¹ Ngachije twatelelela kwakako mangana nameme kuli ebi tunathzibi,mangana twonowe kuhangumuka na kutundako. ² Mwafwa nga muthzimbu ou bendekele kwitila muli tungelo ulumbunuke nakupwa wakukulahela,cho kujeneka kukabangeya na kwononoka kwoshe bikatambule kuthzangametha, ³ cho batijo watha kupanduka nga tuliula bwoboke bwakama ngechi? Obu bukebwo bwoboke buje bathzimbile kuli Shukulu na kubutabela kuli abje babuthzibile. ⁴ Muthimbu imolika Njambi wabithzimbwile kwitila mubimwetho,bithinganyeka,na bikomoketho bya kulyandununa amundthzindthzime wakuthzila kutetha na kushaka kwendi. ⁵ Mwafwa Njambi kakele tungelo kuswana kaye aka kakaija,aka tulinakwendekaho. ⁶ Olojo munu umo kuchela chikwabo wathzimbwile,ngwendi, "Munu chuma muka,hakupwa mwakele bithinganyeka byeni hali ikeye? nameme Muna Munu,nambe akale wa kumulwila? ⁷ Watangele munu mwithi ya tungelo;wamuthzikile bumpahu na bulemu. ⁸ Wakele byuma byoshe kuthi ya mendi endi akale wakubiswana." Mwafwa Njambi wanene byuma byoshe kuli ikeye. Cho kathethzeleho chuma nambe chimo chahi. Oloni thimbu ino kutwamwene byuma byoshe kubiswana kuli ikeye. ⁹ Oloni tunakumona ou bakele mwithi ya tungelo hakathimbu kakandondo,Yesu,kumuthzika chilongo habumpahu na kulema hamulonga wakuyanda na kuthsa kwendi,linga kwitila muchikeketima cha Njambi akumone kuthsa hamulonga wa munu woshe. ¹⁰ Mwafwa chakele chakutela kuli Njambi,mwafwa byuma byoshe biliko hamulonga wendi cho kwitila muli ikeye,akanene bana babangi kubumpahu. Chakele cha kutela kuli ikeye kumupwitha mukakunena bwoboke bwakushula kwitila mu kuyanda kwendi. ¹¹ Hali boshe ou akajeletha cho na baje banajeletha buli na Ishabo umolika. Cho kathzibi shwamwa kubathana ngwendi bandolome. ¹² Akendeka ngwendi, "Njikathzimbula lithzina lyobe kuli bandolome bange,na kwimba hali yobe mukati ka kukunguluka." ¹³ Cho lalo, "Njikakulahela muli ikeye," Cho lalo, "Kenga,yange uno na bana ba Njambi aba nanjana." ¹⁴ Ngachije, hakukala bana bakalipangela kumbila na maninga,na ikeye wapangele bije byuma mungila imolika,linga kwitila mukuthsa akanyongethe uje wakala na ndthzili ya kuthsa,ou napu,lyabolo. ¹⁵ Echi chakele ngechi mangana akathzitule boshe baje bayoyelele mu bundungo kwitila mu lyoba lya kuthsa. ¹⁶ Mubuthunga kakwathele tungelo,olojo chikota choshe cha Abilhama. ¹⁷ Cho chakele chakutamo kuli ikeye kukala ngwe ndolome yabo mubingila byoshe,mangana akale kapilisitu wahelu washula na ng'eke na likulahelo kwetheka na byuma bya Njambi,cho mangana akakale wakuthambetha bubi bwa banu. ¹⁸ Mwafwa Yesu babenya wayandele cho bamwethekele,natha kukwatha baje bali na kwethekamo.