¹ Vuno Saul, kanda kuhandeka majui a ku teuetha na kutumbuila kuthsa ku vandonge va Muene, na ku ya kuli sasendote uakama ² na ku mulomba mikanda ya vi sinangonga via mu Ndamasiku, linga amba aka uana mo umo ua pandamene ku ngila, nambe vamala ndi vakenu, kuatha ku ka vaneha ku Yelusalema. ³ Omo uayile mungila, via sholokele nguavo muakele muhehi na Ndamasiku, ha vuathi kua sholokele kuli yakeye ceke ca kutunda muilu; ⁴ keho ua uililile hamavu an kuvua lijui kuhandeka nendi, "Saulu, Saulu, vika uli naku nji yandethela?" ⁵ Saulu ua kuaniene ko, "Yove yiya, Mwene?" Mwene nguendi, "Yange Yesu, yoli na ku yandetha; ⁶ vuno hinduka, kovela muimbo, keho vaka viku leka vio napande ku panga." ⁷ Vamala vendele na Saulu vemanene kuulu, kuvua lijui, vuno nou yova mona uahi. ⁸ Saulu oshe ua hindukile hamavu, mueshukile mesho endi, viahi viathele ku mona; keho va muendetha ku livoko na kumuneha mu Ndamasiku. ⁹ Ha matangua atatu uakele kapuputua, na ku jeneka kulia na kunua. ¹⁰ Keho kuakele ndongethi ku Ndamasiku ua lidhina Annania. Mwene ua handekele nendi mu cimona, "Annania!" ua handeka nguendi,, "Tala, yange uno, Muene." ¹¹ Muene ua handekele nendi, "Hinduka, na kuya ku ngila ya kutumbula ya kushungama, na kunjivo ya Yunda kehule mumala ua ku tunda ku Talusu ua lidhzina Saulu, endi ali na ku vundila. ¹² Ua mona mu cimona mumala ua lidhzina Annania eja na ku kambeka mavoko endi hali yakeye, linga amone lalo." ¹³ Vuno Annania ua kuaniene ko, "Muene, njovua ku vavengi via mumala ou, kuyandetha cingahi cije canatha ku panga hali vantu vove va kulela mu Yelusalema. ¹⁴ Ali na ndhzili ya ku tunda ku mukuluntu ua va sasendote a kuate uoshe uje a thana lidhzina liove muno." ¹⁵ Vuno Muene nguendi, "Kaye, mukonda endi napu citenga cange ca ku hangula, a kambate lidhzina liange kulutue lua va kavifuti na vimiene na ku vanike va mu Isaleli; ¹⁶ mukonda ange njika mu leketha kayando kanapande ku mona omo lidhzina liange." ¹⁷ Keho Anania ua tundileho, ua kovelele munjivo. Ua mukambekele mavoko, naku kuania nguendi, "Muna nana Saulu, Muene Yesu uje ua naku jombolokelele mungila. Nanji tumu linga umone lalo hamo nakushula na Mpundhi yaKulela." ¹⁸ Haje vene kumesho endi kua lalumukile mavanda mukemo ua shangumukile kumona, ua katukile ngeci va mu mbuitikile. ¹⁹ Omo ua lile ua uanene ndhili. Ua kele matangua hamo nava ndonge va Yesu ku Ndamasiku. ²⁰ Kutunda haje vene ua ambuluile via Yesu munjivo yaku lombela nguendi Yesu ikeye muna Kalunga. ²¹ Keho voshe vamuvuile vakomokele naku handeka nguavo, "Ou keti ikeye ou ua shuamangeyele vandonge va Yesu mu Yelusalema nakuvathsiha vaje va ambuluile mu lidhina lia Yesu? Ndi ngeci neja kuno linga aku vakute naku va tuala ku vasasendote vakama." ²² Vuno ngeci mukemo Saulu ua likaniamekele muakama nakushula na ndhili yakama, ua payathele va Yundeya voshe vakele muNdamasiku muku muetha nguavo ou ikeye Yesu Kilistu. ²³ Kunima ya matangua, va Yundeya