¹ Keho omo Petulu na Yoano va ile mutembele ha nthimbu ya kuvundila ku ola ya mucitatu kumutania. ² Keho kua kele mumala ua cilema kutundilila muimo lia va ina, va muambatele kutembele vak muhaka ku cikolo cova tumbula kuvuaha. Vakele kumuhaka nkala litangua linga a lombe vuana ku nkala uoshe akovela mutembele. ³ Keho omo ua muene Petulu na Yoano va kovela mu tembele, uava lombele vuana vua vimbongo. ⁴ Petulu ua talele vuathi vuathi mesho endi kuli yakeye, na Yoano naku mu kuania nguavo, " Tala kuli etu." ⁵ Mumala ua cilema ua vatalele, naku vandamena nguendi vamu hana ko vimo viakutunda kuli yavo. ⁶ Vunoni Petulu ua kuaniene nguendi, "Kanjethi na palata na oluvunoni evi vinji li navio njiku hana. Muli dhina lia Yesu Kilistu ua ku Nazaleta, katuka uende." ⁷ Mukumu tambula na livoko lia cilio, Petulu ua muimanekele, haje vene katuile, haje vene mianja na mahinindi a uje mu mala via uanene ndhili naku kaniama. ⁸ Na kujomboka, mumala ua cilema uemanene kumo naku shangumuka kuenda; ua kovelele mutembele na Petulu na Yoano kuendangana, kuyombodhoka naku sangala Kalunga. ⁹ Vantu voshe vamumuene endangana na kushangala Kalunga. ¹⁰ Vavi nongonona nguavo uje mumala ue kutumama ku cikolo ca tembele ca kuvuaha a lombe vantu vuana, vashulile na vikomouetho na kujolelela mukonda evi via tholokele kuli ikeye. ¹¹ Keho omo ua likuatelele kuli Petulu na Yoano, vantu voshe va puikilile kuli yavo mu kanjivo kaje veku tumbula Sololoni, kukomoka muakama. ¹² Keho mua vimuene Petulu evi ua kuaniene nguendi, "Eni vamala va Isaleli, vika muna komoka? Vika muna talela ngoco ntoma na mesho eni hali yetu, ngue nguavo tuna mulingi ende mundhili na muvucili vuetu." ¹³ Kalunga ua Avilahama, na Isaka na Yakomba, Njambi ua va shukulu yetu, ua nthimanetha ngamba yendi Yesu. Ikeye yimua vianene na kumu kumu kundika kuli yavo, mua nji vianene ku mesho a Pilatu, mua tokuele amu tundithemo. ¹⁴ Mua vianene ua Kulela, uaVushunga, eni mukuihula ngeci mua lombele va tuhuithe mukua kuthsiha vami haneye. ¹⁵ Mua thsihi ou ua livangele ku kala na muono, uje ya shituile Kalunga ku kuthsa netu naua tu vakaleho vevi. ¹⁶ Ha kushangumuka ca kusthselela mulidhina liendi, na lidhina liendi lia vapangele ou mumala uje imua mona naku dhivuka ngueni ua ku kaniama. Kuthselela ca kuhitila muli Yesu ca tunehela vukangule vuakushula kulutue lueni muva voshe. ¹⁷ Ngeci vamu na nana njina vidhivuka eni mua vi pangele ku ndhimba ngue naua muva vipangele vakua kumishika. ¹⁸ Vunooni vilinge via miilekele Kalunga ku hitila mu tunua tua vapolofeto nguavo, Kilistu na pande kuyanda, na vipuithamo. ¹⁹ Ngoco vene litaveleni mukualulula vimbunge vieni, hilukeni linga vuvi vieni va kami tundithileho, mukuija nthimbu ya kujomboloka kuli Muene ; ²⁰ keho aka tuma lalo Kilistu uje iva mi hanguila, Yesu. ²¹ Ikeye Uje lilu lina pande kutambula noho ku nthimbu yaku vuahetha vilinge vioshe , kuli evi Kalunga uavihandekele ku laja ku tunua ua vapolofeto vakulela. ²² Mosesa na ikeye ua handekele nguendi, 'Muene Kalunga aka hangula vapolofeto ngue ange mukati kava munanoko. Muka tolilila vioshe vije viaka handeka neni. ²³ Ci ka pua nge cije, muntuku muntu uje kaka tolilila ku li uje kapolofeto vakamu vihithaho uoshe mukati ka vantu.' ²⁴ Mukemo, na vapolofeto voshe kutundilila kuli Samuele na vaje va shuamene munima yendi, va handekle na kutambakana matangua aa. ²⁵ Eni vana va vapolofeto vaku litavathano lia pangele Kalunga na va shukulu, ngue mua handekele na Avilahama, 'Mu mbuto yove mukemo vaka vedhikithila vushoko vuoshe vua hanthi. ²⁶ Kunima omo Kalunga na shitula ngamba yendi, ua mutumine kulki yeni ha mbangelo, muku mivedhikitha naku hilula nkala uoshe kutunda ku vingila via vuhenge.