¹ Cakele ngeci ha kanthimbu Apolo uakele ku Kolintu, Paulu ua hitile ku vifuti via kuntunda na kuya ku limbo lia Efeso, ua uaneneko vandonge vamo kuje. ² Paulu ua vehuile nguendi, "Eni muatambuile Mpundhi yaKulela mumua thselelele ndi?" Vamu lekele nguavo, "Kuahi, nolo kanda tu viuve lumo via mpundhi ya kujela." ³ Paulu ua vehuile nguendi, "na mu kumbuitika kuka va mi mbuitikile nakuo?" Va mu lekele nguavo, "Na kumbuitika kua Yoano muka kumbuitika." ⁴ Keho Paulu ua va kuaniene nguendi, "Yoano ua mbuitikile na kumbuitika ca litavela. Endi ua lekele vantu vathselele muli uje a keja munima yendi, ikeye, Yesu." ⁵ Vantu muva viuvuile evi, vava mbuitikile mu lidhina lia Muene Yesu. ⁶ Mukemo Paulu ua va kambekele mavoko, mpundhi ya kujela yedhile ha li vakevo, keho vakuaniene mu vindaka via vio via kulitha na ku polofeta. ⁷ Vakevo vapuile ngue vantu likumi na vavali. ⁸ Paulu ua ile mu sinangonga na ku kuania na ku handeka na kuthimpa ha vingonde vitatu, kuvaleka nakuva thindiya via vumuene vua Kalunga. ⁹ Vunoni va Yundeya vamo va kaluuile na lithino, va shangumukile ku kuanya via kuviha ku mesho a vantu omo liangile ije. Mukemo Paulu uavathile ua ile na vandonge na ku va lombonuena nkala litaangua munjivo ya kulongethela ya mu Tilamu. ¹⁰ Evi via tualeleleho ha miaka ivali, linga voshe vaje vatungile mu Asia vovue lijui lia Muene Yesu, voshe va Yundeya na vaNgelengu. ¹¹ Kalunga ua lingile vikomouetho via kutuvakana ha mavoko a Paulu, ¹² linga nambe malesu na vintanga vioshe vije via mukuatele ku muvila uendi va vi tualele ku vaka kuvavala keho mavethzi a vatunda na vimpunthzi via kuviha via tuhukile. ¹³ Vunoni kwakele va Yundeya vimbanda va hitile ku muhela uje. Vakevo vakele na ku tambakana lithzina lia muene Yesu linga va uane ndhili ya ku luitha vi mpundhi via kuviha mu ku kuania nguavo, "Mu lidhina lia Yesu uje ye kuambulula Paulu, nji shika u tuhukemo." ¹⁴ Ka Yundeya sasendote ua kama, lidhina liendi Chikeva, ua kele na vana vendi va vamala vatanu na vavali vakevo va pangele evi. ¹⁵ Mpundhi ya kuviha yava limbuluile nguayo, "Yesu njimu dhivuka, na Paulu njimu dhivuka; vunoni enico yeni veya?" ¹⁶ Mpundhi ya kuviha ya kele mu muntu uje ya jombokelele vaje vimbanda na ku va vula kumo na ku vapupa. Keho va teuele va tuhukile munjivo yije mishenga-shenga na vimbandu. ¹⁷ Evi va vi dhivukile ku voshe, voshe va Yundeya na va Ngelengu, vaje va tungile ku Efeso. Vakele na liova lia kama, na lidhina lia Muene Yesu vali thingimikile. ¹⁸ Lalo, vaka kuthselela vavengi vedhile na ku litavela na ku hana vukaleho vua vilinge via kuviha viova pangele. ¹⁹ Vavengi vaje va pangele via maseno va nehele mikanda yavo hamolika na ku i thsimika ku mesho a voshe. Mova tandele seho yavio, ya puile makulukadhi makumimatanu a vipalata. ²⁰ Keho lijui lia Muene lia lishandanganene kuoshe muakama muvingila via ndhili. ²¹ Keho kunima omo Paulu ua manethele vipanga viendi mu Efeso, ua thinganiekele mu mpundhi ya kujela a hite mu Mecedonia na Akaya mungila yendi ya