¹ A ghamba kwavo. "Ghusili nakumutantera, mpovali vamwe venu pano kapi ngava makera mfa kumegho ngavakamone untungi waKarunga una ya nankondo." ² Kunyima yomayuva hamboumwe, Jesus a upu Peturusi naJakopo naJohanesi vayende kundundu panaumwavo. Alitjindji kunyima yavo. ³ Marwakani ghendi aghavembere ukenu wakukena kupitakanena, ukenu wakupitakana nkene ukenu pantunda yalivu. ⁴ Makura Eliya naMosesi avayamoneke kwavo, makura ava ghamba naJesus. ⁵ Peturusi a limburura nokutantera Jesus, ''Murongi, viwa kukwetu mukuyakara pano, tudikenu ngoli dimundwire ntatu, umwe woye, umwe waMosesi ntani umwe waEliya. ⁶ (Uye kapi a yivire evi a ghamba, vavo, ava kara nowoma.) ⁷ Liremo aliya makura mundwire auvafiki. Makura naliywi alitundu muliremo ,'' oghuno nge monande wakuhora. Teyererenu kukwendi.'' ⁸ Mpopo tupu, opo vakenga-kengire, kapi vavhulire kumona mpindi umwe nkwandi Jesus. ⁹ Apa vatundire kundundu vaghurumuke, ava rawire mukuvatantera kwato umwe owo vanamono dogoro Mona Muntu anavhumbuka kuufe. ¹⁰ Ava litulikire mbudi kwavavene, mara ava vikuyongo vavene ''kuvumbuka kuufe'' vina tanta. ¹¹ Avamupura, morwa nke vatjangi vomatjwangwa vaghambera asi Eliya a kuhove?'' ¹² Jesus ava limburura asi, ''Eliya nge nga hovo kuya, a ya wapayike navintje. yira momu gha tanta matjangwa kutwara mumona muntu? ¹³ Mara kunakumutantera asi Eliya kare a ya, makura vavo mbyo vaya muruwanine kehevino vaholire kukwendi, yira momo vavimutjangera.'' ¹⁴ Vanasisongero vendi apa vayire, Avamono mbunga yinavakundurukida, vamatjwangwa kuna kukukanana kumwe navo. ¹⁵ Opo vamonine Jesus,mbunga nayintje avahafa nakudukira kukwendi vakamumorore. ¹⁶ A pura vanasisongero vendi, ''Vinke munakukanana navo?'' ¹⁷ Umwe mumbunga amulimburura, ''Murongi, nayita monande wamumati koye. Anakara nampepo yinakumurenkito a pire kughamba. ¹⁸ Ava mukwata no ku muvhukumina palivu, okuno uye ntutu kukunwa, alikwetja mayewo nokulitjindja. ''Napura vanasisongero voye vayitjidemo mara kapi vanakuvivhura,'' ¹⁹ A limburura, ''anwe vokupira kupura, siruwo sokutika kuni ngani vura kukara nanwe? Siruwo sokutika kuni ngani tokomena kumwe nanwe? Mundjitirenu,'' ²⁰ Ava muyitire mumati. Mpepo opo yamonine Jesus, mpopo tupu ayi muvukumine na kumupukita. Mumati awere palivu no ntutu yendi kukanwa. ²¹ Jesus apura vase, ''Vikando vingapi anakara weno?'' Vase ava limburura, ''kutunda wanuke wendi. ²² Kasa vimuvukumine mumundiro ndi mumema nokuseteka vamudjonaura, ntjenesi kuvura uruwaneko kehevi, kara nonkenda kukwetu nokutuvatera.'' ²³ Jesus a mulimburura asi, ''Ntjene kuvura? Mu vininke navintje hepero kogho a karo nalipuro kwa navintje.'' ²⁴ Makura vase vamumati ava yiyire asi, ''Navipura! mvhatere kwevi nadili kupura.'' ²⁵ Jesus opo a monine mbunga kuna kuponga, a swena mpepo yokunyata nokuyitantera asi, ''Ove mpepo yo kupira kughamba nokuyuva, Kuna kukurawira urupukemo mwendi ntani kapisi ngo vyukiremo nka.'' ²⁶ makura mpepo yokunyata ayitakuma unene no ku munyunganga mwanuke dogoro