu Yesu ɗarɗok fukong Janisarata, mǝn gurum wukǝgǝi mǝ yaa nyi waat, muop fu kǝlǝng ɓəlǝp Naan. ² Naa chi am vəl mə fukyep kong. Mǝkwat cherep mə fwat nɗəgən, muop fu vang jeng gǝdu. ³ Yesu rə nɗəgən nde chi am nanyi ndung a nung Bitrus hǝ, mən laa yen gwar chinkyem lee gǝnaar am. Mən tong nɗǝgǝn chii nanyi shee gurum muop yi. ⁴ Laa ləfu lat mən laa gǝ Siman yen, "Dər gə chii nanyi gǝ mwaan gǝnaar wujijong gǝnyi, mǝn gǝ tak jeng agə ɗewar yak cherep yi." ⁵ Siman lap yen, "Miskagam, mǝ chin ɓəlang ba lǝpar lat kaamu mpeen mǝn yaa mǝbi mou, mǝ a gǝ gǝ laa gwe ɓǝ gǝ a tak jeng nanyi." ⁶ Shiwu chin kam mǝn mə yak cherep gwet ba jeng gǝmuop gǝwar yilang. ⁷ Mən mə yong wushaar kwat amuop nɗəgən chii nde jya mǝ tǝpɓǝt muop yi. Mə jya mǝn cherep nanyi gǝrang chii nanyi dip vəl ba ɓagal gǝ mǝ ruo n-am. ⁸ Bitrus naa dat kam mǝn pal ntagam Yesu, mǝn yen, "Miskagam, nyit an, nsa an a gurum wu chan wubis." ⁹ Nsa kang rǝng nyi nau gǝ muop wu gǝpe gǝme gǝnyi hǝ, nsa cherep wu mǝ yak mɓəl hǝ. ¹⁰ Dok muop gǝpe gǝme gə Yakubu gə Yahaya, jep Zabadi wudok muop a wushaar kwat Siman. Mən Yesu laa gə Siman, yen, "Gə yagal lugut mou, nsa gəɗes hə, yong gə yak a gurum muop." ¹¹ Mə dəl chii am gǝmuop ɗakkaa gǝtǝng gǝnyi mǝn mǝ nyit jepe nau mǝn mǝ lǝnggǝdǝr Yesu. ¹² Dok Yesu nyi nɗǝgǝn me gǝfǝr mǝn me təlogom zak nnəgən. Naa Yesu dat mǝn pal ntagam muop mǝn ɗang nyi yen, "Miskagam, ɗyin gə ɗem ɓə gə ɗak an." ¹³ Yesu pǝn sar muup ɓəm nyi mǝn yen, "A ɗem. Kagam dat." Gə laa mou mǝn logom gǝfe lat. ¹⁴ Yesu kar nyi nkwǝt gwar gǝ laa dǝr mǝgwuo mou, mǝn yen, "Mwaan gə nyin kaa sak n-ndaawang mən gə pǝn byitok dər vangsak, gəbi wu Musa laa hə, ɗepin waa bii twamshik yi dǝr muop." ¹⁵ Ɓəlǝp kaa muup haan mang pee mǝn gurum wukǝrgǝi mǝ jya dǝr muup mpe kǝlǝng sheepee gǝfe, ɗewar nyi ɗak wugok muop yi. ¹⁶ Mən bii pǝt mwaan zangpee mən ɗangnaan. ¹⁷ Me mə ɓit wu nyi fu sheepee mǝn Farisiyawa muop gǝ mǝsheepee gǝ byitǝt mǝ tugatɗok nnəgən, mə tugat nfung wang Galili gə Yahudiya gə gəfər Urishalima. Kamgǝɓǝlǝp nung Miskagam dok nyi nshik muup ɗewar ɗakɗak yi. ¹⁸ Pak gurum mǝ wul, mǝ mang me dagwuo wu sar muutkum gǝ bǝteer, mǝ tang pee ɗewar ɗyilǝng mǝ ɓuǝt nyi yi ntagam Yesu. ¹⁹ Mə kat war ɗyiləng mou nsa gurum wukǝrgǝi mǝn mǝ kaa kǝlǝ, mə ep gak mǝn mǝ ɓyang nyi gǝ bǝteer nanyi sam yaa nlǝ gǝnaar gurum muop ntagam Yesu. ²⁰ Yesu naa pǝn-naduk gǝmuop mǝn yen, "Dagwuo, mə kon wubis gǝgə." ²¹ Mǝpyan biiyil gə Farisiyawa mə ɓǝm ɓǝlǝp nang mǝ yen, "A wuɗang shi ndung fu laa ɓəlǝp wubis gǝkaa Naan eh? A wuɗang gǝ kon wubis nǝ nkwǝt a Naan eh?" ²² Mǝn Yesu naa enɗye gǝmuop man, mǝn mǝ laa gǝ muop yen, "A na gun fu tankaa ɓǝlǝp nhǝ mbǝzung gu eh? ²³ A me wuɗa ɓes laa yi, 'Mə kon wubis gǝgə' ah mə yen 'Yagal gə mwaan-mwaan' yi? ²⁴ A ɗemkop gu man nkwǝt Laa Gurum nyi gə kamshik gǝyil kaa wubis, a laa gə gǝ, "Yagal, gǝ mang karam gǝgə, gǝ waa ləgə.'" ²⁵ Bǝr mǝn yagal gǝyit muop, mǝn mang karam wudok teerɗok gəkaa hə. Lat mǝn waa dǝr ləmuup nyi fu pǝnyoon nNaan. ²⁶ Ɓǝlǝp rǝng gurum muop dip mǝn mǝ pǝnyoon nNaan. Lugut tuo muop mǝn mǝ yen, "Mə naa bii wufuo chinyi." ²⁷ Ndangkong jepe nanyi mǝn Yesu pət nyit pee nanyi mən kat me dagwuo wu lap gəndung, səm muup a Lawi tongɗok fulǝ lap gəndung. Mǝn laa dər muup yen, "Langgədər nə." ²⁸ Mən Lawi nyit jepe nau mǝn langgədǝr muup. ²⁹ Lawi zak chin biisə gəpang ləmuup mpe Yesu. Mǝpyan lap gəndung muop dok gwet nnəgən, gǝ pak gurum muop wu mə tugatɗok kǝ tebul muop fu səsǝ gəshak. ³⁰ Mən Farisayawa gə mǝpyan biiyil mə gwakshik dər jepgədər muop mǝ yen "A nang gun fu sə gun fu sua gəshak gə mǝpyan lap gəndung gə gurum mǝ chan wubias yi?" ³¹ Yesu lap fu muop yen, "Gurum muop wu a wukagam gǝ mǝ tangkop wuɗak mou; a wugok muop gǝ mǝ tangkop wuɗak. ³² A wul a mpe yong gurum wukǝr mǝ bat yi mou, a wul a mpe yong mǝ chan wubias ɗepin mə bat yi." ³³ Mə laa gənyi mǝ yen "Jepgǝdǝr Yahaya bii mə sənfu du mǝn mə ɗangnaan, jepgǝdǝr Farisiyawa bii mə chan kam. Ɗe jepgǝdər gǝ bii muop fu sə muop fu sua." ³⁴ Yesu laa yen, "Mǝgwuo gǝ saa mǝshaar mis namuar mǝ n-sənfu shii wu mis namuar kutnyi gǝpe gəme gə muop a? ³⁵ Ɓit kwǝt nwawul wu gǝ mə mang mis namuar n-yigil gǝnyi dǝr muop, a shii nanyi ɓǝ mə sənfu du." ³⁶ Lat mǝn Yesu laa me ɓəlǝpkwoom gə muop yen, "Mǝgwuo gə tee tǝgoo wufuo ntaan təgoo wusəgər gə nyi mou. Nchin kam ɓə tee təgoo wufuo nanyi, chigǝt tǝgoo wufuo gǝ warshak gǝ təgoo wusəgər mou. ³⁷ Məgwuo gǝ ɗək am-laatǝng wufuo nɗǝgǝn dǝpan wusəgər mou. Ɗǝ nchin kam ɓǝ am-laatǝng wufuo tee dǝpan nanyi, mǝn am-laatǝng kon mǝn dǝpan nanyi dam. ³⁸ Am-laatǝng wufuo gǝ mǝ ɗək a nɗǝgǝn dǝpan wufuo. ³⁹ Mǝgwuo wu sua am-laatǝng wusǝgǝr gǝ ɗem wufuo zak mou nsa gǝ yen, "Wusǝgǝr shang ma wufuo.'"