¹ Lat mǝn Yesu wu nyi gə Mərip Wuret nshik muup, tong nkong Urdun wawul yi mən Mərip Wuret mwaan gənyi ngəgər. ² A nnǝgǝn mǝn Shetan katshii muup ɓit yagurumvəl. Nɗǝgǝn ɓit muop nanyi Yesu sə mǝbi mou, ndangkong nanyi mǝn ɓlak tǝ nyi. ³ Shetan laa gə nyi yen, "Ɗǝ gə kwət a laa Naan, ɓə gə laa dər pang nhə nyi waa nawe." ⁴ Yesu lap yen, "Mə yil gwe ɗen, 'Gurum bii bar a shi nawe dat mou.'" ⁵ Lat mən Shetan mang nyi kaa gǝ pang wufyer gǝnyi mən nyin yil-long gəyil dip nnyi. ⁶ Shetan laa dər muup yen, "Gǝ a pən kamshik ndung dip ngə dau gə ɗong amuop, nsa muop a nǝmaan. Gǝ a ɓoot mpe pǝn mǝgwuo wu took nǝ ɗem hǝ. ⁷ Waa nsa kam, ɗǝ gə dugum ntagam nə mən gə wap an, ɓə mǝ wak nəmak." ⁸ Mən Yesu lap fu muup yen, "Mǝ yil gwe ɗen, 'Wap Naan agə, mǝn gǝ chin ɓǝlang frang a nnyi dat.'" ⁹ Lat mən Shetan mang Yesu mwaan nUrushalima gǝnyi mǝn lang nyi gəsung ləwap wuyoon, mən laa dər muup yen, "Ɗyin gə kwət a Laa Naan ɓə gə paar gə taa n-yil. ¹⁰ Nsa nyi a mǝ yil gwe ɗen, 'Ya gə laa gǝ məwong gǝfe muop mə nkang kaa gə,' ¹¹ mǝn, 'Gǝ mə lap gə gəsar muop yong gǝ chit kwak gǝ shi pang.'" ¹² Yesu lap fu muup yen, "Mə yen, 'Gə katshii Naan gǝgǝ mou.'" ¹³ Shetan katshii Yesu lat mən yagal nyit nyi dər nde ɓit. ¹⁴ Lat mǝn Yesu wadər Galili gə kamgǝɓǝlǝp nung Mərip, mǝn ɓǝlǝp gǝfe haanpe ngan gǝyil nanyi dip. ¹⁵ Lat mǝn ɓǝm sheepee nɗǝgǝn nləwap muop, mən gurum dau mə tǝgǝr nyi. ¹⁶ Yesu ji gyil Nazaret, pee wudok fyer nnəgən hə. Lat mǝn rǝ nɗǝgǝn lǝwap par Ɓitnyak kabi wujet gǝ chan hǝ, mǝn yagal ɗar ɗepin bil bang-biiran yi gǝ ɗǝgǝl muup. ¹⁷ Mə pən klap-biiran Ishaya, wukaafung, nnyi. Ep mən kat pee wu mə yil yen, ¹⁸ "Mərip Miskagam nyi nshik nə, nsa mǝm an ɗepin a duam langship yi gə wupya muop. Lep an ɗepin a shakɓəlep katpe yi gə gurum wu mə ɗyan muop hǝ, mən a apyit wuvagam muop, ɗepin a fwat yi gə muop wu nɗəgən təgəchiin hǝ, ¹⁹ ɗepin a duam yii chinɗong Miskagam yi." ²⁰ Lat mən chigit klabbiiran nanyi mǝn pǝn wutǝpdǝr ɓəlang ləwap, mən yaa pǝtong. Gurum muop wu nlwap hǝ dau mǝ lǝng yit muop gǝ naa nyi yi. ²¹ Mən ɓəm laa ləfu gə muop yen, "Chinyi lǝfu bang-ɓəlǝpnaan nhǝ kat rǝ nkom gu." ²² Gurum dip nnəgən mə laa ɓǝlǝp wuret kaa muup. Ɓǝləp rəng muop nsa lǝfu wuret wu fwat nfu muup hǝ, mǝn mǝ nang yen, "Ndung a laa Yusufu mo?" ²³ Yesu laa gə muop yen, "Yong gu laa ɓəlep kwaan