¹ Njambi wendekele kuli Mosesa kuje ku byana bya Mowambu kungenge ya Yondau ku Yeliko ngwendi, ² "Kambeya banu ba Isalela mangana bane bimbathzubwila byabo bimo bya lifuti kuli ba Lebi. Batela kubana binganda bya kuyoyelamo na lifuti lya mwila waubwa bya kuthzenguluka bije binganda. ³ Ba Lebi bakakala nebi binganda bya kuyoyelamo. Lije lifuti lya mwila likakala lya bingombe babo, bimanga byabo, na bimuna babo bakwabo. ⁴ Lije lifuti lya mwila likathzenguluka bije binganda ebi mukana ba Lebi byatela kutunda ku chimpaka changanda nunda yakweta likulukathzi limo lyama kyubiti kuya mwoshemwoshe. ⁵ Mwatela kwetheka binunda byakweta makulukathzi abali ama kyubiti kutunda hanja ya nganda kuje kumutambela wa ngangela, na makulukathzi abali ama kyubiti kumutambela wa shango, na makulukathzi abali ama kyubiti kumutambela waku kangombe kayambi, na makulukathzi abali ama kyubiti kumutambela waku kunto. Echi chikakala chela cha mwila wamubi nganda. Binganda bikakala mukati. ⁶ Binganda bitanu naimo ebi mukana kuli ba Lebi byatela kupanga ngwe binganda bya kubandamo. Mwatela kulingitha ebi byela kukala mwakutewela munu ou nathsiyi mukwabo. Bwahetheni lalo binganda bikwabo bya kweta ku makumi awana na abali. ⁷ Cho binganda ebi mukana ba Lebi biketa makumi awana na atanu na atatu. Mwatela kwana na myela ya mwila kuli bakebo. ⁸ Miyati yakama ya banu ba Isalela, miyati ije ili na lifuti lyakama, yatela kwana binganda byabingi. Miyati yaidondo ikana binganda byabindondo. Muyati woshe watela kwana ba Lebi kwetheketha na mbathzubwila eyi batambwile." ⁹ Cho Njambi wendekele kuli Mosesa ngwendi, ¹⁰ "Endeka kubanu ba Isalela ngwobe, 'Omu mukajabuka Yondau kukobela mu lifuti lya Kanana, ¹¹ cho mwatela kushakula binganda bipange ngwe binganda bya kubandamo kuli yeni, mwela oku munu ou nathsiyi mukwabo chakujeneka kuthzibuka natha kutewela. ¹² Ebi binganda byatela kukala mwakubanda kutunda ku baka kumwilwithilamo, mangana uje mukamulonga bonowe kumuthsiya chakujeneka kwimana nakumuthompetha kumesho a ndandanga. ¹³ Mwatela kushakula binganda bitatu naimo kukala nganda ya kubandamo. ¹⁴ Mwatela kubwahetha binganda bitatu halyala na Yondau na bitatu mulifuti lya Kanana. Bikakala binganda bya kubandamo. ¹⁵ Bya banu ba Isalela, bya maitandinda, bya munu woshe anakuyoyela mukati keni, ebi binganda bitanu naimo bikapanga ngwe mwakubanda oku munu woshe athsiya mukwabo chakujeneka kuthzibuka akatewela. ¹⁶ Oloni muka mulonga napupu mukwabo na chuma chachikubo, cho uje mukwabo athsa, cho uje muka mulonga napu muka kuthsiya bene. Atela bene kumwaka ku kuthsa. ¹⁷ Oshe ngwe muka mulonga apupa mukwabo na limanya lili muliboko eli lyatha kuthsiya mukwabo, cho nga ou mukwabo athsa, cho uje muka mulonga napu mukakuthsiya. Atela bene kumwaka kukuthsa. ¹⁸ Oshe ngwe muka mulonga apupa mukwabo na chitwa chachiti echi chatha kuthsiya mukwabo, cho nga mukwabo athsa, cho uje muka mulonga napu bene mukakuthsiya. Atela