¹ Vamala vamo va tundile ku Yundeya kuya ku Antioka na kulongetha vamunayina va vamala, nguavo, "nga ku lovoka kushuama ku lishiko lia Mosesa, ku kovoka." ² Evi via nehelele Paulu na Mbalambasa vimpata viakama na ku lidhunga navo. Keho Paulu na Mbalambasa, kumo navamo vakuavo va mukati kavo, vava hanguile va kanduke ku Yelusalema vaka liuane na vapositolu na vakuluntu kucamena cihula eci. ³ Ngoco vakevo, mukukala vatumua va tembele, va hitile koshe ku Fenisia na Samaliya na ku tambeka vihandeka via vaka vifuti. Va nehelele va munaina ndjolela yakama. ⁴ Omo muva hetele mu Yelusalema, vava tambuile ku vaka ngeleka na vapositolu na vakuluntu, keho va dhimbuile vioshe Kalunga via pangele navo. ⁵ Vuno vamala vamo vetavele, vaje va kundamene ku mbunga yava Faliseo, vemanene kuhandeka nguavo, "cinapande kuva lovola naku vashika va niunge mashiko a Mosesa." ⁶ Mukemo vapositolu na vakuluntu va likunguluile kumo mukutala lijui lije. ⁷ Kunina ya ku lidhunga muakama, Petulu uemanene naku valeka nguendi, "Vamunanana, munedhiva ngueni nthsimbu yacili kunima Kaluga ua handekele mukati keni, nguendi nakanua kange vaka vifuti vakovua lijui lia mughimbu, na ku thselela. ⁸ Kalunga, uje edhiva vimbunge, ua litavela kuli vakevo muku vahana Mpundhi ya cili, ngue mua lingili kuli yetu. ⁹ Ka hakeleho kutepetha ha kati ketu navo, muku lingitha vimbunge viavo mpundu mu ku thselela. ¹⁰ Vuno ngoco vika muethekela Kalunga, ngua muhake mukambo kuvinthsingo ya vandonge ije etu nava tatetu kotuambatele? ¹¹ Vuno tuetava nguavo tukovoka ha kavumbi ka Muene Yesu, ngue omo vakele." ¹² Mbunga yoshe ya holokele muku tolila Mbalambasa na Paulu kudhimbula vimuetho na vikomo Kalunga ua pangele mukati ka vaka vifuti kuhitila muli vakevo. ¹³ Muva manene kuhandeka, Tiango ua kuanieneko, nguendi, "vamunanana, nji tolileni. ¹⁴ Simoni na handeka vati Kalunga uohielele vaka vifuti muakuvuaha linga a noneko kuliavo vantu mu lidhina liendi. ¹⁵ Majui a vapolofeto aliya mumo nevi, ngue omo vavi thoneka, ¹⁶ 'Kunima ya vilinge evi njika hiluka, na kuka tunga lalo civumbe ca Ndaviti, cije ca thihuka; keho njika tungulula navije via via thihukile, keho njika vi vuahetha lalo, ¹⁷ linga visupo via vantu va tonde Muene, na voshe vaka vifuti valiathana lidhina liange.' ¹⁸ Evi vikevio via handeka Muene, uje ua panga vilinge evi vije viovedhiva kutunda ku ntsimbu ya ku ntsenkulu. ¹⁹ Ngoco, vithinganieka viange nguange keti tu shupe vaje vaka vifuti va tengulukila kuli Kalunga. ²⁰ Vuno tuka va thonekela nguavo va litenge ku mahamba a tumponia, ku vupangala, na ku nthsitu ya ku tuthitu vaku lithsila, na maninga. ²¹ Mukonda Mosesa vamu thingimika mu membo oshe kutunda kunthsimbu ya ku nthsenkulu nawa vaka mutanda muvi sinangonge nkala Sapalalo. ²² Keho via vuahele ku vapostolo na vakuluntu, na ngeleka yoshe, va hangule Yunda ua ku tumbula Mbalambasa, na Silas, vaje vakele vantuama va ngeleka, na ku vatuma ku Antioka na Paulu na Mbalambasa. ²³ Va thonekele evi: "Kutunda ku vapostolo na vakuluntu, va munanoko, na ku vamunaina vaka vifuti va mu Antioka, Silia, na SiliSia: muoyo! ²⁴ Mukonda tunovu nguavo vamala vamo vana tundumo mukati ketu, na kushika cije keti cetu, na ku mitanganetha na vilongetha vije vi nienguetha muono yeni, ²⁵ via kele via cili kulietu, vaje vedhile ku mana amo, ku hangula vamala na ku vatuma kuli yeni kumo na vakua cilemo cetu Mbalambasa na Paulu, ²⁶ vamala va lihanene miono yavo omo lidhina lia Muene uetu Yesu Klistu. ²⁷ Ngoco tuli na ku tuma Yunda na Silasi, vaje vaka mileka vilinge vimolika vavenia mu dhinguli dhiavo vavenia. ²⁸ Mukonda ca vuahelele Spilitu na kuli yetu, keti tumi hakele citeli cakama kupulakana vilinge vije via mifuila: ²⁹ linga mudhile viuma via kukombeleya ku mahamba, maninga, vilinge via kuhonda, na ku vupangala. ngoco nga mudhila viuma evi, muka kala muacili, kaleni vuino." ³⁰ Ngoco vakevo, omo va vecelele, vahetele ku Antioka; kunima omo vamanene ku pongeka mbunga kumo, va hanene mukanda uye. ³¹ Omo vautandele, va yolelele mukonda lia kukoletha. ³² Yundasa na Silasi, lalo vapolofeto, va kolethele vamunaina na majui a engi naku va kaniameka. ³³ Kunima ya ku kalako nthsimbu kuje, vava hiluithile mu ciulo ku va munaina vaje vava tumine. ³⁴ "Vunoni camu vuahelele Silasi ku kala kuje vene." ³⁵ Vuno Paulu na Mbalambasa vake mu Antioka, kulongetha na kuambulula (kumo na vavengi vakuavo) lijui lia Muene. ³⁶ Kunima ya matangua amo Paulu ua handekele Mbalambasa, "Linga tu hilukemo hani na ku meneka va munanana mu membo oshe muje mu tuambuluila lijui lia Muene, tuka mone movali." ³⁷ Mbalambasa ua yonguele vaye na Yoano yova tumbuile Mako. ³⁸ Vuno Paulu ua thinganiekele koca vuahele kuya na Mako, uje uava thile mu Pamefilia lalo kaile navo muakama mu vipanga. ³⁹ Keho kua katukile vimpata viakama, nguavo linga va litepe hakati kavo, na Mbalambasa ua ile na Mako nendi nakuya na vuato ku Sipuli. ⁴⁰ Vuno Paulu ua hanguile Silas na kuya, kunima yaku mu kulahela vamunaina ku kavumbi ka Muene. ⁴¹ Ngoco uaile ya Silia na Silisia, ku kaniameka vingeleka.