kuya ku Yelusalema, nguendi, "Kunima omo njinayi kuje, nji napande ku kamona loma." ²² Paulu ua tumine ku Mecodonia vantu vendi vavali, Timoteu na Elastus. Vunoni endi vavenia ua thalele mu Asia ha kanthimbu ka kandende. ²³ Ha nthsimbu ije kukuakele nambe ku tanganetha ca cindende muEfeso kutuala ku Ngila. ²⁴ Muka kufula umo palata ua lidhina Ndemeteliu uje ua pangele palata mu cifua ca kamponia Artemis, ua nehele ndando ya kama ku vamala vaka kushonga. ²⁵ Keho ikeye ua kunguluile hamo vamala vaka vipanga vije uava lekele nguendi, "Eni vamala, munedhiva ngueni mu vipanga evi tuka panga vimbongo via vingi. ²⁶ Munamona na kuvua nguavo, keti Efeso lika, vuno handende Asia yoshe, ou Paulu ua thininika na ku tengulula vantu vavengi. Ali naku handeka nguendi kukuethi tulunga va kupanga na mavoko. ²⁷ Kukaluua oku keti ngue omo kulanda na kulandetha cetu kuva ci thetela lalo, vuno na tembele yuo kalunga uakama ua mukentu Artemis vaka yimona ngue navimo viahi vene. Aka dhimbaletha vukama vuendi vukakale vungoco, endi uje vaka Asia voshe na mvu oshe yova ka pangela." ²⁸ Mova viuvuile evi, va shulile na vukalu na kulila, nguavo, "Uakama Artemis ua vaka Efeso." ²⁹ Limbo lioshe via va tangele, na vantu va shatukilile na mana amolika mu ndhango. Paulu vamu nonene vaka kuenda mumo nendi, Ngayu na Alistaliku, vaje va tundile ku Macedonia. ³⁰ Paulu ua yonguele ku kovela mukati ka mbunga ya vantu, vunoni vandogi vamu vianene. ³¹ Lalo, vamo va miata va mutambela ua Asia vaje vapuile vathamba vendi vamu tuminine lijui lia ku mu lambelela keti a kovele mu ndhango. ³² Vantu vamo va tambakanene cuma cimo, na vamo cikuavo, mukonda mbunga ca va tangele. Cingi cavo ku vedhivile nguavo vika vali kunguluilile hamo. ³³ Vamo vamu mbunga va kolethele Alesandele, uje iva thindikilile va Yundeya kulutue. Keho Alesandele uoluele livoko liendi, ua yonguele ku liohiela ku mbunga. ³⁴ Vunoni omo mu vedhivile nguavo ikeye ka Yundeya, voshe va lilile ha vi ola via kupua ku vivali na liji limo lika, kutumbula, "Uakama Artemis ua vaka Efeso." ³⁵ Omo mukuluntu ua limbo ua holuethele mbunga, ua kuaniene nguendi, "Eni vamala vaka Efeso, muntu muka aliko kedhiva nguavo limbo liava kaEfeso tembele yaku tulikila ua ku hiana Artemis na cifua cije ca uile ha mavu kutunda muilu? ³⁶ Mukumona hani nguavo vilinge evi kuviviana kuahi, munapande ku holoka na kujeneka kupanga vimo via vuathi-vuathi. ³⁷ Mukonda muna neha vamala ava ku ndhango eyi vaje keti vidhi va vi tembele ndi vaka kushahula kalunga uetu ua kushonga ua mukentu. ³⁸ Mukemo hani, nga Ndeneteliu na vaka kushonga ava vali nendi vali na ku vangeya ku nkala uoshe, ndhango yina shokoloka na vaka vunguvulu kuvali. Vaye vaka livangeye umo na mukuavo. ³⁹ Vunoni nga mutonda vimo kutuala kuvieka, ku vi thompela mundhango ya mbunga yoshe. ⁴⁰ Cili vene tuli mu vushonde vua ku tu vangeya kutuala ku muyoyo ua litangua eli. Kukuethi na cikota ca muyoyo uaco, naua kotu ka viatha kuvi lombolola." ⁴¹ Mua handekele evi, ua shanduele mbunga.