¹ Omo tua tundile kuli yavo na kushangumuka kuya, tua shungamene ku cihuti ca Kose na vuato, litangua lia kushuamako kuya ku cihuti ca Londese, na kuheta ku cihuti Patala. ² Motua uanene vuato vuya ku Fenisia, tua londele kumo na kuya. ³ Kunima ya ku mona Sipulu, kuyitha ku kamoshue ka vuato, tua ile ya Silia na ku katulila ha Tile, haje vuato nga vulongolole vitenga. ⁴ Munima ya ku uana va ndongethi, tuakele matangua atanu na avali. Mu sipilitu va nanguile Paulu keti aye ku Yelusalema. ⁵ Omo matangua etu kuje ahuile, tua tundileko na kuya na ngila yetu, navo voshe, na vampuevo vavo na vanike, vatu thindikiyile muku tuhuka limbo lije. Keho tua thsikamene ha cikoko, tua vundilile, ⁶ nakulishika umo na mukuavo. Kunahu tua londele mu vuato, na vaje va hilukile ku membo. ⁷ Omo tua manene vungendhi vua ku Tile, tua hetele ku Tolemanda. Kuje tua likundile nava munanana, na ku kala navo litangua limo lika. ⁸ Lia kukiako tua tundile na kuya kuSesaliya. Tua kovelele munjivo ya Filipu, mukua mudhimbu ua cili, uje uapuile umo uavaje vatanu na vavali, ngoco tua kele nendi. ⁹ Keho mumala ou uakele na vana vendi va vakentu ava vakele na ku polofeta. ¹⁰ Omo tuakelemo amo matangua, kua ngulumukile kutunda ku Yundeya kapolofeto umo ua lidhina Angambu. ¹¹ Wedhile kuli yetu na ku nona muiva ua Paulu. Nauo uali dhitikile ku mahindi naku mavoko endi avenia naku kuania nguendi, "Nguayo Sipilitu, 'mukemo va Yundeya vamu Yelusalema vaka manga mumala muka muiva ou, keho vaka muhana mu mavoko a vaka vifuti.'" ¹² Omo tuo vuile viuma evi, tuva voshe netu na vantu va kele kumuhela uje tua dhembelekele Paulu linga keti aye mu Yelusalema. ¹³ Keho Paulu ua kumbuluile, "Vika mupanga, muli naku lila naku vavalesa mbunge yange? Muomu ange njina livuahesela laja, keti muku njikuta lika, vunoni na kuthsa muYelusalema mu lidhina lia Muene Yesu." ¹⁴ Omo Paulu ua vianene kutava, tua holokele tuahandekele nguetu, "Ciyongolaa ca Kalunga ci puemo." ¹⁵ Mu matangua aa, tua nonene vi ndjato vietu tua ile ku Yelusalema. ¹⁶ Hamo netu lalo va ile hamo netu vandonge va ku Sesaliya. Va hituile hamo navo mumala ua lidhina Mnasoni, mumala uaku Sipulu,Ndongesi ua kulivanga uje itu ka kala nendi. ¹⁷ Omo tua ka hetele mmu Yelusalema vakuetu vatu tambuile naku jolela. ¹⁸ Litangua lia kushuamako Paulu na Tiango va ile hamo netu na vakuluntu voshe va keleho. ¹⁹ Omo tuna manene kuva hinduitha, ua va tandelele cimo ku cimo viuma vije Kalunga via pangele mukati kava kua vifuti muku kala ca vipanga viendi. ²⁰ Omo va viuvuile, va shangalele Njambi, na ku handeka nendi nguavo, "Una mono, muna nana, vangahi makulukadhi vanetava mkati ka Yunda. Voshe vana lihakamo nandhili muku shuama medhi a lishiko. ²¹ Va valeka vioshe viove, nguavo uka longetha va Yundeya voshe ava vakala mu kati ka vakua vifuti va tunde kuli Mosesa, keho lalo ua valeka keti va lovole vana vavo, nambe keti vende muvilika vije via laja. ²² Ngoco vika tupanga? Mualolo vovua nguavo ove u neja. ²³ Keho panga evi vitu kuleka. Tuli na vamala vauana vali nalitavasiano. ²⁴ Nona vamala ava linga ukalilelethe yove vavenia, na kuva fuetela milonga yavo, linga vatevule mitue yavo. Linga nkala umo a dhivuke nguavo viuma vioshe vio va handeka kuli yove vili via vishaki. Kaha vaka lilongetha nguavo nove uka shuama medhi a lishiko. ²⁵ Vunoni kupandama ku va kua vifuti vaje vana thselela, tua va thonekelele na kuva hana mashiko aje vali niunge vakevo vavenia kuviuma via ku kombeleya mahamba naku maninga, na kuje kuli vije viaku nthinia naku vupangala. ²⁶ Keho Paulu ua tambuile vamala vaje, keho na litangua lia kushuamako ua lilelethele endi vavenia hamo navo. Kehgo haje vene va kovelele mu tembele, na kuhana mutambi ua matangua a ku lileletha a ka puamo na ku hana vuana vuka vaka solola ku umo ku umo. ²⁷ Omo matangua atanu na avali ali na kuya kuku hua, va Yundeya va ku Asia, omo va muene Paulu mu tembele, vashangumuine mbunga yoshe, keho va mu kambekele mavoko. ²⁸ Va tambekele, "Vamala vamu Isaleli, tuohieleni. Ou ikeye mumala ueku longetha vantu voshe na kuoshe viuma via ku li vindika na vantu, na medhi a lishiko no u mehela uno. Endi luhua naneha va Ngelengu mu tembele na zualetha muhela ou ua kulela." ²⁹ Ngue muva muene laja Tolofimu mukua Efeso hamo nendi munganda, ngeci va thinganiekele nguavo Paulu na mu nehele mu tembele. ³⁰ Keho limbo lioshe lia vundukile, na mbunga yoshe ya shatukile hamolika na ku kuata Paulu.Va mutuhuithile mutembele, na haje vene vikolo vavi shokele. ³¹ Keho omo va yonguele ku mu thsiha, mudhimbu uedhile ku mukuluntu ua kama ua masualale, ngue cije Yelusalema yoshe ya kele mu luodhi. ³² Keho haje vene ua nonene masualale na tupitau vavo na kuya na ku shatukila kuli mu mbunga. Keho omo vantu va muene mukuluntu ua kama ua masualale na masualale, va likelele ku pupa Paulu. ³³ Keho ngeci mukuluntu ua kama ua masualale ua shueneneko na ku kuata Paulu, na ku mu shika vamu hake mu malienge. Keho uehuile nguendi ikeye iya, vika nalingi. ³⁴ Vamo vantuva kele mumbunga va tambakanene mbulula cuma cimo na vakuavo cuma ceka. Omo mukuluntu ua masualale kuvathele kumona viuma muomu lia muyoyo, ua shikile linga Paulu vamu nehe mu mbonge. ³⁵ Keho omo ua hetele ku zindondelo, ma sualale va muambatele muomu luozi lua mbunga. ³⁶ Muomu mbunga ya vantu ya shuameneko na ku naku tualelela ku tambakana nguavo, "Mu tshihienu!" ³⁷ Kaha omo Paulu va yonguele kumu tuala mu mbonge, ua handekele na mukuluntu ua masualale nguendi, "Ci tava nji handeke vimo nove?" Na mukuluntu ua masualale ua muihula nguendi, "Uka handeka ci Ngelengu?" ³⁸ Keti yove uka Ingito uje ku matangua aje a na hiti, ua shangumukile ndzita keho ua tualele kudhindinda, makulukadhi auana a vamala vakua kuthsiha vantu ndi? ³⁹ Vunoni Paulu nguendi, "Ange ka Yundeya, ua ku Talusu mu Silisia, mundambo ua nganda yakama. Nji na lambelela, nji tave nji handeke na vantu vaje. ⁴⁰ Keho omo mukuluntu ua masualale ua mu tavele, Paulu, ua mene ha zindondelo, na ku handeka kumbunga na livoko liendi, keho omo voshe va holokele kulu, ua handekele navo mu ndaka ya ci Hevelu. Nguendi,