bene kumwaka kukuthsa. ¹⁹ Baka kwilwitha bubi ku maninga batela kumwaka mukakuthsiya kukuthsa. Omu aliwana nendi, baka kwilwitha bubi ku maninga batele kumwaka ku kuthsa. ²⁰ Oshe ngwe apupa mukwabo mu chithzindo nambe ombila chuma kuli ikeye, hathimbu banabanda mangana bamukwate, mangana uje mukwabo athse, ²¹ Nambe nga amupupila hathi mu chithzindo na maboko endi chinenetha mukwabo kuthsa, cho uje mukamulonga namupupile chili bene atela kumwaka mukuthsa. Napu mukakuthsiya. Uje muka kwilwitha bubi ku maninga natha kukwaka uje mukakuthsiya mu kuthsa omu aliwana nendi. ²² Oloni oshe ngwe muka mulonga mukukathumuka apupa mukwabo chakujeneka kuchithinganyekela muchithzindo nambe kumbila chuma chili choshe echi chipupa uje mukwabo chakujeneka kashulubala mukubandamena ²³ nambe ngwe amwasha na limanya lije likatha kuthsiya mukwabo chakujeneka kumona mukwabo, cho uje muka mulonga kakele muka n'ole yendi; kakele nakwetheka kubulumuna mukwabo. Oloni ebi bikebyo byakulinga ngwe uje mukwabo athsa. ²⁴ Mungiloyo, ndandanga ikayula mukati ka muka mulonga na muka kwilwitha bubi bwa maninga kutetha neli lishiko. Ije ndandanga yatela kuyobola uje muka mulonga kunthzili ya muka kwilwitha bubi bwa maninga. ²⁵ Ije ndandanga yatela kwilwitha uje muka mulonga ku nganda yakubandamo oku atewelele hakulibanga. Atela kuyoyela kuje kweta nomu kapilisitu wahelu aliho akathsa, ou bawabethele na mathzi akuthzila. ²⁶ Oloni oshe uje muka mulonga akaya kutubakana nginga ya nganda ya kubandamo oku atewelele, ²⁷ cho uje muka kwilwitha bubi bwa maninga akamuwanena hanja lya nginga ya nganda yakubandamo, cho oshe akathsiya uje muka mulonga, uje muka kwilwitha bubi bya maninga kakakala namulonga wa kuthsiya. ²⁸ Mwafwa ou muka mulonga watelele kutumbama munganda ei yakubandamo kweta nakukuthsa cha kapilisitu wahelu. Hanima ya kuthsa cha kapilisitu wahelu, uje muka mulonga atela kwiluka ku lifuti oku akala na byuma byendi. ²⁹ Awa mashiko atela kukala akukabangeya kuli yeni kwita mu bikota bya banu beni boshe mu byela byabo byoshe muje muyoyela. ³⁰ Ou woshe akathsiya munu ali woshe, uje mukakuthsiya atela kumuthsiya, ngwe omu bakambulila kwitila mu majwi a bakaleho. Oloni majwi a mukaleho umo kuwapandele kunenetha munu kumwaka mukuthsa. ³¹ Lalo, kumwapandele kutabela fwto hamulonga wa mukakuthsiya ou nathsi na mulonga wa kuthsiya. Atela bene kumwaka mukumuthsiya. ³² Kumwapandele kutabela fweto hamulonga wauje natewela ku nganda yakubandamo. Mungilei kumwapandele kumutabetha kukala na nthzili ha bikwata byendi kweta nomu kapilisitu wahelu akathsa. ³³ Kethi mukabihithe lifuti omu mukayoyela mungilei, mwafwa maninga akuthsiya akabihitha lifuti. Kukwethi mulambu wabubi ou unatha kwanena ha lifuti oshe ngwe maninga banawetilila halikelyo, kubanga namaninga auje na wetilile. ³⁴ Cho kethi mukabihithe lifuti omu mukayoyela mwafwa njili nakuyoyelamo. Yange, Njambi, njikayoyela mu kati kabanu ba Isalela."'