¹ Mutembele ya Antioch, muakele kapolofete na mulongishi, vakele Mbalanabasa, Simoen ( ua kusana Nigele) munaina va kulela Helonde muhata na Saulu. ² Muvakele muku kandelela Kalunga nakuthilila, Sipiritu yaku lela nguayo,''njihakeleni kuje va Mbalanabasa na Saulu, vapange viapanga vinjina va sanena.'' ³ Muva manene kuthilia, kukandelela na kumu kambeka mavoko, hakele vamuecelele. ⁴ Va Mbalanabasa na Saulu, vava tumine naSipiritu yakulela, vaile ku Seleucia; ngeci vayile ku cyprus. ⁵ Muva kele mulimbo liakama lia Salamis, vovuile mezi a Kalunga mu Sinangonga via Yunda. Vakele na Youano ua kuva kuasa. ⁶ Muva hitile mu nkundu yoshe na ku Pafose, va uanene umo cimbanda, ka polofeto ua vishaki ua kaYunda, lidhina liendi Mbaleyesu. ⁷ Ou cimbanda ua kele hamo na nguvulu, Selengiu Paulu, uje uakele mumala ua mangana. Mumala ou ua thanene Mbalambasa na Saulu, mukonda ua yonguele kuvua majui a Kalunga. ⁸ Vuno Elimase "cimbanda" (mukemo mulia lombonoka lidhina liendi) ua va vianene; ua yonguele a tangule nguvulu keti a thselele. ⁹ Vuno Saulu yova thanene naua Paulu, ua kushula na mpunthzi ya kulela, ua mutalele ntoma ¹⁰ na kuhandeka nguendi, "Ove muna Satana, uashula na ku-kokola coshe na vindha vioshe. Ove u citodhi ca vungulu. Ove koka likele ku tengulula vingila via Muene via kushungama, ndi? ¹¹ Vuno tala, livoko lia Mwene lili hali yove, keho u himpuka kapuputua. Ku kamono litanga ha kanthimbu." Haje vene mbundu na milima via mu uanene Elimasi; ua tamekele kuya na kutonda vantu va mu hitithile ku livoko. ¹² Kunima omo nguvula ua muene via tholokele, ua thselelele, mukonda ua komokele ku ambulula majui a shukulu. ¹³ Keho Paulu na vakuavo vayavuka kutunda ku Pafose vaka heta ku Pelenga mu Pemefilia: vunoni Yoano ua vatha na ku hiluka ku Yelusalema. ¹⁴ Paulu na vavuthamba vendi vendele navo kutunda ku Pelenga naku ya ku Antioka ku Pisindiya. Va ile ku mathinangonga mu litangua lia Sapalalo keho va tumamene. ¹⁵ Mukumana kutanda majui alishiko na vapolofeto, vantuama va sinangonga va tumine lijui ngalio, "Vamuna nana, nga mu li na lijui lia kukoletha ku vantu ava, lihandekeni." ¹⁶ Keho paulu ua katukile nakuendanganetha mavoko endi, nguendi, "Vamala vamu Isaleli eni mua thingimika Kalunga, tolilileni. ¹⁷ Kalunga ua vantu vamu Isaleli ua hanguile va shukuluetu naku haka vantu kukama muje mu vakele mu cifuti ca Ingito, na livoko lia kuoloka ua va tundithile mo. ¹⁸ Ku nthimbu imo ngue ku miaka makumi a uana ua kele navo mu dhindinda. ¹⁹ Keho mua manene kuvihitha midhi itanu na ivali mu cifuti ca Kanana , ua hanene vantu vifuti viavo linga vahinge. Vioshee evi via solokele mumiaka vihta viuana na makumi atanu. ²⁰ Munima yevi viuma vioshe, Kalunga ua vahana vangadhi noho kapolofeto Samuele. ²¹ Vantu va lombele muene, ngeci Kalunga ua vahana Saulu muna Kishi, mumala ua kumuyati ua Mbenjami mukupua muene ku miaka makumi auana. ²² Omo Kalunga ua munone ko kuvumuene, ua hanguile Ndaviti mku pua muene uavo. Muomu lia Ndaviti ngeci Kalunga ua kuaniene nguendi, "Njina uana Ndaviti muna Njese mu ku pua mumala ua njiya ku mbunge, uje uekupanga vioshe vinji yongola apange." ²³ Kutunda kulimo lio u mumala, Kalunga ua nehela Isaleli muovole, YEsu ngue muje muavi hakele kuvipanga halitavathano. ²⁴ Kulutue lua kuija kua Yesu, Yoano ua ambuluile kumbuitika ca kuli tengulula vimbunge via vnatu voshe vamu Isaleli. ²⁵ Ngue omo Yoano ua kele ku ku manetha ca vipanga ua kuaniene nguendi 'Ngueni iya muna nji