¹ Monande wa mukafumu, nakadidishi ngaghu vhurame ghano marongo nakukuronga ntani ghano marongo ghakare kehe pano mumutjima ghoye, ² ghano marongo ngagha kupa monyo waghure wa lirango, ngaghu paruke mumpora. ³ Shihoro na kulimburuka kapishi ngaghuvishuve; ghuna hepa kuvikumanga vikare muntingo yoye; ghuna hepa kuvitjanga vikare munda ya mumutjima ghoye. ⁴ Nkene ngaghuruwana vino vitikiliremo ndi ngaghukara na ghuhungami kushipara sha Karunga ntani vantu ngava kuhora. ⁵ Huguvara mwaHompa na mutjima ghoye naghuntje ntani kapishi ghuhuguvare mumaghano ghoye; ⁶ ntani vhuruka Hompa ghoye muviruwana vyoye navintje mposhi ngakuneyede ndjira ya ghuhunga ya kuvyukilira. ⁷ Kapishi ghukumone ashi ove wakara na ghukonentu wa unene; ghuna hepa kutjira Hompa Karunga ghoye kumwe na kushayeka kuruwana ghudona. ⁸ Nkene ngaghuviruwana vino ndi ngavikara yira mutondo wa kuvhura kuverura monyo ghoye kumwe nakuverura vironda vyamurutu roye. ⁹ Ghuna hepa kufumadeka Hompa ghutape limona lyoye kukwendi ntani ghuna hepa kutapa ndjambo yamuyangu wakuhoverera wa mulifuva lyoye, ¹⁰ nkene ngaghuruwana vino vitikiliremo vishete vyoye ngavi yura nambuto yayingi ntani vinyu yoye ngayikara yayingi unene, yimwe ngaghuyi pungura. ¹¹ Monande wa mumati, nkeneshi Hompa kuna kukuronga ghuna hepa kuterera ntani ghuna hepa kulimburuka nkeneshi ghuye kuna kukurondora, ¹² Hompa kuronga vantu vendi ovo ahora unene, yira momu vatapanga va vava marongo na madeghuro kuvana vavo ovo vahora ghunene. ¹³ Muna lirago ndjeghu akaro naghukonentu wakukwata lighano; ntani ghuye kushana kehe pano awane ndunge. ¹⁴ Ghukonentu wakara namulyo waghunene kupitakana wakutunda ku viSiliveli ntani ove wapitakana mulyo wa ngorodo. ¹⁵ Ghukonentu wakara na mulyo wa ghunene wa kupitakana mawe ghamawa ghandiro ntani kwato kehe vino wahepa vyakuvhura kushetakana kumwe nagho. ¹⁶ Ghukonentu kukupa ghuparuke na monyo waghure; ntani kukupa limona na lifumano. ¹⁷ Ghukonentu kuwapeka ghukaro ghoye ntani kuwapeka ndjira yoye ghuyendemo wandjewa-ndjewa yikare yina vyukiliri. ¹⁸ Ovo vakaro na ghukonentu mbo vakaro nalirago lyalinene; ghukonentu ngaghuvapa monyo. ¹⁹ Hompa kwashita livhu likarepo na ghukonentu wendi; ano mundunge dendi mbyo aturapo liwiru nalyo likareko. ²⁰ Mukonda ya ghukonentu wendi mbyo aturapo dimukuro dipupe mema ntani maremo atape mvhura yiroke na lime liwepalivhu. ²¹ Monande wa mumati, kara nandunge da ghuknentu dakuvhura kudimburura ghukwate lighano, nakadidishi ngaghuvishuve. ²² Vino ngavi kupa monyo waliparu waghure wa lirago nkene ngaghu dwata ghuno ghukonentu ghukare muntingo yoye. ²³ Makura ngaghuyenda mundjira yoye ya mpora ntani mpadi doye kapi ngadipunduka; ²⁴ opo ngaghu karara, kapi ngaghukara naghoma; ngaghurara nampora, ngaghurara turo twatuwa unene. ²⁵ Ntani kapi ngaghukara naghoma waku yita lidjonaghuro lyakukuharuka, lyakutunda kuva dini Karunga, nkene kuna shoroka, ²⁶ Hompa ngakara nove ngakuyoghora ntani kapi ngaku kengerera ashi ghulyate mushiraha ngashikukwate. ²⁷ Ove ghuna hepa kuruwanena vanaruhepo ghuwa, opo ngaghuwana unankondo dakuruwana vino viruwana. ²⁸ Ove nakuvhurashi ghutantere vamaparambo voye ashi, "Yenda, ghuvyuke, ngaghu kaye, yona ntani nganuya vikupa," nkeneshi kuvhura ghutape mbatero ya vimaliva mpopo pashirugho. ²⁹ Kapishi kughayarera vamaparambo voye ashi ghuva ruwane udona - ovo watunga navo mbyo vakuhuguvara. ³⁰ Kapishi kutangura na vantu maghoko-ghoko, nkeneshi kwato ovyo vakuruwana rumwe vyavi dona kukoye. ³¹ Kapishi kupakera mfudu vantu vakuruwana ghurunde ndi ghuhonene viruwana vyavo. ³² Hompa kushana-shana kehe pano vakuruwana ghurunde, ano ngoli vahungami ghuye kuva tura mundjira yendi ya ghuhunga. ³³ Mbyovyoshi Hompa kufinga mandi ghava dini Karunga, ntani ghuye kutungika mandi ghava hungami. ³⁴ Vakushwaura Karunga naye kuva shwaura, ntani ghuye kufera nkenda vantu vakukudidipita. ³⁵ Vantu vaghukonentu kukawana mfumwa, ano ngoli vagova kuvhukita ntjoni davo vavene.