va likunguluile linga vamu thsihe. ²⁴ Vunoni vututumbe vuavo vua jombolokele kuli Saulu. Ngeci vaniungile mapito alimbo kuvuthsiki na mutania linga vamu thsihe. ²⁵ Vuno vandonge va Saulu vamu tambuile vuthsiki vamu hakele mu civuvi mukemo vamu kokelemo mu civuvi. ²⁶ Omo ua ile ku Yelusalema, Saulu uethekele mu ku livandakana nava ndonge, vunoni voshe vakele na liova nendi, ngeci kuvetavele nguavo nendi umo ua vandonge. ²⁷ Vuno Mbalambasa ua mu tambuile va munehele kuli vapostolo, keho ua va ambuluilile vati Saulu ua muene Muene mungila yendi, keho ngecije ua handekele nendi, nomo endi ua ka ambuluilile naku thimpa ku Ndamasikumu lidhina lia Yesu. . ²⁸ Endi uakele navo, mu ku kovela naku tuhuka mu Yelusalema yoshe. Ua ambuluile naku thimpa mulidhina lia Muene Yesu, keho ua ambuluile na ²⁹ kulidhunga vimpata nava Yundeya va kuvaNgelengu; vuno vakevo va tualelele mukuetheka kumu thsiha. ³⁰ Keho va munaina muva vidhivukile evi, vamu tualele ku Sesaliya nakumu tuvakanetha ku Talusu. ³¹ Ngecije lukungulukilo luoshe lua mu Yundeya, Ngalileya, na Samaliya va kele na civovo lua litungithile, na kuenda muliova lia Muene na muku lembedhieka ca Mpundhi ya Kulela, lukungulukilo lua lanene. ³² Keho ngeci ca lingile ngecije , omo Petulu uendanganene kuoshe, ua hetele lalo kuli vakua kulela va kele ku Linda. ³³ Kuje ua uaneneko muntu umo ua kuluka Enease, ikeye ua kele ku muhela uendi miaka itanu na itatu, muomu endi ua puile mukua kalepa. ³⁴ Keho Petulu ua mulekele nguendi, "Enease, Yesu Kilistu aku kanguitha. Katuka naku jala muhela uove," Keho haje vene ua kangukile. ³⁵ Keho voshe va kele mu Linda na mu Salone va muene uje mumala keho va tengulukile kuli Muene. ³⁶ Vuno ku Yopa kua kele ndonge umo ua kuluka Tambita lia lunduluka ku tumbula Ndolokase. Mukentu ou uakele na vipanga via cili na vuana vua ngodhi vua lingile. ³⁷ Keho ca lingile ku matangua aje, uavavalele mukemo nakuthsa; keho omo vamu tanethele vamu hakele mu hondo yakuilu. ³⁸ Keho omo Linda yalikele hamuhiehi na Yopa , na vandonge vo vuile nguavo Petuluua kele kuje, vamu tumithile vamala vavali kuli yendi kumu lambelela nguavo, "Ija, endelelela mukuya netu." ³⁹ Mukemo Petulu ua katukile ua ile navo. Keho omo vakahetele vamu tualele kuhondo yakuilu, nava ntuluue voshe vamu dhengelekele noku valila, keho vamu lekethele vidhalo vioshe via pangele Ndolokasi muje mua kele navo. ⁴⁰ Keho Petulu ua va tuhuithilemo voshe mu hondo, a thsikamene naku lomba keho ua tengulukile ku civimbi na ku kuania nguendi, "Tambita, katuka." ⁴¹ Keho ueshukile, muku mona Petulu ua tumamene. Keho Petulu ua muololuele livoko liendi ua mu katuithile, ngeci omo ua thanene vantu vakua kuitava navantuluue keho ua mu lekethele endi ali namuono. ⁴² Evi via athsimanene mu Yopa yoshe keho vavengi vathsilielele Muene. ⁴³ Ca lingile nge cije, Petulu ua kele mu Yopa matangua a engi kunjivo ya mumala ou ua lidhina Simoni, mukua ku kotongola vikanda.