¹ Cho ntwama wabinanga bya bakulu ba shoko ya Ngiliyandi muna Makiya (ou wakele muna Manase), aba batundile ku shoko ya chithemunwina cha Yosefa, bethzile nakwendeka kumesho a Mosesa na kumesho aba ntwama aba bakele bakwimanena binanga bya bakulu ba banu ba Isalela. ² Bendekele ngwabo, "Njambi wamikambeyeye, ou shukwanana, kwana mbathzubwila ya lifuti kwitila mu lyongo ku banu ba Isalela. Bamikambeyeye kuli Njambi kwana mbathzubwila ya Zelofehandi ndolome yetu kuli banabendi babanakathzi. ³ Oloni oshe bana bendi babanakathzi bakashomboka ku banalume mumu yati weka bamu banu ba Isalela, cho mbathzubwila yabo ya lifuti bakaitunditha kutunda ku mbathzubwila yabakulu betu. Bakabyakela ku bimbathzubwila bya miyati eyi bakalinunga nayo. ⁴ Mukulinga ngechi, bakaitrunditha kubimbathzubwila bya buswana bwetu. Mungiloyo, omu mwaka wakubwahelela cha banu ba Isalela chiketa, cho mbathzubwila yabo bakainunga ku mbathzubwila ya muyati uje bakalinungunawo. Mungilei, mbathzubwila yabo bakaitambula kutunda ku mbathzubwila ya muyati wa bakulu bendi." ⁵ Cho Mosesa wanene kukambeya ku banu baba Isalela, kwetheka na lijwi lya Njambi. Wendekele ngwendi, "Ebi muyati wa chithemunwina cha Yosefa chendeka binapu bya buthunga. ⁶ Ebi bikebyo Njambi nakambeya kutetha na bana babanakathzi ba Zelofehandi. Nendeka ngwendi, 'Becheleni bashomboke kuli ou bathinganyeka kulonga, oloni batela kushomboka kuli muka muyati washoko yaba ishe.' ⁷ Kukwethi mbathzubwila ya banu ba Isalela yatela kwalumuna kutunda kumuyati umo kuukwabo. Umo na umo ku banu ba Isalela napande ku twalelela na mbathzubwila ya muyati wa bakulu bendi. ⁸ Munakathzi woshe wa banu ba Isalela ou akala na mbathzubwila mumuyati wendi napande kushomboka kuli munu atunda ku shoko ya muyati waba ishe. Echi chili ngachije mangana munu woshe wa banu ba Isalela akakale na buswana kutunda ku bakulu bendi. ⁹ Kukwethi mbathzubwila ikatengulula maboko kutunda ku muyati umo kuukwabo. Muu woshe wa miyati ya banu ba Isalela napande kunyunga buswana bwendi ibenya." ¹⁰ Cho bana babanakathzi ba Zelofehandi balingile bene ngwe omu Njambi wakambeyeye Mosesa. ¹¹ Mala, Tiriza, Hongula, Milika, na Noma, bana babanakathzi ba Zelofehandi, bashombwele chithemunwina cha Manase. ¹² Bashombwele mu shoko ya chithemunwina cha Manase muna Yosefa. Mungilei, buswana bwabo bathalele mumuyati kuje shoko yabaishe ya kele. ¹³ Ebi bikebo bikambeyo na mashiko awa Njambi wanene Mosesa ku banu ba Isalela mu byana bya Mowambu kungenge ya Yondau ku Yeliko.