¹ Par me Ɓitnyak mǝn Yesu ɗel gǝnaar mar mǝn jepgǝdǝr muup mǝ tǝlǝng sagar sǝ mǝ nugus gǝsar muop mən mə aar. ² Mən pak Farisiyawa mə yen, "A na gun fu chin bii wu ɗong chin par Ɓitnyak mou eh?" ³ Yesu lap fu muop yen, "Jet gu bil bii wu Dauda dok chin shiwu ɓlak tənyi, muop gə gurum gǝfe mou a? ⁴ Mwaan nlə Naan, mang nawe wusǝsaar mǝn sə, mən pən pak ndaas wu gǝpe gəme gənyi hǝ, mǝ sǝ. Nawe nanyi jet a ndaawang muop dat gǝ mǝ sǝ." ⁵ Lat mǝn laa gǝmuop yen, "Laa Gurum a Miskagam nkaa Ɓitnyak." ⁶ Par nde Ɓitnyak mǝn rə nləwap mən shee gurum muop nnəgən. Me dagwuo wu sar muup wumis ween dok nyi nnəgən. ⁷ Mǝ biiyil muop gə Farisiyawa mǝ lǝngyit muop naa kwǝt yi nɗak mǝgwuo par Ɓitnyak ɓǝ mǝ kat bii wu gǝ mǝ pam nyi. ⁸ Nyi man enɗye amuop mən laa gə dagwuo wu sar ween nanyi yen, "Yagal gə ɗar gənaar gurum dip." Mən dagwuo yagal ɗar nnǝgǝn. ⁹ Yesu laa gǝ muop yen, "A nang mǝbi yi fu gu, ɗong ɗyin mǝ nchin wuret a, mǝ nchin wubis par Ɓitnyak yi, ɗong ɗyin mǝ n-angkaa gurum a, mə nyit gurum ndam yi?" ¹⁰ Lat mən naa muop dip, mən laa gə dagwuo nanyi yen, "Shang sar gə." Mən dagwuo chin kam mən sar muup waa wuret. ¹¹ Dǝfil mang muop, mən mə ɓagalkaa bii wu gǝ mǝ chin gǝ Yesu dǝrshak. ¹² A nɗəgən ɓit muop nanyi mǝn kaa yaa gǝ pang dǝr ɗangnaan. Teer nlǝpar nanyi fu ɗangnaan. ¹³ Ɓit ɓang mǝn yong jepgǝdǝr muup, mǝn tagat sarkaavəl, mǝn yong muop shi jeplep. ¹⁴ Səm jeplep nanyi a Siman (wu yong nyi shi Bitrus hǝ), gə emnəgən muup Andrawus, gǝ Yakubu, gǝ Yahaya, Filibus, Bartilomawas, ¹⁵ Matiu, Toma, Yakubu laa Halfa, gǝ Siman ndung bii mə yong shi Zaloti, ¹⁶ gǝ Yahuza laa Yakubu, gə Yahuza Iskariyoti, wu seet gə Yesu hǝ. ¹⁷ Lat mən Yesu nyit pang nanyi mǝn sam ɗar nleen gə jepgǝdǝr muup kǝrgǝi gə gurum gwet wu mǝ tugat nYahudiya gə Urushalima gə fukong Taya gə Sidon. ¹⁸ Mə jya mpe kələng nyi, nau ɗepin nyi ɗak biiyaa gǝmuop yi. Gurum wudok damwam fu weel muop hǝ mə kagam. ¹⁹ Ko a wuɗa gǝnaar gurum wukǝrgǝi tangkop ɓəm nyi, nsa kamgǝɓǝlǝp ɗak gok dok nyi nshik muup, mən ɗak muop dip. ²⁰ Lat mən naa jepgǝdǝr muup mə yen, "Wuret lang-nkaa gu, gu wu a wupya, nsa yil-long Naan a nəmuk. ²¹ Wuret lang-nkaa gu wu ɓlak tə gun gǝɗes hǝ, nsa ya gu agal. Wuret lang-nkaa gu wu fu wal gəɗes hə, nsa ya gu swar. ²² Wuret lang-nkaa gu kan gurum mə nyangyit gu, mən tagat gun vak gǝnyi gǝnaar muop mǝn mə agas gun nsa Laa Gurum. ²³ Gu chin tookpya par ɓit nanyi mǝn gu paar-na-paar ɗongɓǝt, nsa yong gu kat kopgəshi wuyoon gəbətəng a lengwaar, nsa mə-ndaa muop dok mə chan a kam gə mǝkaafung. ²⁴ Lat nkaa gu mǝlǝlong, nsa mǝ zwaan gun gwe. ²⁵ Lat nkaa gu, gun wu gu agal gǝɗes hǝ, nsa ɓlak she ntə gun. Lat nka gu, gun wu fu swar gǝɗes hǝ, nsa she gu wal ba gu sǝk. ²⁶ Lat nkaa gu, kan gurum dip mə laa wuret kaa gu, nsa dok mə-ndaa muop mə chan a kam mǝkaafung. ²⁷ An fu laa gəgun wu fu kələng an hǝ, gu ɗem wukas gu, mǝn gu chin wuret dər mǝnyangyit gu. ²⁸ Gu lǝng