ayi rupukamo. Mumati amonikire yira kuna fu, singi savantu ava ghamba asi ana fu. ²⁷ Enne ngoli Jesus a mukwata kulivoko, nokumukwata a musapwite, mumati mpo a yimanine. ²⁸ Opo a yire Jesus kumundi, vanasisongero vendi a vamupura kumpengi, ''morwa nke yina tuvhulire kuyitjidamo twe?'' ²⁹ Ava tantere. ''Evino ku vitjidamo nkwandi makanderero nalidiliro makura.'' ³⁰ Ava tundumo munya vapitire yaGalireya, mara Jesus kapi a holire kehe uno a yive oku vakalire. ³¹ Morwa uye kwarongire vanasisongero vendi, ava tantere asi, ''Mona Muntu nga va mutapa mumawoko wovantu, nga vamudipaye. Enne ngoli kunyima yo mfa dendi ntjene nga pa pita mayuva mata makura nga kavumbuka kuufe.'' ³² Enne ngoli kapi va vikwatire lighano, ava tjira kuvi mupura. ³³ Makura ava ya kuKaperenaumu. Apa vakatikire mumundi Jesus ava pura asi, ''Vinke munakuyongo mundjira?'' ³⁴ Enne ngoli ava mwena. Morwa vavo kwakukananine asi are a pitakano po vaunyendi. ³⁵ A sungire, a yita vanya murongo nambili kumwe nokuva tantera, ''ntjene mpwali owo ana horo a kare wokuhova, akare wokuhulilira mukatji kenu, a kare nka mukareli wenu namuvantje.'' ³⁶ A upu mwanukewona a muyimaneke mukatji kavo. a mukukumbatere mawoko ghendi no kuvatantera asi, ³⁷ ''Kehe uno ngawano mwanuke yira ngeuno mulidina lyande, ame ana tambura; enne owo a ntamburo, kapisi ame a tambura ngoli ndjewo a ntumo.'' ³⁸ Johanes a ghamba kwendi, ''Murongi, atwe twa monine muntu kuna kutundita mpepo dodidona mulidina lyoye, mbyo twa musayikitire, mbyevi kapi a tukwamanga.'' ³⁹ Enne ngoli Jesus a ghamba, ''Mwa sa musayikita, morwa ogho a ruwanango sitetu milidina lyande, kapi a vhure kungamba momudona mpopo.'' ⁴⁰ Kehe uno a piro kulilimbika natwe, uye wetu. ⁴¹ Morwa kehe uno nga mupo nkinda yo mema mulidina lyande mbyevisi uye kwa hamane kwa Kristusi, usili nakumutantera, kapi nga kombanita ndjambo yendi. ⁴² Umwe owo ngapukito vanuke ovo vapuro mwande, wo ngoli ana hepa kumumangerera liwe muntingo no ku kamuvukumina mulifuta. ⁴³ Ntjene liwoko lyoye lyakurenkitango udjone, kulitetako. hansa nkene ungene muliparu lya urema kupitakana nomughukarera mawoko mavili owo nga gha kutwalidiro mumundiro waSatana, mundiro wakudira kudimita ⁴⁴ Oko vyakara vimbumburu no mavinyo wokupira kufa no mundiro wo kudima. ⁴⁵ Ntjene mpadi yoye lya kupundukitango, yiteteko. uwa unene ntjene ungene muliparu lyo urema kapisi nomu ukara mauru mavili nga va ka kuvukumine mumundiro waSatana. ⁴⁶ Oko vyakara vimbumburu no mavinyo wokudira kufa no mundiro wokudira kudima. ⁴⁷ Nangesi mantjo woye ku kudjonita, liupemo. uwa unene ngo kangene mu untungi waKarunga no lintjo limwe kapisi nomu ukara namantjo mavili nga va ka kuvukumine mumundiro waSatana, ⁴⁸ omo ghakara vimbumburu vyokupira kufa, no mundiro wakudira kudima. ⁴⁹ Kehe uno nga va mutova no mundiro. ⁵⁰ Mungwa uwa, enne ngoli ntjene mungwa aghu kombanita utovara wagho, weni omu urenka ukare mungwa nka? karenu no mungwa mwanaumwenu mukatji kenu, ntani mukare no mbili mukatji kenu.''