nhə gə an, 'Wuɗak, ɗak sak. Bii wu mǝ kələng gə chan nKafarnahum, chan zak npeen gǝyil gǝmu.'" ²⁴ Mən laa yen, "A laa naduk gə gun, bii gǝ mǝ lap wukaafung ləmuup mou. ²⁵ Ɗagat a laa naduk yi gəgun, dok surəpkaa mɓəl gəyil Izraila gǝshii Iliya, shiwu mə ogot gəbətəng yii kun gə tar peemǝ mən gǝzǝm taa gǝyil. ²⁶ Mən dok mǝ lep Iliya mwaan dər me muop mou, ɗe a dǝr me matkaa nZarafat gǝyil Sidon hǝ dat. ²⁷ Dok təlogom muop mɓəl gǝyil Izraila gǝshii Elisha, wukaafung, mən dok ɗak me muop mou, ɗe a Naaman dagwuo Suriya dat." ²⁸ Gurum muop wu nɗǝgǝn lǝwap hǝ mǝ kǝlǝng lǝfu nanyi mǝn dǝfil mang muop dip. ²⁹ Mə yigil dǝl nyi gǝɓal fwat gənyi ndangkong gǝfǝr, mə mwaan gənyi twaas gǝfu pang gǝfǝr gǝmuop ɗewar mǝ tak nyi yi ɓiring sam ɗel. ³⁰ Mən Yesu met gənaar muop mǝn mwaan nde mǝpe. ³¹ Lat mən mwaan gǝyil Kafarnahum, nɗǝgǝn Galili mǝn ɓǝm sheepee nnǝgǝn par Ɓitnyak. ³² Ɓǝlǝp rǝng muop gǝ sheepee afe nsa laa lǝfu gǝ kamshik. ³³ Me dagwuo dok nyi nɗǝgǝn ləwap nanyi gə damwam nshik, mǝn tak ɗəgəl ɓalɓal yen, ³⁴ "Haa! Yesu, gurum Nazaret, a me weel mən gə gə eh? Gə wul a dǝr dam mǝn a? A man gə — gə a Wusǝsaar nung Naan!" ³⁵ Yesu ɓyaal damwam nanyi yen, "Ɗok kit mǝn gǝ pət gə nyit nyi!" Mən damwam nanyi mang dagwuo tak n-yil gənaar muop, mǝn pət nyit nyi kyagat. ³⁶ Ɓǝlǝp rǝng gurum muop dip mən ɗe gə mǝ ɓagalkaa dat dər shak. Mə yen, "A ɓəlǝp me kam eh? Pǝnfu dat gə kamshik gǝ kamgǝɓǝlǝp dər damwam muop mən mə fwat." ³⁷ A waa nsa kam, ɓəlǝp kaamuup haan ngan gǝyil nanyi dip. ³⁸ Lat mən Yesu nyit ləwap mǝn rə nlə Siman. Mən kat səgər Siman teerɗok gə lapiip, mən mə ɗuak nyi gəfu muup. ³⁹ Lat mən ɗar kaamuup, mǝn ɓyaal lapiip nanyi, mən lapiip nyit namat nanyi. Mən yagal ɓəm ɓəlang mmuop. ⁴⁰ Shiwu fuus mpe taa pang, mǝn mǝ jya gǝ gurum wugok muop dǝr Yesu. Lǝng sar kaa muop mən mǝ kagam dip. ⁴¹ Damwam muop mə fwat nshik pak muop gwet mǝn mə er, mǝ yen, "Gə a Laa Naan!" Yesu ɓyaal damwam muop nanyi mən nyit muop mǝ laa ləfu mou, nsa mǝ man a nyi a Kristo. ⁴² Ɓit ɓang mǝn Yesu mwaan me məpe a nyi dat. Gurum wukǝrgǝi mǝ tang nyi mən mǝ taa gǝ pee wu nyi nnəgən hǝ. Mə ɗemkop nyi nyit muop mou. ⁴³ Mən laa gə muop yen, "A tiit gǝ a shakɓ‌ǝlǝp langship yil-long Naan ngogot gǝfǝr muop, nsa dok mə lep an a kwat nyi." ⁴⁴ Mən lang gǝkaa shakɓəlǝp nɗǝgǝn ləwap dau gǝyil Yahudiya.