thinganieka ange? Ange keti yange. Vuno tolilileni, uje eja munima yange, na vinkaku viendi kunjatha kuvi dhitula ku mianja yendi.' ²⁶ Vamuna nana, vana va mulimo lia Avilahama nava vali mukati keni vaje voviula liova Kalunga, muomu yetu ngeci mudhimbu ua kuovoka tuna utumu. ²⁷ Muomu vaje va kala mu Yelusalema na vaka kushika kuva mu tambuile. Navakevo ngetji va puithilemo medhi avupolofeto ava ka tanda ku Sapalalo yoshe muku muhitha. ²⁸ Nambe muva jenekele kumu uanena mulonga ua kumu thsiha, va lombele kuli Pilatu linga vamu thsihe. ²⁹ Mu va manene kupanga viuma evi vioshe viva mu thonekela, vamu nonene ku cilindakano nakumu haka mumbumbo. ³⁰ Vuno Kalunga ua mu shituile ku kuthsa. ³¹ Keho vamu muene matangua a engi kuli vaje vatundile nendi kutunda ku Ngalileya kuya ku Yelusalema. Vakevo ava vakaleho vendi ku vantu. ³² Ngeci tumi leka mudhimbu ua cili ou, uje ua kulahethele Kalunga ku vashukulu. ³³ Na vi puithamo hali etu kuvana vavo muku shitula Yesu. Ngue ku mathona a Visamo viamu civali: "Ove u munange, lelo nji na pu Yisho." ³⁴ Muku mu shitula ku vathsi linga muvila uendi keti uvople, Kalunga ua handeka nguendi: 'Njika mihana ua kulela na ikele naua civedhikitho ca litavathano kuli Ndaviti.' ³⁵ Muomu lievi ua handekele naua mu Visamo nguendi, "Ku u katavetha uoue uaKulela aka mone kuvola.' ³⁶ Muomu muje Ndaviti ua pangele ci yongola ca Kalunga ku nthimbu yendi, ua ile mutulo; ngeci va mu shitikile hamo nava shuku na muvila uendi ua muene kuvola. ³⁷ Vuno kuli uje Kalunga ya shituile naku jeneka ku uana kuvola. ³⁸ Ngoco vene vidhivukeni kuli yeni, kuva munanoko nguavo ou mumala ikeye ua mi ambuluilile mu kuecela vuvi. ³⁹ Hali ikeye uoshe amu thsiliela ava aka thambua ku viuma vioshe vije kuvia thambuele ku medhi a lishiko a Mosesa. ⁴⁰ Ngoco vene dhangamenu ku viuma viva handekele vapolofeto linga keti vitholoke kuli yeni. ⁴¹ "Taleni, eni vakua kayengula, komokeni na kunonga ; Muomu ange nji panga mu matangua eni, vipanga viaku komouetha nambe vami lekevio." ⁴² Keho Paulu na Mbalambasa omo va ile, vantu vava lombele linga vahandeke majiu a a akulifua kuSapalalo yaku shuamako. ⁴³ Keho omo ndhango ya mu sinangonga yahuile , vavengi vava Yunda nava vaka kupangela Kalunga va shuamene Paulu na Mbalambasa, vakua ku handeka navo nakuva mamuma muku tualelela mu kavumbi ka Kalunga. ⁴⁴ Keho mu Sapalalo yaku shuamako, vakungulukile voshe mukuvua medhi a Kalunga. ⁴⁵ Omo va Yunda va muene mbunga, va shulile na cipululu naku viana viuma via kuaniene Paulu hamo na ku mu shaula. ⁴⁶ Vuno Paulu na Mbalambasa va kuaniene na ku thimpa nguavo, "Ca pande haku livanga va ku kuanie lijui lia Kalunga. Muku mona muli naku li viana eni vavenia naku li thinganieka eni vavenia ngue kumuatha ku muono ua yaye, taleni, tuka litava ku vakua vifuti. ⁴⁷ Ngue omo mua tu shika Muene nguendi, "Njina kutumbika ngue ceke va vakua vifuti , linga va nehe vuovole kuoshe kua lenga mavu." ⁴⁸ Keho vakua vifuti va viuvuiule evi, via vaile ku vimbunge na ku shangala Njambi. Ngue kuvuingi vuavo vava hanguila kuku thselela muono ua yaye. ⁴⁹ Lijui lia Kalunga lia lishandelele mu cifuti cije coshe. ⁵⁰ Vuno va Yunda va sindiyile vakentu vaje va tsimanene na vamala vakua kushika mu cifuti. Va tuamekele kayando hali Paulu na Mbalambasa na kuva sheka mo mu nganda. ⁵¹ Vuno Paulu na Mbalambasa va li totomuene mbundu ku mianja yavo. Ngeci va ile ku limbo lia Ikoniumi. ⁵² Keho vandonge va shulile na nakujolela na Mpundhi yaKulela.