¹ Omo va Petulu na Yoano va handekele na vantu, vasasendote na Kapitau ua tembele na va Sanduseu vedhile kuli vakevo. ² Vakevo vakele na vitanga via kama mukonda Petulu na Yoano valonethele vantu ku thanguka kua vatshi. ³ Va va kambekele mavoko naku vahaka mu kamenga noho ku cimene ca ku shuamako. ⁴ Vunoni vantu vavengi vaje vovuile mudhimbu va thselelele; na mbunga ya vantu vaje vathselelele va puile vantu ngue makulukadhi atanu. ⁵ Cakele nge cije ku litangua lia ku shuamako vakua kushika, na vakua kuthona, va li kunguluile mu Yelusalema. ⁶ Anase sasendote ua kama uakele kuje, na kayafase, na Yoano, na Alesandele, na voshe vaje vapuile vavushoko vua Sasendote ua kama. ⁷ Omo muva hakele va Petulu na Yoano mukati kavo, va vehuile, "Na ndhzili ika, na lidhina lika, muna lingi evi?" ⁸ Mukemo Petulu, ua shulile na mpundhzi ya kujela, ua va lekele nguendi, "Eni vakua kushika vantu, na vakuluntu, ⁹ nga lelo tuli kuno ku mpangulo kutuala havilinga via cili vina lingiua ku muntu ua kuvavala, na vika vina languluka omu muana kanguka, ¹⁰ vidhiveni eni navantu voshe va Isaleli ngueni, ou muntu nemana kulutue lueni na kanguka mu lidhina lia Yesu Kilistu ua kuNazaleta; uje umua shukikile, vunoni ikeye vene ya shituile Kalunga ku kuthsa. ¹¹ Yesu Kilistu ikeye livue lije limua vianene yeni vakua kutunga vunoni vana lipuitha livue lia mummbango. ¹² Muli nkala muntu kumuethi kuovoka, muinthi lia lilu kumuethi lidhina likuavo lia ku tuvaakana ha vantu ha likelio tuna pande kuovoka nalio." ¹³ Haje vene omo vamuene kuthimpa ca Petulu na Yoano naku nongonona nguavo vapuile vantu va ngoco. vantu vaakujeneka ku lilongetha vakomokele, va hetele ha kuidhiva nguavo Petulu na Yoano vakele hamo na Yesu. ¹⁴ Muomu vamuene muntu uje ua kangukile nemana hamo navo, ku vakele navimo viahi viaku kuanya via ku hitha evi. ¹⁵ Vunoni kunima yakuvatuma va tunde mu ndthango ya vakuluntu , vali handekethele ha kati kavo vavenia. ¹⁶ Nguavo, "Vika tu kalinga na vantu ava? Muku tuala ha vimuetho via vucili vina lingiua kuhitila muli vakevo vana vimono kuli uoshe ua kala mu Yelusalema; ku tuatha kuvi viana. ¹⁷ Vuno linga keti vi shandokele lalo ha kati ka vantu tuva lunguleni keti vakuanye lalo kumuntu na umo uahi mulidhina eli." ¹⁸ Mukemo muo va va thanene vakovele na kuvashika keti luhua vakuanye nambe kulongetha mu lidhina lia Yesu. ¹⁹ Vunoni va Petulu na Yoano ua handekele ko naku valeka nguavo, "Ambe ca cili kuononoka kuli yeni kuvakana ikeye, ove ngadhi. ²⁰ Kutuatha ku likela ku handeka ku viuma vi tu namono na kuvua." " ²¹ Munima yaku valungula va Petulu na Yoano, va vethelele vaye.Vakevo kuva uanene ku uana cikuma ca ku va hitha naco, na vantu voshe vashanalele Kalunga ku vije via lingiuile. ²² Mumala uje ua uanene cikomouetho eci caku kanguka ua kele na miaka yaku tuvakana makumi auana. ²³ Munima ya ku va vutula, Petulu na Yoano vedhile kuvantu vavo vavenia na kuambulula vioshe viva valekele mukuluntu ua va sasendote na vakuluntu. ²⁴ Muva viuvuile evi, vajuinduile majui avo na ciyongola cimolika kuli Kalunga nguavo, "Muene, yove uatanga melu na mavu na mema a Kalunga, na vioshe via kalamo. ²⁵ Yove ua handekele kuhitila mu Mpundhzi ya Kujela mu kanua ka ngama yove, tata yetu Ndaviti. Muomu lia vika vakua vifuti va niengua, na vantu vathinganieka viuma via ngoco.?" ²⁶ Ua handekele nguove, "Vi miene via hanthsi vaatumama hamolika avo vavenia, na vakua kusuana va likunguluile hamolika muku luitha Muene, na kuluitha Kilistu." ²⁷ Mukemo vene voshe hamo na Helonde na Pontiu Pilatu hamo na vana va Isaleli, vali kunguluile mu mbongi ije; mukuluitha ngamba yove ua kujela Yesu, uje i ua vuavuethele. ²⁸ Vali kunguluile voshe hamo mukupanga vioshe vi lia totele livoko liove na vije vi ua tumbuile ha mbangelo nguove vika sholoka kulutue. ²⁹ Ngeci muene tala ku kulungula kuavo na ku hana lijui ku vangamba vove va kuaniene lijui liove na kuthimpa kuoshe. ³⁰ Olola livoko liove na muku kanguitha na ku hana vimuetho na vikomouetho ku hitilila mu lidhina lia ngamba yove ua kujela Yesu." ³¹ Muva manethele kulombela, mu muhela uje muva likungluilile ua jajele, voshe vashulile na mpundhi ya kujela na ku kuania lijui lia Kalunga na kuthimpa. ³² Vavengi vaje vathselela vakele na mbunga imolika muono umo lika. Naumo uahi ua kuaniene kuli vioshe via kele navio nguendi viendi, ku vioshe viva kele navio vapuithile mumo. ³³ Na ndhili ya kama vapostolo va ambuluile vumbangi vuavo vua ku hinduka kua muene Yesu, na kavumbi kakama kakele navo voshe. ³⁴ Ku kuakele umo mukati kavo ua jenekele viuma, kuli voshe vakele na mahia na vinjivo va vi landethele na ku neha ku vimbongo via ku viuma vije viva landethele, ³⁵ na kuvi haka ku mianja ya vapostolo, va via valele ku nkala muntu kutuala kuvije via va jenekele. ³⁶ Yosefe, kapostolo uje iva lukile Mbanambasa (kulombonoka muna uaku koletha), ka Levi muka Sipulu, ³⁷ ua landethele lihia lia puile liendi na kuneha vimbongo naku vihaka kumianja ya vapostolo.