¹ Vana vande, vavamati, tererenu kumarongo ghavashenu, ghatererenu mukwate lighano ngamukare na ndunge. ² Ame kuna kukupa marongo ghamawa; kwata lighano kapishi ngaghughashuve. ³ Opo nakalire pawanuke wande, ame pentjande mukafumu palira lyava vava nava nane, ⁴ va Vava kwatapire marongo kukwande ashi, "Ghupa ghano marongo ghugha kwaterere ghakare mumutjima ghoye; ruwana vino nakukutantera ngaghu kare na monyo. ⁵ Shana ngaghuwane ghukonentu ngaghukare nandunge dadingi; kapishi ngaghuvhurame ndi ngaghushuve ghano marongo ghana kutundo mukanwa kande; ⁶ kapishi ngaghu shuve ghukonentu mposhi ngaghu kupopere; ghuna hepa kuhora ghukonentu makura ngaghukuyoghore. ⁷ Shininke shamulyo osho ghuna hepa kushanapo unene, ghuna hepa kushana ghuwane ghukonentu ntani kwa kehe vino navintje vya peke ghuna hepa kushana ngaghuwane ndunge. ⁸ Nkene ngaghu hora ghukonentu wagho ngaghu kutura ngaghu kare muntu wamunene; nkene ngaghughutambura maghoko maviri ngaghu wana lifumano. ⁹ Ghukonentu ngaghu kudwateka mfumwa ngaghuyende kumeho; ntani ngaghu kudwateka nkata yaghufughuli pamutwe ghoye." ¹⁰ Terera, monande wa mumati, kumarongo ghande ghugha kwate lighano, ngaghu paruke monyo waghure kuntunda ya livhu. ¹¹ Ame nakuronga ghukonentu; mbyo nakuneyeda ndjira daghuhunga dakuvyukilira. ¹² Opo ngaghuyenda mundjira yoye, kwato ovyo ngavi kuwano ntani nkene ngaghu duka, kapi ngaghupunduka. ¹³ Tambura ghukwaterere ghano marongo, kapishi ghugha shuve; ghakunge, ngagha kare monyo ghoye. ¹⁴ Kapishi ngaghukwame vihonena vyava diniKarunga ntani kapishi ngaghuyende mundjira davantu vakuruwana ghurunde. ¹⁵ Tundamo, nakadidishi ngaghu yendemo; tundamo ghuyende ghukwame ndjira yoye ya peke. ¹⁶ Vadini Karunga nakurarashi nkene kapi vana ruwana ghurunde nkwandi dogoro vatoghone nakuvaka vatininike vantu vapundeke ntani vana kuvhura kurara. ¹⁷ Ghudini Karunga na ghukorokotji kukwavo yira ndo ndya davo odo valyanga na marovhu ghavo ogho vanwanga. ¹⁸ Ndjira oyo vayendanga vahungami kwafana yira ghukenu waliyuva olyo lina kushano kupuma lirupuke; lyalyo kutapa ghukenu ghuvhuke dogoro liyuva lirupukemo. ¹⁹ Ndjira yava diniKarunga kwakaramo mundema waghunene - ntani vavo kupunduka vawe palivhu ano ngoli vavo kapi vamonanga ashi vinke vina vapunduro vakugande. ²⁰ Monande wamumati, terera ghukwate lighano dino nkango dande; paturura matwi ghoye ghuyuvhe dino nkango nakughamba. ²¹ Kapishi ngadi tundemo mumoye; diture dikare munda yamu mutjima ghoye. ²² Nkango dande kutapa monyo kwa kehe ghuno wa kudiwana ntani kutapa ghukanguki murutu rwendi naruntje. ²³ Ghuna hepa kukunga ghutakamite mutjima ghoye ghukare na ndunge da ghuhunga, mukondashi monyo wa liparu lyoye mo watunda. ²⁴ Narumweshi ashi ngaghu vhure kughamba nkango da hana ghushili ntani ghuna hepa kushayeka ghufeke na vimpempa ghuvi tulire kuntere. ²⁵ Ghuna hepa kukenga na mantjo ghakuvhukilira ghukenge kumeho ntani kapishi ghunyongame ghukengere kuntere kuruha rumwetupu. ²⁶ Ghuna hepa kuyiva ndjira yoye oyo ghuna kuyenda; mpo ashi navintje ovyo ngaghu ruwana ngavitikiliremo. ²⁷ Kapishi ngaghu ruwane ghudona ngaghu kengere kuruha rumwe tupu kurulyo ndi kurumontjo; ghupa ntambo yalighuru lyoye litunde kuviruwana vya ghurunde.