¹ Mu Sesaliya muakele mumala ua lidhina Koloneliu ua kele mu mbala ya Sesaliya. Koloneliu kapitau ua mbunga ije ya masualale va vatumbula nguavo va mbunga ya Italia. ² Ikeye muka kupangela Kalunga, muka kuvuila Kalunga liova na njivo yendi yoshe, ua hanene vimbongo ku vakua kuhutua, na ku vundila kuli Kalunga nkala aha. ³ Ku ola ya mu citatu ku litangua ua muene cimona vuino kangelo ua Kalunga eja kuli ikeye. Kangelo ua mulekele nguendi, "Koloneliu!" ⁴ Ua talele ntoma na liova mu mbunge ua muhuile nguendi, "Vika evi, Tata?" Kangelo ua mu kuania nguendi, "Kulomba cove na vuana vuove ku vihutu vina hete kuli Kalunga. ⁵ Hano tuma vamala vamo vaye ku Yopa vaka shake liala umo lidhina liendi Simoni, ou ive kutumbula nguavo Petulu. ⁶ Ya kunjivo ya Simoni ua kupanga, limbo liendi lia kala muhiehi na mema a Kalunga. Ikeye a kaku lela vika u kapanga. ⁷ Uje kangelo ua handekele nendi u tundileho, Koloneliu ua thaneneva ndungo vendi vavali, na umo ua lisualele ua ku ononoka uje ua vamo vaje kele hamo nendi. ⁸ Koloneliu ua handekele nendi vioshe mukemo ua va tumine ku Yopa. ⁹ Molia kile litangua ku ola ya mu citanu na imo, mungila muva shuenene muhiehi na mbala Petulu, ua londele helu lia njivo na ku lomba. ¹⁰ Omo uo vuile njala ua yonguele a lie vimo, vuno nthimbu yaku teleka liakulia ua muene cimona. ¹¹ Ua muene lilu lina shokoloka muna tundu cuma cimo ca ku fua ngue muayi uakama vana kuata ku vimbango vi uana vali shuluithile hanthi. ¹² Mukemo mua kele tudhila valulithatha vamo vaku kala hanthi na tudhila va muilu. ¹³ Keho lijui lia mulekele ngualio "Petulu, katuka nthiha ulie." ¹⁴ Vunoni Petulu ua kuaniene nguendi "Houe, Shuku ange kanda nji lie viuma via ku juala nevi via lidhilo. ¹⁵ Vunoijui lie dhile lua mu civali: "Vije via panga jelesa Kalunga ove keti u vitumbule kuviha." ¹⁶ Evi via tholokele lutatu vunoni nganja va i hiluithile muilu. ¹⁷ Taleni omo Petulu uakele na vitanga ka dhivukile cimona cije ca muene. Vamala vaje vatumine ko Koloneliu va ja vehuile limbo lia Simoni navo vemanene ha cikolo. ¹⁸ Vatambakanene na kuihula nga Simoni ua kuluka Petulu kua kele kuje. ¹⁹ Omo Petulu ua li thinganiekele via cimona. Mpundhi ya mulekele nguayo, "Tala, vamala vatatu ovo vaku thetela." ²⁰ Katuka shuluka u ye navo. Keti u lithinganieke yange njina va tumu. ²¹ Ngeci Petulu ua shulukile ua ile kuva mala va je na ku vakuania nguendi, "Yange vene i mu thetela. Vika vina mineha kuno?" ²² Va kuaniene nguavo, "Mukuluntu ua masualale cihita ua lidhina Koloneliu, mumala ua kushungama ua kuvuila Kalunga liova, ikeye lalo ua thsimana mua cili mu kati ka vaYundeya. Kangelo ua Kalunga ua kuaniene nendi, a kutumine kuimbo liendi, a ka tolilile mudhimbu ua kutunda kuli yove. ²³ Hakeho Petulu ua va tambuile mu kukala nendi. Molia kile ua ile navo, na vamo va va munaina vaku tunda ku Yopa va ile hamo nendi. ²⁴ Litangua lia kushuamako va ka hetele ku Kesaleya. Koloneliu vaka mu uanene nava tatela; ua va thanene kumo va vushoko vendi na va vuthamba vendi. ²⁵ Ca kele ngeci, omo Petulu ua kovelele, Koloneliu ua musheshele ua uile ku mianja yendi naku mulemetha. ²⁶ Vunoni Petulu ua mu katuithile nguendi, "Katuka! Nange nji muntu. ²⁷ Nthimbu ije Petulu nolo kanada a handeka