wuret kaa muop wu mǝ lǝng zhirii kaa gu mǝn gu ɗangnaan mpe muop wu mə chinkǝlǝng gǝgun hǝ. ²⁹ Mǝgwuo wu chit gagas gǝ ngan gǝme ɓǝ gǝ bat nde gǝ pǝn nyi. Mǝgwuo wu mang byaat kut agǝ ɓǝ gǝ ɗǝm nyi gǝ byaat samtǝs agǝ mou. ³⁰ Məgwuo wu ɗang məbi fu gə ɓǝ gǝ pǝn nyi. Ɗǝ mǝgwuo mmang məbi gǝgǝ, ɓǝ gǝ nang dǝr fu muup zak mou. ³¹ Bii wu gu tangkop gurum mə chin gəgun, ɓǝ gu chin zak gə muop kam. ³² Ɗə gu ɗem a muop wu mǝ ɗem gun dat, ɓə a me a kopgǝshii gu yi? Mǝchan wubias bii mǝ ɗem a muop wu mǝ ɗem dun. ³³ Ɗǝ gu chan wuret a dǝr gurum muop wu gǝ mə chan wuret dǝr gu dat, ɓǝ a me a kopgəshii gu yi? Mǝchan wubias bii mə chan a kam. ³⁴ Ɗǝ gu pən kaat a ngurum wu gu man yong gǝ mǝ kwat gun dat ɓǝ a me a kopgǝshii gu yi? Mǝchan wubias bii mǝ pǝn kaat mmǝnye muop ɗewar nlat ɓǝ mǝ kwat yi. ³⁵ Gu ɗem mǝnyangyit gu mǝ gu chin wuret mmuop. Ɗǝ gu pǝn kaat ɓǝ gu ɗen en gu gǝkaa kwat mou. A kam ɓə kopgǝshii gu gǝ kwǝt gagam, a kam ɓǝ gu wak jep Wukǝgǝt, nsa nyi gə kaashik bii nyin chinɗong dər gurum wu mə nyang ɗəkyil gə mwǝng muop. ³⁶ Gu wak mǝnaachigir kabi Ndaa gu wu a wunaachigir hǝ. ³⁷ Gu sheep məgwuo mou, ɓǝ gun zak mə sheep gun mou. Gu ɗye wubis kǝ mǝgwuo mou, gun zak gǝ mǝ ɗye wubis kaa gu mou. Gu kon wubis gurum muop, ɓǝ mǝ kon wubis gǝ gu zak. ³⁸ Gu pən ɓǝ mǝ pǝn zak ngun. Yong gə mǝ kat ba nwat—mǝ ntǝrang—mǝn mǝ nɗǝk gǝshii gu. Nsa gonggo wu gu kat bii gǝnyi ngurum hǝ, gǝ mǝ kat a shi nyi ngun. ³⁹ Lat mən laa me ɓəlǝpkwoom gə muop. "Wuvugum gə lang tagam nde wuvugum ah? Ɗyin chin kam ɓə muop dip vəl gǝ mǝ pələp ntugul, a kam mou a? ⁴⁰ Lagǝdǝr gə ma wushee nyi mou. Ɗǝ mǝgwuo nkat karpe nogot ɓǝ waa kabi wushee nyi hǝ. ⁴¹ A na gə fu naa kam shit wu n-yit emnang, ɗe gə ɓoot mpe naa gǝtshep wu n-yit gə mou eh? ⁴² She a shi me gə laa dər emnang gǝ yen, 'Emna ɗagat a shang kam shit wu n-yit gə yi,' ɗe gǝ gǝ kaasak fu naa gǝtshep wu nɗǝgǝn yit gǝ mou eh? Mweng! Yaawar gə shang gǝtshep wu n-yit gǝ ɗewar gə naa pe gǝret ɓə gə shang kam shit wu n-yit emnang. ⁴³ Nsa təng wuret gə sam jep wubaan, ɗǝ tǝng wubaan sam jep wuret yi mou. ⁴⁴ Gǝ mǝ man təng a shi jep wu gǝ sam hǝ. Gurum bii mə tǝlǝng jep wut shi tǝng nǝkyen mou, gǝ mə kat jep shiwoo shi tǝng la-er mou. ⁴⁵ Gurum wukər gǝ chan a jepe wuret wu nyi mɓǝt muup hǝ, gugurm wubis gǝ chan a jepe wubis wu nyi mɓǝt muup hǝ. Nsa lǝfu wu gǝ pǝt nfu gurum tong a mɓǝt. ⁴⁶ A me saa gun fu yong an shi 'Miskagam, Miskagam,' ɗe gu chan jepe wu a laa mou yi? ⁴⁷ Gurum wu ji dər nə, mǝn kələng lǝfu gǝnǝ mǝ chin ɓǝlang gǝnyi, gǝ a kok wupin nyi a kang a gǝ bii wu an gǝwar laa hǝ. ⁴⁸ Nyi a gǝbi gurum wu badǝr ɗyik lə, mǝn ok yil jong-jong she ɓuǝt kugur gǝpang. Am pǝt nkong, mǝn liis am rǝ nlə nanyi mən ship mou nsa ɗyik ɗong. ⁴⁹ Ɗe gurum wu kələng ləfu gǝnə mən chin ɓəlang gənyi mou, ɓǝ nyi a gəbi mǝgwuo wu ɗyik lə gə ees nǝ nkugur. Liis am wu pǝt nkong hǝ ɓǝm nyi dat, gǝ laa mou, mǝn rugup wagap kweet."