¹ Nɗəgən yii wu sarkaapaat nung shilong Kaisar Tibariyus—shiwu Buntus Bilatus a gwopna Yahudiya, Hiridus a long Galili, emnəgən muup Filibus a long ngan yil Ituriya gə Trakonitis, Lisaniyas zak a long Abilini, ² a yii ndung Hanana gə Kayafa muop a mǝndaawang wukǝkagat—ɓəlep Naan wul dər Yahaya wu a laa Zakariya hǝ ngəgər. ³ Mwaan nɗəgən saryil Urdun dip, nyi fu shakɓəlep kən gə bat dǝr kon wubias. ⁴ Kabi ndung mǝ ran nɗəgən bang-byiran Ishaya wukaafung hǝ, "Ɗəgəl gurum wu fu yongpe gənaar gəgər, 'Gu myap war Miskagam, gu myap war afe pǝt ɗeer. ⁵ Yong gǝ mə chik pee wu a tugul hǝ dip, mǝn mǝ nsharap pang gǝ lǝɓung ɗepin mǝ wak gǝtal yi, gǝ mǝ myap war wu gǝgǝlong mpǝt ɗeer, pee wu ruak-ruak gǝ waa war, ⁶ mǝn gurum dip gǝ mə naa angkaa nung Naan.'" ⁷ Lat mǝn Yahaya laa gə gurum wukǝrgǝi wu mǝ jya dər muup mpe kən muop yi yen, "Gun jep zem! A wuɗang laa gəgun gu suo fu dǝfil wu kwǝt nwul eh? ⁸ Gu chan jepe ndung gə nyin bat agu, naa yong gu laa dǝrsuk gu yen, 'A Ibrahim a ndaa mu', nsa an fu laa gəgun, Naan gə ɓoot mpe bat pang muop nhǝ mǝ nwak jep Ibrahim. ⁹ Gəɗes hə, mə ɗen sep gwe shi bədər təng. Təng wu gǝ ɓee jep wuret mou ɓǝ gǝ mǝ gap ntak nwus." ¹⁰ Lat mǝn gurum wukǝrgǝi mə nang fu muup mǝ yen, "Ɗe mən yong mə chin a me?" ¹¹ Lap fu muop yen, "Məgwuo nkwət gə ɓyaat vəl, ɓə pǝn gəme ngwuo wu won nnyi hǝ, mǝgwuo wu nyi gə sə ɓǝ chin kam." ¹² Mǝlap gəndung muop zak mə jya dǝr mə kən muop yi, mə laa gǝnyi mǝ yen, "Wusheepee, ɗe yong mə chin a me?" ¹³ Mǝn laa gǝ muop yen, "Gu lap shagal mmaa bii wu mə laa gǝgun mou." ¹⁴ Pak mǝlekɗyel jya mə nang fu muup mǝ yen, "Ɗe mən eh? Gǝ mə chin a me?" Laa gə muop yen, "Gu lap shagal fu məgwuo gǝkagam mou, gu pam mǝgwuo baan mou. Gu chi tookpya gǝ shagal tar agu." ¹⁵ Gurum jet fu lǝngyit naa wul a Kristo yi gwe, mǝ ɗye mǝkat kwǝt Yahaya a Kristo nanyi. ¹⁶ Yahaya lap fu muop dip yen, "An fu kən gun shi am, wu maa an waa kwət nwul, a mak mpe wut teng kogop gǝfe mou. Nyi ji gə kən gun shi Mərip Wuret gə wus. ¹⁷ Gətet gǝfe nyi nsar muup dər fii fiin yi ɗongɗong, mən wagar əksǝ ɗǝk nɗəgən mee. Mǝn lat ɓə nung rip shi wus ndung gə ɗem pit mou hǝ." ¹⁸ Yahaya laa ɓəlǝp karpe mɓəl, mǝn shakɓəlep langship ngurum muop. ¹⁹ Yahaya dok ɓyaal long Hiridus nsa lap Hirodiya, mat emnəgən muup, gə gogot jepe wubias wu Hiridus chan hǝ, ²⁰ mǝn Hiridus təl jepe nanyi lǝ mǝn yaa Yahaya tak nləɓal. ²¹ Shiwu dok mə kən muop dip lat mən mə kən Yesu zak. Lat mǝn nyi fu ɗangnaan dat mǝn gəbətəng ep, ²² mǝn Mərip Wuret sam kaa muup gǝ shishik kabi nung bəlkǝgǝr hǝ, mən mǝ kǝlǝng ɗəgəl gəbətəng yen, "Gə a laa nǝ wu a ɗem hǝ. Took nə pya gə gə." ²³ Yesu dok nyi gǝ yii yagurum gəfu sar mǝn ɓǝm ɓǝlang gǝfe. Nyi (kabi wu gurum mǝ ɗye hǝ) dok a laa Yusufu, laa Heli, ²⁴ laa Matat, laa Lawi, laa Malki, laa Yanna, laa Yusufu. ²⁵ Yusufu a laa Matatiya, laa Amos, laa Nahum, laa Hasli, laa Nagai, ²⁶ laa Maat, laa Matatiya, laa Shimeya, laa Yuseka, laa Yoda. ²⁷ Yoda a laa Yowana, laa Resa, laa Zerubalila, laa Shiyaltiyel, laa Neri, ²⁸ laa Malki, laa Addi, laa Kosama, laa Almadama, laa Er, ²⁹ laa Yeshuwa, laa Aliyeza, laa Yarima, laa Matat, laa Lawi. ³⁰ Lawi dok a laa Saminu, laa Yahuza, laa Yusufu, laa Yonana, laa Aliyakim, ³¹ laa Maliya, laa Mainana, laa Matata, laa Natan, laa Dauda, ³² laa Yesse, laa Obida, laa Bu'aza, laa Salmon, laa Nashon. ³³ Nashon dok a laa Amminadab, laa Adimi, laa Arama, laa Hezruna, laa Peresa, laa Yahuza, ³⁴ laa Yakubu, laa Ishaku, laa Ibrahim, laa Tera, laa Nahor, ³⁵ laa Seruk, laa Pelek, laa Abiru, laa Shela, ³⁶ Shela dok a laa Kainan, laa Arfakzada, laa Shem, laa Nuhu, laa Lamek, ³⁷ laa Metusela, laa Anuhu, laa Yaret, laa Mahalalel, laa Kainan ³⁸ laa Enosh, laa Shitu, laa Adamu laa Naan.