¹ Kunima yavo Paulu uatundile ku Antioka nakuya kuKolintu. ² Okuye kukeko kua uanene kaYundeya ualithina Akuila, uova themenene Kupontus, ouye uatundile ku Italia namukentu uendi Priscilla, mukonda Cludius ua hakele lishiko lia kutumbula va Yundeya voshe vatunde muLoma. Paulu uaile kulivakevo, ³ keho uatungile navo naku kalakumo, vakevo valekele vakaku tunga vinjivo viavi Mbalaka. ⁴ Paulu uahandekele navo musinangonga nkala Sapalalo, mukuetheka kohiela voshe vayunda nava Ngelengu. ⁵ Silas na Timoteu va tundile kuMasendonia, Paulu ualihakelemo kutia mena kulizi lia mbuluile kuli va Yundeya nguendi Yesu yikeye Klistu. ⁶ Omo vamuvianene nakumushaula Paulu uakukumuine vithala viendi nakuhandeka nguendi aa maninga eni akale hamitue yeni vavenia ange njiya hani kuliva kavifuti. ⁷ Hatundile kuye uayile kunjivo ya Titu yavatumbula Justu, liala uye uapangelele Njambi. Njivo yendi yakele muhehi nasinangonga. ⁸ Clipusi , mukuluntu uasinangonga uatava muli Njambi, kumolika nalimbo liendi lioshe; keho vavengi vaka Kolintu omo vaviviule voshe vatavele nakuva kusha ( kumbatisa). ⁹ Njambi uakuanyene na Paulu kuvuthiki mucimona, '' Keti u vue liova, vunoni handeka keti u holoke. ¹⁰ Ange njili nove, naumo uahi akakuvava letha. njili navantu vavengi mumbala yino. ¹¹ Paulu ua tungile muye muaka umo navingonde vitano nayimo, mukuambulula lijui lia Njambi hakati kavo. ¹² Omo Ngaliu uakele nguvulu uaAkaya, va Yunda vakatukile na mbunge yimolika mukuviana Paulu. Vamu tualele kucipanguilo vakamupangule; ¹³ Vakua niene ou Paulu athininika vantu vapangele Njambi keti vashuame mazui alisiko. ¹⁴ Vunoni Paulu uayonguele kuhandeka, Ngaliu uahandekele nava Yundeya, '' uachipande ngacili navihitha mulonga. Ngavucili uanjipande kunjitolilila, eni vaYundeya. ¹⁵ Vunoni omo vupu kuihula ca mazui, namathina, namashiko eni vavenia vipanguleni eni vavenia. Ange konjikovelaho mukupua ngazi yeni. ¹⁶ Mukemo muene Galiu uavashekele kucituamo cendi cakupanguila. ¹⁷ Voshe vakuatele Sasitene mukuluntu uambunga, yasinangonga keho vamupupile kuye kucituamo cakupanguila. Ngaliu kavihankelele cishoti kuliaviye vivangele. ¹⁸ Paulu muakele kuye matangua amengi, ueshikile vakuavo uayile ku Silia hamo na Pilisila na Aquila. Kulutue lia tundile hatcavu, Senkili, uateuile vinkambu viendi mukonda lia cithingo catambuile. ¹⁹ Omo vakahetele ku Efeso, Paulu uakathile Priscilla hamo na Aquila kuye, endi vavenia ua yile muvi sinangonga nakukahandeka nava Yundeya. ²⁰ Hovehuile Paulu nguavo acikale hamonavo keti ayevuathi, uahandekele vucili. ²¹ Uayile naku kuania nguendi, '' njikahiluka kuliyeni amba Kalunga nayongola.'' keho ua tundile ku Efeso. ²² Omo Paulu uahetele mu Sesilia, uayile nakuka kundhithilaho vimbunga via muYelusalema keho uashelelele ku Antioka. ²³ Kunima uakele matangua kuye, Paulu uayile na kukahita kumutambela ua Galata namu Filinga nakulembetheka voshe vandogi. ²⁴ Hakele k Yundeya uali thina Apolo, Alekisanda lithina liendi lia kumu thema nalio, uendhile ku Efeso. uakele muntu uacili uakuhandeka mathona nakutanda mikanda. ²⁵ Apolo vamuishikile mukulongetha via Kalunga. Uetavele musipilitu uakuaniene nakulengetha via kumutamba ua Yesu, uathivukile ko lika kukusha ca Yoana. ²⁶ Apolo uashangumukile kuhandeka muakama musinangonga. vunoni omo Priscilla na Aquila vamuivuile vamutambuile, nakumuleketha ngila ya Njambi muamuingi. ²⁷ Muayonguele kuhitakana kuya kuKaya, vakuavo vamuthembelekele naku muthonekela mukanda kuli vandongi ku Akoya naku kamutambula vakokalenendi. Hakahetele, uakakuathele vaye vatava mungathi. ²⁸ Apolo ua vianethele va Yundeya nandhili yakama mumesho ambunga nakuvaleketha mathona nguendi Yesu yikeye kilistu.