¹ Vuno muva tuvakanene omo va hitile mu membo a Amefipolise na Apolonia, vahetele muimbo lia Tesalonika kuje kua kele sinangonga yava Yundeya. ² Keho Paulu, ngue ku cilika cendi ua ile kuli vakevo, keho ku masapalalo atatu ua handekele navio via vithoneka. ³ Ua va tandelele mathona na ku valeka nguendi ca pandele kupua mo linga Kilistu ayande aka shituke lalo ku kuthsa. Ua handekele nguendi, "Ou Yesu inji mi ambuluila ikeye Kilistu." ⁴ Keho vamo hakati kavo va Yundeya vetavele, vali pandakanene na Paulu na Silasi, hamo kuvuedhelelako vaNgelengu vakua kulemetha Kalunga, naku vakentu vaje va thsimanene keti vava ndende. ⁵ Vunoni va Yundeya vakua kujeneka kuitava, muku shula nacipululu, vatambuile vamala vamo vakuviha kumuhela uakulandethela , vakunguilile mbunga hamo naku katula muyoyo kuluitha njivo ya Yasone, vayonguele kutuhuila Paulu na Silasi kuvahana kuvantu. ⁶ Vunoni omo kuva vauanene, vakokele Yasone navamo vava munaina kuli vakua kushika nganda, naku tambeka nguavo, "Ava vamala vana vana fulumika vaneja kuno lalo. ⁷ Ava vamala va tambuile Yasone vana viana mashiko a Sezale naku handeka nguavo kuli muene ueka Yesu. ⁸ Keho va hanene kala mbnga na vakua kushika nganda mu vovuile viuma evi. ⁹ Vunoni kunima omo vakua kushika vana fuetetha Yasone navakuavo vimbongo va vecelele. ¹⁰ Keho manthiki aje vene vamunaina vaje vatumine Paulu ku Mbeleya. Omo vaka hetele kuje va ile mu sinangonga yava Yundeya. ¹¹ Vuno vantu ava vapuile va cili kutuvakana vaje vaku Tesalonika, muomu vakevo vatambuile majui navimbunge via kuvuaha, ku hilula mathona litangua kulitangua muku nongolona nga viuma evi mukemo via kele. ¹² Ngoco vene vavengi va thselelele, navaje vakentu vakuthsimana vavaNgelengu navmala vavengi. ¹³ Vunoni omo va Yundeya vaku Tesalonika va muvovuile nguavo Paulu nendi ua ambuluile majui a Kalunga ku Mbeleya, keho va ile kuje lalo naku shangumuna naku yandetha mbunga. ¹⁴ Keho haje vene vakuenje vatumine Paulu kuya ku kalunga ndonga, vunobni Silasi na Timoteo vakele kuje kuMbeleya. ¹⁵ Kuli vaje vatuamenenene Paulu vamu tualele nakumuhetetha vulahe vua nganda ya Atena. Keho omo va thile Paulu kuje, va uanene mashiko kuli yendi a Silasi na Timoteo mu kuija kuli yendi mu vuathi. ¹⁶ Vuno omo Paulu ua va vandamenene mu Atena, mpundhi yendi yashulile navishoti muje mua meune nganda yakushula natu mponia. ¹⁷ Ngeci ua handekele mu sinangonga nava Yundeya navamo vaje valemethele Kalunga, naku citanda navaje va kele kuje. ¹⁸ vunoni na vamo vakua mana vaku Epukiliu na va Setoiku va liuanene nendi. Vamo nguavo, "Vika ayongola kuhandeka ciyambangane ou? Vakuavo nguavo, "Na pu ngue ikeye a thana vantu vahuame vakalunga vavo," muomu ua ambuluile mudhimbu ua cili ua Yesu na kushituka. ¹⁹ Keho vakuatele Paulu nakumu tuala ku Aleopangu, nguavo, "Tu dhivuke evi vilongetha via viha vi u ambulula? ²⁰ Muomu uli nakuneha vilinge vieke via viha ku matui etu. Ngeci vene tuyongola kudhivuka vika evi vioshe vilombonoka. ²¹ (Vuno vohse va Atena nava ngendhi vaje va kele ko kuva pangele vieka vunoni muku ambulula ngecije na kutolilila vilinge via viha) ²² Keho Paulu uemanene mukati kava Aleopangu naku handeka nguendi, "Eni vamala va Atena, njina mimono ngecije mulemetha vilinge vioshe. ²³ Muomu omo nja hitanganene naku tala vije vioshe vimua lemethele, nja uanene mutula na ci thoneka eci, "Kuli Kalunga uje kutudhivuka." Uje imuka lemetha kundhimba, ikeye inji mi ambuluila. ²⁴ Kalunga ua tangele cifuti na nkal vioshe vilimo, muomu endi Muene ua lilu na mavu, ka kele muvi tembele viaku tunga na mavoko. ²⁵ Nambe mavoko a vantu ka mupangela ngue uje uekutonda vimo, muomu ikeye vavenia ue kuhana muono, kuhiuma na vioshe vieka. ²⁶ Kutunda hamu mala umo ua pangele miyati ya vantu muku yoya hantunda ya mavu, nava thetekela miaka yavo yoshe na ku kala cavo, ²⁷ linga vatonde Kalunga naku thithitila vingila viavo kumushungama nakumu uana. nambe omo ikeye ka kele hale netu. ²⁸ Muomu muli ikeye tu yoya, nakuendangana na ku puamo,ngue vamo vendi vaka kutema miatho va handeka nguavo, "Muomu etu naua tumboto yendi." ²⁹ Ngeci omo tunapu mbuto ya Kalunga, kutua pandele kuthinganieka ngecije vumuene vunapu ngue olu ndi palata ndi livue - vifua via kushonga vuino na mana a muntu. ³⁰ Ngoco vene vinthimbu via ndhimba Kalunga ua vithompelele, vunoni ua shikile vantu voshe kuoshe valitavele. ³¹ Evi via puile ngeci muomu ua vuahetha litangua lia cithompelo mu cifuti mu vushunga ha mumala uje yana hangula; Kalunga ua hana vukaleho ku mumala ou ku voshe muku mushitula ku kuthsa. ³² Keho omo mu vantu vaje vaku Atane vovuile kushituka caku kuthsa, vamo vathsopele, vunoni veka nguavo, "Tuyongola lalo kutolilila vilinge evi." ³³ Kunima yevi, Paulu uava thile. ³⁴ Vunoni vamala vamo vali vandakanene nendi nakuthselela, na Ndionisiu mukua Aleoppangu, na mukentu umo ua lidhina Ndamalinu na vamo kumo navo.