¹ Paulu nendi uedhile ku Ndevele na ku Listala, keho taleni ndonge umo ua kuluka Timoteu ua kele kuje, muna ua mumala ua mukentu ua kaYunda uje ua kele mukua kuitava, vuno yishe ua puile kaNgelengu. ² Ikeye lalo ua kele na lunthimo lua cili ha va munaina vaje va kele ku Listala na ku Ikoniu. ³ Paulu ua yonguele endangane nendi , ngeci ua mu tambuile nakumu lovola muomu vaYnda vaje vakele mu mihela ije, vakevo voshe va dhivukile nguavo yishe ka Ngelengu. ⁴ Mukuenda kuavo mu membo akama, va tualele ku vingeleka mashiko ava shuama, mashikoava thoneka vapostolu nava kuluntu vamu Yelusalema. ⁵ Ngeci vingeleka via kele na ndhili mu kuthselela naku lilanetha nkala litangua. ⁶ Paulu na vantu vendi vekuenda navo va iye ku membo amu Filingia na Ngalata, navakevo Mpundhi yaKulela yava vindikile linga keti va aumbulule lijui mucifuti ca Asia. ⁷ Omo vahetele ha muhiehi na na Misiya, vethekele kuya mu Mbitiniya, vuno Mpundhi yaYesu yava vindikile. ⁸ Ngeci omo va hitile ku Misiya, va thikumukile muimbo lia Talose. ⁹ Paulu ca muidhilile cimona muvuthsiki; Mumala ua mu Masendonia ue manene haje, na kumu lambelela ua kuaniene nguendi, "Ijeni mu Masendonia mua kutukuathe." ¹⁰ Keho Paulu mua muene cimona, oho vene tua yonguele kuya ku Masendonia, na kumanetha nguetu Kalunga ua tu thana muku ambulula mudhimbu ua cili kuli yavo. ¹¹ Vashangumukile nakuyavula kutundilila ku Talose, tua pangele ngila ya kuviukilila ku Samotalathe, litangua lia kushuamako tueja ku Nepolisi. ¹² Kutunda oho tua ile ku Filipu, limbo lia kama lia cifuti ca Masendonia, limbo lia seho muakama mumutamba vua vundungo vua Loma, tua kele mulimbo eli matangua. ¹³ Mulitangua lia Sapalalo tua tuhukile hanja lia cikolo kundonga, ku keko kutua thinganiekele nguetu kuje ku muhela ua kuvundila. Tua tumamene naku kuania ku vakentu vaje vatuedhile navo hamo. ¹⁴ Umo mukentu ua lidhina Lindiya, mukua kulandetha vintanga via kuvenguluka mulmbo lia Tiatila, ua kele naku lemetha Kalunga , ua tu tolilile yetu. Muene ua shokuelele mbunge yendi muku tolilila vije via handekele Paulu. ¹⁵ Omo endi na njivo yendi vana va mbuitika, ua tu lombele naku kuania nguendi, "Nga muanji hitha ku kala mukua kuthselela kuli Muene , ijeni mua ku kale muimbo liange. Keho endi ua tu thindiyileko. ¹⁶ Viedhile ngue ngecije, mukuya ku muhela ua kuvundila, kua kele muna mukentu umo ua kele na mpundhi ya kutaha tua liuanekela nendi. Ua nehele vakukuku yendi linga va ku uanenemo nukutaha. ¹⁷ Mukentu ou ua shuamene kulutue lua Paulu netu ua tambakanene nguendi, "Vamala ava vangamba vene va Kalunga ua muilu. Vana milongetha ngila ya vuovoke." ¹⁸ Ua vipangele evi matangua a engi. Vuno Paulu, via mufutuile kumbenge vio u mukentu, ua tenguluka naku handeka nguendi "Nji kushika mulidhina lia Yesu Kilistu tuhukamo muli yakeye." Ya tundamo vene oho ha nthimbu ije vene. ¹⁹ Vakuku yendi muku mona nguavo ngila yavo yaku uana vimbongo ina