¹ Monande wa mumati, ghuna hepa kuyuvha dino nkango dande ntani ghukwate ligha ghano marongo ghande mposhi ngaghu vhure kulimburukwa ghughatikitemo, ² ghuna hepa kukuronga ukonentu ghukare mukatji kamu mutjima ghoye. ³ Ghuna hepa kushana ukonentu ove ngaghukare mulimburuki nakadidishi ashi ngaghu ghushuve, ⁴ ghuna kona kughushana ghunene yira momu wa shananga shiringa ya Siliveli kumwe na limona lyaku horama, ⁵ nkene ngaghuruwana vino ntani ghaghuyiva ashi vinke vina kutanta vya kutjiran Hompa mposhi ngaghukare na lirago lya kukuronga ukonentu wa kuhamena kwa Karunga. ⁶ Hompa ndje atapango ukonentu naghuntje, kukwendi nko kwa tundango ghuyivi na ndunge. ⁷ Ghuye kutapa maghano kwa kehe ghuno wa kulimburuka kukwendi; ntani kupopera vantu vaghuhungami nava vakaro mughushili; ⁸ ghuye kupopera vakuruwana uhungami ntani kukunga vaku limburuka kukwendi. ⁹ Nkene aghukara na ukonentu, ntani ngaghu vhura kuyiva na kukwata lighano, vyaku hamena uhungami, na ushili ntani na ghuwa mposhi Hompa ngakuneyede ovyo ghuna hepa kuruwana uvitikitemo. ¹⁰ Makura ove ngaghukara na ukonentu mumutjima, mposhi ngaghukare na ruhafo rwa mumutjima. ¹¹ Ghuna ndunge ghoye ngaghu kupopera; ukonentu ghoye ngaghu kukunga. ¹² Ukonentu ngaghu kupopera ku udona, ntani ngaghu kughupa ghutunde kuvantu vakuruwana udona, ¹³ vantu ovo vatundo ku ghukaro wa uhungami mbyo vakara mumundema vakare va ndjoni. ¹⁴ Vantu vano kuhafera kuruwana udona ntani vavo kuhafera kuruwana urunde. ¹⁵ Vavo vantu vakuruwana urunde, ntani mumwavo mwato lihuguvaro muviruwana vyavo vyamu kahore-hore tupu. ¹⁶ Ukonentu ngaghu kupopera mukuvhura kushwena nkango da mukadi wakuhora vipara, ntani ngaghu kupopera kuva kadi varukeshe naku nkango davo dadiwa. ¹⁷ Mukadi wa kupira kufumadeka nkwara dendi namu kafumu ogho akwalire pawanuke mbyo avhurama nadimughano dendi dakupongoka kwa Karunga wendi. ¹⁸ Nkene aghuyendi kumundi wendi ove mundjira ya mfa ghuna kuyenda, ntani ndjira yendi ya kukutwara mushirongo shava fe. ¹⁹ Navantje ovo vayendango vakamudingure kwato kukavyuka ashi vaya wane nka ndjira ya monyo. ²⁰ Mpongolishi kwama shihonena shavantu vavawa mposhi ngaghu paruke mughukaro wa vantu va vahungami. ²¹ Vantu va uhungami mbongava yendo mushirongo shavo, ano ngoli vaghushili mbo tupu ngava kahuparomo vakatungemo. ²² Hompa Karunga ngaka tjidamo vadini Karunga mushirongo, ntani ngaka duramo varunde ngava tundemo yira momu vaduranga vimeno vitunde mo mulivhu.