¹ Keho omo matangua atanu ana hiti , sasendote uakama Ananiya ua ile kuje, hamo navamo vava kuluntu na lihako umo ua lidhinaTetulu. Va mala ava va tualele mulonga uavo hali Paulu ku li nguvulu. ² Omo Paulu uemanene kumesho a nguvulu, Tetulu ua shangumukile kumu vangeya kuli nguvulu nguendi, "Muomu yove uli na civovo cakama, na ku vuniungi vuove vuna neha kuvuaha ku limo lietu. ³ Keho nakushangala coshe etu tuna vitambula vioshe vije viue kupanga, ua kathingimiko Feliksi. ⁴ Vunoni muku jeneka kutuala hale, njina kulambelela mu ku tu tolilila ku ngodhi yove. ⁵ Muomu tuna uana liala ou muka kutu tambuitha mukua kushangumuna ndhita hakati ka vaYundeya hanthi hoshe. Na ikeye ntuama yava kaua Nazaleta. ⁶ Ikeye lalo uethekele ku jualetha tembele ngeci tuamu kuatele, keho nga tua mu thompetha ngue kumedhi a lishiko. ⁷ Vunoni Kapitau uakama lisiya uedhile na ngolo yakama, ua mu tundithile kumavoko etu. ⁸ Ngeci ua shikile vaka ku mu ambulula vahete kumesho endi. "Omo uka mukonka Paulu ha viuma evi, uka mona vioshe kumulonga utu nambulula kumesho ove." ⁹ Keho va Yundeya lalo navakevo va vuedhelele ku lijui lije, va kuatethele nakuitava nguavo vioshe viva ambuluile vucili. ¹⁰ Vunoni omo nguvulu ua shovueyele Paulu ahandeke , Paulu ua kuanieneko nguendi, "Nji na dhivuka ngecije miaka yayingi ove uahakuila limo limo, mekemo nange nji na kaniama mu kuliohiela kuli yove. ¹¹ Nove uka dhivuka nge cije nguavo hana hiti matangua akuheta likumi na avali kutunda hanjayilile mu Yelusalema muku lemetha. ¹² Omo vanji uanene mu tembele, kunja lingile vimpata na muntu na umo uahi, kunja shangumuine mu mbunga nambe muvi sinangonga, nambe mu nganda. ¹³ Kuvatha ku uana vukaleho vua viuma evi viva na njivangeya hano. ¹⁴ Vunoni evi njiku leketha evi, nguange njika lemetha mungila yakulifua na Kalunga iva lemethele vashukulu ikeye injetava. Nja puithamo vioshe via medhi alishiko na vithoneka via vapolofeto. ¹⁵ Nange naua nja lavelela kuli Kalunga ngue ava vamala, nguetu kuka kala kushituka ku voshe vaje va vucili nava kua vupi. ¹⁶ Keho mukemo vene nja thetela nthimbu yoshe kuhiuma kumbunge kumrsho a Kalunga nakumesho avantu. ¹⁷ Keho muya hitileho miaka yayingi njedhile kuneha kuohiela ku mushovo uange na vuana na vimbongo. ¹⁸ Evi vikevio vinja uanene mu tembele. Omo nja manethele cipanga ca kulileletha kuva keleko vantu vavengi nambe ku katula vimpata. Keho ava vamala va va Yundeya vakutunda ku cifuti ca Asia va kele kuje. ¹⁹ Vakevo veje kumesho ove, linga vanji hithe , nga vali navimo kuli ange. ²⁰ Cipue ava vali kuno, vahandeke nga vana uana mulonga muli yange, omo njedhile ku mbunga yakama, ²¹ Nga kuahi kuvanga mu njemanene kumesho avo naku tambakana lelo eni munjipangula. Muomu njetava nguange vakua kuthsa vaka shituka." ²² Keho Feliksi omo ua viuvuile via Ngila yamuene, ua vimanethele. Nguendi, "Omo Lisiya mukuluntu ua masualale aka shelela kutunda kuYelusalema nji ka teta mulonga ou." ²³ Keho ua shikile kapitau nge cije Paulu vaka muniunge, vunoni aka liendele linga va vusamba vendi keti vava vindike muku mupandela. ²⁴ Keho omo kunima ya matangua amo, Feliksi uedhile na mukentu uentu uendi Ndulusila uje ua puile ka Yundeya, . Keho ua tuminine Paulu nakumu tolilila via ku pandama kukuthselela muli Yesu Kilistu. ²⁵ Vunoni omo Paulu uamu longethele via vucili nakulikehetha na luvinda lukeja ko, Feliksi ua kele na liova na ku handeka nguendi linga uye kuove, nthimbu eyi ya mualolo, keho omo njina mono nthimbu ya cili amba nji ku thana. ²⁶ Keho hanthimbu ije vene ua tatelele nguendi Paulu amu hana vimbongo, ngoco vene ua mu tuminine naku handeka nendi. ²⁷ Vunoni omo miaka ivali yahuile,Polisiu Festu ua sinsile Feliski, vunoni Feliski ua yonguele ku uana cilemo ku vaYundeya, vikevio viethelele Paulu mukamenga.