¹ Cho omwo wathzile Yesu ngwe ba Fakliseo bathzibile ngwabo wakele na kutabetha hamo nakumbwitika bandongethi babangi kutubakana Yowano. ² (nambe Yesu babenya kakele na kumbwitika,oloni bandongethi bendi bakebo), ³ Watundile ku Yuleya na kwiluka lalo ku Ngalileya. ⁴ Oloni chakele chachibwa kuli ikeye kwitila mu Samaliya. ⁵ Cho wethzile mumbaka ya Samaliya,limbo bathana ngwabo Sikale,kuyehi na lihya eli Yakomba wanene munendi Yosefa. ⁶ Na lithima lya Yakomba lyakele kujebene. Yesu wajukile na bungethzi na kutumbama kuje ku lithima.Chakele hathimbu ya mukati kalitangwa. ⁷ Cho munakathzi kasamaliya wethzile na kutekula mema,cho Yesu wendekele kuli ikeye ngwendi, "Njaneko mema njinwe." ⁸ Mwafwa bandongethi baile mu mbaka na kuya na kulanda bya kulya. ⁹ Cho uje munakathzi waka samaliya wendekele kuli ikeye ngwendi, "Chikala bati yobe,ka Yuleya,yange ka Samaliya,kukwana bya kunwa?" Mwafwa ba Yuleya kubethi kuli thzibathana naba Kasamaliya. ¹⁰ Yesu wamukumbulwile na kwendeka kuli ikeye ngwendi,"Nga,ou alinakwendeka kuli yobe ngwendi,'Njaneko mema,' ngwe unamulombo,cho ngwe na kwana mema a mwonyo." ¹¹ Uje munakathzi wendekele kuli keye ngwendi, "Mwata,kumwethi na mungomo cho na lithima lya kuloba. Cho mema a mwonyo uwawana kuli? ¹² Yobe kuwahyanene,indi,kutubakana tatetu Yakomba,ou watwanene eli lithima na kunwamo babenya,ngwe omu banwine bana bendi na bimuna byendi?" ¹³ Yesu wakumbulwile na kwendeka kuli ikeye ngwendi,"Ou woshe anwa ku mema awa akathziba lihwila lalo, ¹⁴ oloni ou woshe akanwa ku mema anji mwana kakathzibiho lihwila lalo. Mwafwa,mema anjimwana akakala lithima lya mema muli ikeye,likakeluka kweta ku mwonyo waya myaka." ¹⁵ Uje munakathzi wendekele kuli ikeye ngwendi, "Mwata,njaneni awa mema mangana njikahonowe kuthizba lihwila na kulikela kwija na kutekula mema." ¹⁶ Yesu wendekele kuli ikeye ngwendi,"Ya,ukathane munalume wobe,mwiluke kuno." ¹⁷ Uje munakathzi wamukumbulwile na kwendek kuli ikeye ngwendi, "Kunjethi na munalume." Yesu wamukumbulwile,"Chili unendeka buthunga bwino ngwobe, 'Kunjethi na munalume,' ¹⁸ Mwafwa wakele na banalume batanu,cho ou ulinendi kethi munalume wobe. Ebi biunendeka bya buthunga." ¹⁹ Uje munakathzi wendekele kuli ikeye ngwendi, "Mwata,njinamono ngwange ukapolofita. ²⁰ Ba tatetu balemethelele Njambi hamunkinda ou,oloni unakwendeka ngwobe banu batela kulemethele Njambi ku Yelusalema." ²¹ Yesu wendekele kuli ikeye ngwendi, "Njikulahele,obe munakaathzi,ngwe thimbu inakwija omu kumukalemethela Njambi ha munkinda ou nameme ku Yelusalema. ²² Mukalemetha ebi kumukathzubuka. Tukalemetha ebi tuthzibuka,mwafwa kwoboka chatunda kuli ba Yunda. ²³ Nambengocho,thimbu ina kwija,cho inobene,omu bakakukulahela ba buthunga bakalemetha Tate mu munthzinthzime na buthunga,mwafwa Tate anakutonda banu bachifwechi bakele baka kumulemetha. ²⁴ Njambi wapwa munthzinthzime,cho na banu aba bakakumulemetha ba mulemetha mu munthzinzthime na buthunga." ^{25 26} Uje munakathzi wendekele kuli ikeye ngwendi, "Njathzibuka ngwange Mesiya alina na kwija (ou bathana ngwabo Kilisitu). Omu akaija akalumbununa byuma byoshe kuli yetu." Yesu wendekele kuli ikeye ngwendi, "Yange bene,ou anakwendeka kuli yobe." ²⁷ Hathimbu ije bandongethi bendi belukile.Cho bakele na kuliyongola mwomu bikajo wakele nakwendekela nauje