¹ Cho Njambi wendekele kuli Mosesa ngwendi, ² "Kambeya banu ba Isalela na kwendeka kuli bakebo ngwobe, 'Omu mukakobela lifuti lya Kanana, lifuti eli likakala lyeni, lifuti lya Kanana na binginga byabo, ³ nginga yeni yakushango katunda ku mambo yaku Zini kwita munginga ya Endoni: Ngangela ha chipalo chije chakumina kushongo ya kalunga ndonga wa mungwa. ⁴ Nginga yeni ikatengulukila kuya ku shango kutunda kuli lundu lya Aklambimu na kutunda mukati ka mambo ya Zini. Kutunda haje, iketa mu shango ya Kandeshi Nbaniya na kutwala ku Haza Ande kweta ku Azimoni. ⁵ Kutunda kuje, nginga ikatenguluka kutunda ku Azimoni kushatukila ku tundonga twa Ingitu na kuyikambeyeya kweta ku kalunga ndonga. ⁶ Nginga yaku kangombe kayambi ikakala mu chipalo cha ngenge ya kalunga ndonga wakama. Eyi ikakala nginga yeni yaku kangombe kayambi. ⁷ Nginga ya kunto kweni yiketa mu chipalo echi mukapula kutunda ha kalunga ndonga wakama kuya ku munkinda wa Ho, ⁸ cho kutunda ku munkinda wa Ho kuya ku Lebo Hamati, cho kuya ku Zendandi. ⁹ Cho nginga ikatwalelela ku Zifuloni nakukumina ku Haza Enani. Eyi yikakala nginga yaku kunto yeni. ¹⁰ Cho mwatela kupula nginga yeni yaku ngangela kutunda ku Haza Enani kuthikumuka shango ku Shefamu. ¹¹ Cho nginga yaku ngangela ikatunda ku Shefamu kweta ku Rimbula, mutambela wa ngangela ya Ayini. ¹² Nginga yikatwalelela kwita ngangela ya kalunga ndonga wa Kinereti. Ije nginga ikatwalelela kuya shango ya ndonga wa Yondani kuya ku kalunga ndonga wa mungwa nakutwalelela kuthikumuka nginga wa mungwa. Eli likakala lifuti lyeni, kukabangeya binginga binalithzenguluka." ¹³ Cho Mosesa wakabangeyeye banu ba Isalela na kwendeka ngwendi, "Eli likelyo lifuti mukatambula kwitila mukuta lyongo, eli Njambi na kambeya kwana ku miyati itanu naiwana naku mbathzubwila ya muyati. ¹⁴ Muyati wa chithemunwina cha Lubeni, kukabangeya ku kwana cha byuma ku miyati yaba bakulu babo, na muyati wa chithemunwina cha Ngandi, kukabangeya ku kwana cha byuma ku mishobo yaba kakulwila babo, na mbathzubwila ya muyati wa Manase boshe banatambula lifuti lyabo. ¹⁵ Ije miyati ibali naije mbathzubwila ya mushobo banatambula mbathzubwila ya lifuti ku jomboka Yondani ku Yeliko kuya ku ngangela, kutala ku mwijatangwa." ¹⁶ Njambi wendekele kuli Mosesa ngwendi, ¹⁷ "Awa akeo mathzina a banalume aba bakapanga lije lifuti lya buswana bweni: Eliyaza kapilisitu na Yoshuwa muna Nune. ¹⁸ Cho watela kushakula ntwama umo kutunda ku muyati woshe bakapange lifuti lya miyati yabo. ¹⁹ Awa akeo mathzina abanalume: Kutunda ku muyati wa Yunda, Kalembu muna Jefune. ²⁰ Kutunda ku muyati wa chithemunwina cha Simiyone, Shemweo muna Amihundi. ²¹ Kutunda ku muyati wa Mbenjamini, Elindandi muna Kisiloni. ²² Kutunda kumuyati wa chithemunwina cha ntwama Ndani, Buki muna Njongili. ²³ Kutunda ku chithemunwina cha Yosefa, ku muyati wa chithemunwina cha ntwama Manase, Haniyeo muna Epondi. ²⁴ Kutunda ku muyati wa chithemunwina cha ntwama Efulemu, Kemuweo muna Shifutani. ²⁶ Kutunda ku muyati wa chithemunwina cha ntwama Zembuluni, Elizafani muna Palanaki. ²⁵ Kutunda ku muyati wa chithemunwina cha ntwama Isaka, Palitio muna Azani. ²⁷ Kutunda ku muyati wa chithemunwina cha ntwana Asha, Ahihundi muna Shelomi. ²⁸ Kutunda ku muyati wa chitheminwina cha ntwama Nefatali, Pendaleo muna Amuhundi." ²⁹ Njambi wakambeyeye aba banalume bapange lifuti lya Kanana nakwana muyati na muyati waba Isalela mbathzubwila yabo.