¹ Mu ua lengele muyoyo, Paulu ua tumine vandongishi na ku va koletha, ua va kolethele keho ua ile ku Masendonia. ² Keho mua hitile mu membo aje na ku kuania majui a mengi a ku va koletha, uedhile ku Ngelengu. ³ Munima ya kukala kuje vingonde vitatu, va Yundeya va liyonguele vutumbe vua kuviha kuli yendi mua yonguele ku kovela muvuato linga aye ku Silia, keho mukemo mua thinganiekele kuhiluka mungila ya kuya ku Masendonia. ⁴ Vamu thindikiyile naku Asia vakele Sopatulu muna Pilu ua ku Meleya; Alistaku na Sekundu voshe vaka kutava ca Tesalonika;Ngayu ua Ndevele; Timoteu; na Tikiku na Tolofinu ua ku Asia. ⁵ Vunoni vamala ava vaile kulutue luetu naku tu tatelela ku Toloase. ⁶ Tua tundile ku Filipu mu vuato kunima ya matangua a mbolo ya ku jeneka cimbaluila, na mu matangua atanu tuaile kuli vakevo mu Toloase. Muje tua kele mo matangua atanu na avali. ⁷ Ha litangua lia kulivanga lia mu simanu, mutua likunguiyile muku tavodhola mbolo, Paulu ua kuaniene navaka ku tava. Ua tumbuile ku tundako litangua lia kukiako, keho ua lahethele mudhimbu uendi noho mukati ka vuthsiki. ⁸ Muakele mitengeko yayingi muhondo ya kuilu kuje kutua likunguluile. ⁹ Kunahu kua kele mukuenje umo ikeye Yutiku ua tumamene mu likende, ua nengukike. Omo Paulu muku tualaho kuhandeka, mukuenje ou, nolo mutulo, ua uile kutunda kunjivo yamu citatu vamu kakuile nathsi. ¹⁰ Vunoni Paulu ua shelelele, ua lionuene kuli ikeye na ku mu vumbatela. Keho ua handekele nguendi, "keci mume vimbunge mukonda ali na muono." ¹¹ Kueho ua londele navo kuilu, naku teta mbolo na kulia. Kunima ya kuhandeka navo nthsimbu yalaha noho litangua litangua lia kovelele, vaile. ¹² Vanehele kamukuenje uje na muono keho vali dhembadhekele muakama. ¹³ Etu vavenia tua tuamene kulutue lua Paulu tua javukile na vuato tuye ku Aso, kuje kotua tumbuile kutuala Paulu. Evi vikevio via yonguele vavenia, mukonda ua tumbuile kuenda hamavu. ¹⁴ Muaka tu uanene ku Aso, tua mu hakele muvuato na kuya ku Mitilene. ¹⁵ Keho tua javukile tutunde kuje naku kaheta litangua lia kushuamako kuvuthunga na Kiu. Litangua liak kushuamako tuaka hita ku nkundu ya Samose, keho lia kushuamako tueja kuimbo lia Mitelu. ¹⁶ Mukonda Paulu ua yonguele ku javuka a tuvakane Efeso, linga keci akale na ntsimbu yahi mu Asia; mukonda ua shatukilile a ka kale mu Yelusalema ha litangua lia Pendekosta, amba nga citava avi puithemo ngecije. ¹⁷ Keho ua tumine vamala vaku Miletu vaye ku Efeso linga vaka muthanene vakuluntu va ngeleka. ¹⁸ Muvedhile kuliende, ua va lekele nguendi, "Eni vavenia muvidhivuka, tunde litangua lia mbangelo kuliata cange mu Asia, omu monji na limuetha kukala thimbu neni. ¹⁹ Nja tualeleho kupangela Muene na muono ua ku lithingimika mumana na mishodhi, na mu tuyando tua nji sholokelele mukonda lia vutumbe vua va Yundeya. ²⁰ Muna vidhivuka ngueni kuvia nji fuililile ku miambuluila vioshe via cili, nomu munja milongethele kumbunga nambe kunjivo, ²¹ na ku leketha ku va Yundeya nava Ngelengu voshe via kutuala ku kulitavela kuli Kalunga na luthilielo muli muene Yesu. ²² Ngeci taleni, ange njiya ku Yelusalema, muyi na nji tumu Sipilitu, vunoni kunja dhivukile vika vika nji uanako kuje, ²³ kunonako nguavo Sipilitu yanji leketha vumbangi mu nkala limbo mikole na tuyando via nji tumamena. ²⁴ Vunoni kunja limuene ange vavenia seho ya muono uange, amba lika nji manetha vipanga vinja tambula kuli Muene Yesu, linga nji hane vumbangi vua mudhimbu ua ngodhi ya Kalunga. ²⁵ Ngeci taleni, njina dhivuka nguange mukati keni muvoshe eni va nja ambuluila vu muene, kumu kamono lalo cihanga cange. ²⁶ Keho njimi leketha litangua eli, nguange kunjethi na mulonga ku maninga a muntu naumo uahi. ²⁷ Mukonda kunja shuekethele ku miambuluila cidhango ca Kalunga coshe. ²⁸ Mukemo hani liniungeni eni vavenia na vutanga vuje vuana mihanguila mpundhi ya kulela mupue tuniungi. Dhangameni kuniunga ci kungulukilo ca Kalunga, cije ca landele na maninga endi vavenia. ²⁹ Njina vidhiva nguange munjiya , tungunga va vukalu vaka kovela hakati keni keho kuva kovola vutanga. ³⁰ Nji nedhiva nguange nambe hakati keni haka tunda vamala vaka handeka medhi aku dhimbaletha vondongethi vakeja munima yavo. ³¹ keho vingileni. Vulukeni ngueni mumiaka itatu konja likelele kumi lungula na mishodhi vuthsiki na mutania. ³² Ngeci njimi kundika kuli Kalunga na ku medhi a ngodhi, eyi yatha kumitunga naku mihana vuje vushuana hakati ka voshe vava na leketha. ³³ Kunja liveyelele palata, olu ndi cidhala ca muntu. ³⁴ Eni vavenia muna dhivuka ngueni mavoko aa a pangela vinja thetelele nevi viva thetelele vaje vakele nange. ³⁵ Mu viuma vioshe vionja mi hanene nja mihanene cimuetho ngue vati muatha kukuatha vaka kudhela mu ku panga, na vati munapande ku vuluka majui a Muene Yesu, majui a handekele endi vavenia: 'kuhana ca tuvakana kutambula mu ku vedhika. ³⁶ Mua manene ku handeka ngeci, ua thsikamene na ku vundila navo voshe. ³⁷ Kuakele kulila kuakama, keho va vumbatelele Paulu na ku muthsuemba. ³⁸ Cingi cavo va dhudhukile mukonda lievi via handekele, nguendi kuva ka mumono lalo cihanga cendi. Keho vamu thindikiyile ku vuato.