munakathzi,oloni naumo wahi wendekele,ngwendi, "Unakutonda bika?" nambe "Bika unakwendeka nendi?" ²⁸ Cho uje munakathzi wathethzele bindeho byendi bya mema,welukile mu mbaka,na kwendeka kubanu ngwendi, ²⁹ "Ijeni,mumone munu na njileketha byoshe ebi njalinga. Ou katha kupwa Kilisitu.Indi?" ³⁰ Bathethzele mbaka na kwija kuli ikeye. ³¹ Muthimbu imolika,bandongethi bakele na kumuleka,ngwabo, "Mukakulongetha, Lyaa." ³² Oloni wendekele kuli bakebo ngwendi, "Njili na bilya bije kumwatha kumwatha kuthzibukile." ³³ Cho bandongethi bendekele kuli umo na mukwabo ngwabo, "Kukwethi umo na munenela bimo bya kulya,bananenendi?" Yesu we ³⁴ Yesu wendekele kuli bakebo ngwendi, "Kulya kwange kulinga kushaka kwa uje wanjitumine na kumanetha bipangi byendi. ³⁵ Yeni kumwethi kwendeka ngweni, "Kunathala bingonde biwana na kweta kukuteja'? Njinakwenda kuli yeni ngwange, kengeni bwino mumone mahya,mwafwa anahi laja kweta kukuteja! ³⁶ Ou woshe anakuteja akatambula fweto na kukungulula bushuka bwa mwonyo wa myaka yoshe,mangana ou akakubu nou akateje baka bwahelele hamo. ³⁷ Mwafwa muli echi bendeka ngwabo,'Umo akuba,cho mukwabo ateja,' chabuthunga. ³⁸ Njamitumine kuteja ebi kumwapangelele. Beka bapangele,cho munakobela mu nthzili ya kupanga kwabo." ³⁹ Baka Samaliya babangi mu mbaka bamukulahelele ha mulonga wathzimbu uje bambulwile kuli uje munalkathzi, "Nanjileke byoshe ebi njalinga." ⁴⁰ Cho omu baka Samaliya bethzile kuli ikeye,bamulombele kutumbama na bakebo, cho watumbamene nabo matangwa abali. ⁴¹ Cho bakwabo babengi bakulahelele ha mulonga wa lijwi lyendi. ⁴² Bendekele kuli uje munakathzi ngwabo, "Kutwethi na kukulahela lika yetu unendekele,mwafwa tunalithzibila yetu babenya,cho tunathzibuka ngwetu ou ikeye mwabole wa lifuti bene." ⁴³ Hanima ya aje matangwa abali,watundileko na kuya ku Ngalileya. ⁴⁴ Mwafwa Yesu babenya wa lumbunwine ngwendi kapolofita kethi na kathingimiko mu lifuti lyendi. ⁴⁵ Omu wetele mu Ngalileya,baka Ngalileya bamutambwile bwino. Bamwene byuma byoshe bije walingile mu Yelusalema kuje kuchilika,mwafwa na bakebo lalo baile kuchilika. ⁴⁶ Cho welukilelalo ku kana kuje mu Ngalileya,muje wakatengulwile mema kupwa binyu.Cho kwakele umo mukabipangi wa kwonoka ou wakele na munendi wabinjile muje Mukapenauma. ⁴⁷ Omu wethzile ngwabo Yesu anija ku Ngalileya kutunda ku Yundeya,waile kuli Yesu na kumulomba kuthikumuka na kukangula munendi,ou wetele hayehi na kuthsa. ⁴⁸ Cho Yesu wendekele kuli ikeye ngwendi, "Kubanga umone bimwetho na byakukomwetha, kuwatha kukulahela." ⁴⁹ Uje muka biapngi wendekele kuli ikeye ngwendi, "Mwata,thkumukeni thimbu kanda munange athse." ⁵⁰ Yesu wendekele kuli ikeye ngwendi, "Ya.munobe ali na mwonyo." Uje munalume waakulahelele lijwi lije Yesu wendekele kuli ikeye,cho waile. ⁵¹ Thimbu wakele nakuya na kuthikumuka,bangamba bendi baliwanene nendi,bendekele kuli ikeye ngwabo munendi ali na mwonyo. ⁵² Cho wabehwile thimbu muka na putukile kuthziba bwino. Bamukumbulwile ngwabo, "Ithzau ha thimbu ya kati kamutwe lithika linamutundilemo. ⁵³ Cho ishe wathzibukile ngwendi hakehobene hathimbu imolika Yesu wendekele kuli ikeye ngwendi, 'Munobe ali na mwonyo,'' Cho ikeye babenya na njubo yendi boshe bakulahelele. ⁵⁴ Echi chakele chimwetho cha muchibali echi walingile Yesu omu watundile mu Yuleya kuya mu Ngalileya.