¹ Muntu wa Karunga atundu ku Juda ku nkango ya Karunga atamba ku Beteli. Jerobiyamu kwa yimanine kushidjambero mukushwakerera vya shidumba. ² Ghuye ayiyiri kudivyuka shidjambero ku nkango ya Karunga: '' Shidjambero, shidjambero! Ovino mbyo ana kutanta Karunga, 'Mona, Monarume wa lidina Josiya ngava mushampuruka kuruvharo rwa Dafiti, ano papoye ghuye ngaya djamberapo varuti va mavango aku tuntuka ovo vana kushwakerero vya shidumba papoye. Papoye ngava ya shwakerera vifupa vya untu,'''' ³ Makura muntu wa Karunga atapire shiyivito liyuva lya kukufana, nakughamba, '''' Shino ntjo shiyivito osho atanta Karunga: Kenga, shidjambero ngashi kugaunuka, ano mutwitwi wapo ngaushotohapo,'''' ⁴ Opo Hompa wayuvhire ovyo muntu wa Karunga aghambire, '' Amu neghe.'' Ano livoko olyo aneyitire muntu wa Karunga ali kukuta, kapi asholire waro kulivyuta kwa mwene. ⁵ ( Ano shidjambero ashi kugaunuka ano mutwitwi aghu konkomokapo, shikare shitimwitira kushiyivito osho muntu wa Karunga atapire kunkango ya Karunga) ⁶ Hompa Jerobiyuma alimburura na kuva tantilire muntu wa Karunga, '' Nakanderere kuliferonkenda lya Karunga ghoye nkanderereko me, mposhi livoko lyande livyuke waro kukwandi.'' Ano muntu wa Karunga akandilire kwa Karunga, ano livoko lya Hompa alivyuka kukwendi waro, nka alikara shika momo lyakara kare. ⁷ Hompa aghamba kwa muntu wa Karunga, '' Yiya kumundi kumwe name nka kulyaureko, nka ame kuni kakupa mfuto.'' ⁸ Muntu wa Karunga aghamba kwa Hompa, '' Nampiri ndishi umpe ukahe wavi weka vyoye , Ame kapi nivhura kuyenda nove, kapi nilya ndya ndipo kunwa mema mu livango lino. ⁹ Konda Karunga kwandawira me kunkango yendi, ' Ove kapishi ngaukalye mboroto kwato kunwa mema, na kuvyukashi ndjira oyo ngauyenda. ''' ¹⁰ Makura muntu wa Karunga aghupu ndjira yayo nayo makura kapi avyukilire kumundi wendi nandjira oyo aruwanitire pa kuyaku Beteli. ¹¹ Makura kwa kalire muporofete waku kurupa mu Beteli, ano monendi umwe kwayire na kuyamutantera navintje evi aruwanine muntu wa Karunga liyuva olyo muBeteli vana vendi navo nka ava mutantere nkango nadintje odo muntu wa karuna atantilire Hompa. ¹² Shavo aghamba kukwavo, '' Nayiva yakuni ana yendi? '' Vana vendi vamonine ndjira oyo muntu wa Karunga aruwanitire yatambo ku JJedeya. ¹³ Ghuye atantere vana vendi, '' Nkutilirenu dongi.'' Vano ava kutiri shidongi ano uye arondo pasho. ¹⁴ Muporofete wa kurupo ayendi munyima ya muntu. wa Karunga na amuwana uye ana shungiri munda yashitondo sha ukuyu; na kugha kukwendi, '' Ove muntu wakarunga anatundo ku Judeya?'' Ghuye alimburura shi. '' Ame uno.'' ¹⁵ Makura muporofete wamukurukuru aghamba kukwendi, '' Yatuyende kumwe name uka lye kundya.'' ¹⁶ Muntu wa Karunga kwa limburulire, '' Ame kapi nivhura kuvyuka nove kapi niyenda nove ndipo kulya ndya na kunwa mema kumwe nove muno mulivango, ¹⁷ kondashi