dhimi, va kuatele Paulu na Silasi na vatuala mu muhela ua kulandethela ku lutue lua vakakushika. ²⁰ Mu vava nehele kuva kua ku thika, va handekele nguavo, "Ava vamala vakevo vali naku katiesa limbo lietu. Vakevo va Yundeya. ²¹ Va ambulula vilika vije viva jeneka kuitavetha kupanga vaLoma. ²² Keho mbunga ya vantu ya katukile kumo na kuviana Paulu na Silasi, va kua kushika vatavuile vudhalo vuavo na ku shika vava pupe naviti. ²³ Omo vamanene kuvapupa naku vahaka vimbandu, va vombililile mu kamenga na kushika mukua kamenga ava niunge mua cili. ²⁴ Munima ya ku uana lishiko eli , mukua kuniunga kamenga ua vombilile muinthi lia kamenga na ku va kuta ku mahindi avo mu dhinkuli.. ²⁵ Hakati ka vuthsiki vaPaulu naa Silasi vavunfilile na kuimba miaso kuli Kalunga, vakuavo vaka kamenga vava tolilile. ²⁶ Kathikiti lika, mavu a yayale muakama, keho luvula lua kamenga lua linenengele; oho vene vikolo vioshe via shokolokele, na nkala uoshe malienge avutukile. ²⁷ Muka kuniunga ua hindukile ha tulo ua mona vikolo viaku tumenga vioshe vina shokoloka; uashele muele uendi ua yonguele ku lithsiha endi vavenia, mukonda ua thinganiekele nguendi vaka kamenga vana thivuka. ²⁸ Vuno Paulu ua tambaanene na lijui liakama, nguendi, "Keti uli vulumune ove vavenia, tuva vhoshe yetu vano." ²⁹ Muka kuniunga ua thanenene vi lambi na kupuikilamo vuathi na, kuyaya liova, ku uila kulutue lua Paulu na Silas, ³⁰ na ku vatuhula hanja na kuhandeka, "Vamuata, vika njatha kupanga linga njovoke?" ³¹ Va handekele nguavo, "Yitava muli muene Yesu, uovoka, yove na njivo yove." ³² Va handekele liji lia Muene kuli yendi, na nkala umo uoshe uakele munjivo. ³³ Keho muka kuniunga ua va tambuile hanthsimbu oyo vene ya vuthsiki, na ku vakusha vimbandu viavo, nendi nava voshe vakele munjivo yoshe vava kushile oho vene. ³⁴ Keho mua tualele va Peulu na Silas kunjivo yendi na ku tumbika viakulia kulutue luavo, va yolelele muakama kumo na vaka njivo yendi, nguendi netava muli Kalunga. ³⁵ Keho molia kele mutania, vaka ku pangula va tumine lijui ku vaka kuniunga, kutumbula, "Etheleni vamala ovo vaye." ³⁶ Muka kamenga ua vilekele kuli Paulu, kutumbula, "Vaka ku pangula vana hana lijui kuli yange njimi yuhule. Ngeci hano tuhukeni, na kuya mua mungulu. ³⁷ Vuno Paulu ua handekele nguendi, "Vana tu pupile mu mbunga na ku tupangula kuahi, nambe nguavo tuva kalimbo lia Loma-na ku tumbila mu kamenga. Ngeci vayongola hani ku tu sheka mu vushueke? Kuahi! Vetheleni vejeko avo vavenia vaku tu tuhule." ³⁸ Vaka kuniunga vaka lekele majui aje ku vaka ku pangula, keho mova viuvuile nguavo Paulu na Silas vaka Loma, va kele na liova. ³⁹ Vaka ku pangula vedhile va ku lombe kuethela kuli vakevo na ku va tuhula, na ku va shika vatunde muimbo lije. ⁴⁰ Keho va Petulu na Silas va tuhukamo mu kamenga oshe vayile kuimbo lia Lindia. Paulu na Silas mo va muene va munaina, vava kolethe amba oshe hani va tundile muimbo lije.