nendi, ua kovelele mukati na kuuana vantu vana kunguluka. ²⁸ Ua valekele nguendi, "Neni vavenia muna vidhivuka nguavo kuca tavele ku mashiko, kuka Yundeya ua mumala muku kala nambe ku liendela na u je muka vifuti. Vunoni Kalunga na nji muetha vio nguavo kati nji katumbule nkala muntu nguove na juala ndi ngove na niata. ²⁹ Vikevio vi njina jeneka kuvianene muva nji tuminine, muku nji thana. Ngeci njilekeni vika muna ka nji shakela ange." ³⁰ Koloneliu nguendi, "Matangua a uana ana hiti ku ola eyi, ange nja lombelele ku ola ya mucitanu na iuana munjivo yange; tala, mumala uemanene kulutue liange na vudhalo vuaku toka. ³¹ Ua handekele nguange, 'Koloneliu civundilo cove cina kaheta kuli Kalunga, na vuana vuove va na vu vuluka kuli Kalunga. ³² Tumako umo aye ku Yopa, vaka thanene mumala ua lidhina Simoni ua kuluka Petulu. Muali muimbo lia Simoni mukua ku panga vipapa ua kala ku muhiehi na mema a kalunga. Mua keja a ka ku handeka nove. Mukemo tua ku tumine uije. Una vuahetha mu kuija. ³³ Ngeci haje vene nja tumine kuli yove. Ngeci mualolo etu tuna kunguluka kuno ku mesho a Kalunga, mu kuvua vioshe viana shika Muene." ³⁴ Petulu uashamene kanua kendi na ku kuania nguendi, "Vucili, Kalunga keku hangula. ³⁵ Munkala muniati uoshe u muvuila liova na kupanga viuma via vushunga aka mu tambula. ³⁶ Eni mu dhivuka lijui eli lia tuma Kalunga munyati ua Isaleli, muku vambuluila mudhimbu ua cili ua cili muli Yesu Kilistu ikeye Muene ua voshe. ³⁷ Eni vavenia mudhivuka evi via solokele mu Yundeya yoshe, evi via shangumukilile mu Ngalileya munima ya kumbuitika eci ca ambuluile Yoano. ³⁸ Muna dhivuka nguendi vati Kalunga mua shulithile Yesu ua Nazaleta na mpundhi yaKulela na ndhili. Muakama endi uendele mu cifuti coshe ua pangele via cili. Va kua vimpundhi via kuviha voshe ua va kanguithile. Muomu Kalunga ua kele hali ikeye. ³⁹ Etu tuva kaleho va viuma vioshe evi via panga mucifuti ca va Yunda na mu Yelusalema. Avo voshe va mu thsihile vamu shukikile ha cilindakano. ⁴⁰ Vunoni Kalunga ua mu shituile kuvathsi mulitangua lia mu citatu linga vamu mone. ⁴¹ Keti ku vantu voshe vunoni, vuno ku vaakaleho vendi vaje va hangula Kalunga kutunda ha laja, netu tua lile na kunua hamo nendi kutunda haku shituka cendi. ⁴² Ikeye ua tu shikile ku ambulula ku vantu naku handeka vukaleho ngeci je ikeye ya hangula Kalunga muku kala Ngadhi ya va kaku yoya na vathsi. ⁴³ Muli ikeye va polofeto voshe vahana vukaleho, linga kuli uje uoshe a thselela muli yendi aka uane aka uana kumuecela ku vuvi mu lidhina liendi. ⁴⁴ Muje Petulu ali muku handeka vilinge evi, Mpundi ya Kulela ya shulukile hali vakevo voshe va e vovuile ku mudhimbu uendi. ⁴⁵ Vantu va kuthselela voshe va kele ku munyati ua kuthselela ua vaje va kua ku lovola, voshe vedhile na Petulu va komokele, muomu ku vuana vua Mpundhi ya Kulela va i mbalumuinine ku vakua mafuti. ⁴⁶ Mukemo avo va vovuile vakua vifuti vahandeka dhindaka oku va jolela muli Kalunga. Ngeci Petulu ua kuaniene nguendi, ⁴⁷ "Vantu ava navo vana uana Mpundhi ya Kulela ngue yetu, kuali lalo a va vindika mema linga keti vava mbuitike mu mema ndi?" ⁴⁸ Ngeci ua va shikile vava mbuitike mu lidhina lia Yesu Kilistu. Keho va muihuile muku kala navo mu matangua a engi.