kuna vindawiri ku nkango ya Karunga, ' Ove nakalyashi ndya na kunwa mema kunya, nakuvyukashi ndjira oyo unaya.'' ¹⁸ Muporofete wa mukurukuru aghamba kukwendi, '' Name nimupumbi yira ove, ano mu engeli kuna ntantere me kunkango ya Karunga, nakughamba, ' Kamuvuyte akaye nove mumundi ghoye, mposhi aya lyeko ndya na kunwa mema. ''' Ngoli uye kwa kongire tupu muntu waKarunga. ¹⁹ Makura muntu wa Karunga avyuka na mupumbi wa kukurupa na kukalya ndya mumundi wendi na akanwine mema. ²⁰ Kuno vavo kuntishe, nkango ya Karunga yayire kwa muporofete ogho aka muvyutiro, ²¹ ayiyiri kwa muntu wa Karunga ogho atundiro kuJudeya, nakughamba, '' Karunga kuna kughamba, konda ove kapi una limburukwa ku nkango ya Karunga, Karunga ghoye akupa, ²² mbyo una vyuka na kuyalya ndya na kunwa mema mulivango olyo Karunga kakutantershi kwa kulya ndya na kwato kunwa mema, rutu roye kapi ngava karuvhumbika mumbira ya vasho.'''' ²³ Muruku apa amanine kulya ndya naku nwa, mupumbi akutiliri dongi muntu wa Karunga, ogho avyukiro kumwe naye. ²⁴ Apa muntu waKarunga ayendire, agwanekere na nyime mundjira yendi na kumudipaya, ano shimpu shendi ashi shuvu kundjira. Ano dongi ayi shiyimamnene, ano nyime naye ayimanene pa shimpu. ²⁵ Ano vantu pakupita po ava mono shimpu pa ndjira, ano nyime naye kuna yimana kushimpu, ava ya vitanta mumbara omo atungire mupumbi wa kukurupa. ²⁶ Apa ayuvhireko muporofete ogho aka muvyutiro mundjira yendi, uye aghamba, '' Ogho muntu waKarunga ana diro kulimburukwa ku nkango da Karunga. Konda yavyo Karunga ana mutapa kwa nyime, kuna muremayike na kumudipagha, shika momo nkango ya Karunga yina murondora.'' ²⁷ Makura muporofete wa mukurukuru atantere vana vendi, aghamba, '' Nkutilirenu dongi yande, '' Vavo ava mukutiliri. ²⁸ Ghuye ayendi na Kawana shimpu kundjira, na dongi na nyime vana yimana pa shimpu. Nyime kapi avhulire kulya rutu, kapi ahomokelire shidongi. ²⁹ Mupumbi adamuna shimpu sha muntu wa Karunga, kushirondeka pa dongi, na kashivyuta. Ayire kumbara ya mwene ayalire na kumu vhumbika. ³⁰ Arangeke shimpu mu mbira yamwene, na kwamulilire, aghamba, '' Ghuu, mughunyande!'' ³¹ Muruku rwa kumuhoreka, mupumbi wamukurukuru atantere vana vendi, mukughamba, '' Apa ngani fa, kumvhumbika mbira omu na vhumbika muntu wa Karunga. Kurangeka vifupa vyande kuntere ya vifupa vyendi. ³² Ano kumbudi eyi angambipalire ku nkangio ya Karunga, kudivyuka shidjambero sha muBeteli na kudivyuka mandi naghantjeya gha mavango gha kutuntuka mumbara da Samariya, ngavishoroka.'' ³³ Muruku yauvino Jerobiyamu kapi aku vyutire kundjira yendi ya yidona, atwikiri kuneghe mbunga ya varuti kutunda mukatji kavantu. Kehe uno wakuruwana uye kumwe waveka akare muruti. ³⁴ Kughundito uno ayiya kara ndjo kulipata lya Jerobiyamu na vya renkitire valipata nye vavadjonaure na kuvadongonwenako kutunda ya livhu.