¹ Njite Job shepa, lriaco: ² Mjaidadalritnasa njoa corridalrinatsa coadaca. Cayoca njoa inapati mjaidadalrim sho. ³ Coanji picaiteca yacoti lrirso jliaji manjicadalrim, njite picaite yanjikjeti naco lrirso. ⁴ ¿Cocao ikitsindata pjia caacócarro pjia cayo? ¿Coca icaolremi jliaji yofalri pinaco icadalri caacoca pjia cayo? ⁵ Njaji mayamperri iticomalriwa oomi macapawan lrico njite pjiomi njaji iofacapewa ooni ricó, natetjewa nafio capoa. ⁶ Jliaji irrirri, corrin coca lritaita lridawaca Dio ioya, njite jliaji imatsiketacada corrin lritaita lridawacawa Lrioya. ⁷ Lricadaa njaji eenocoma corricawatsa coca pacapa, njite corritsa coca nacoca Lricadaa jiipai irroa. ⁸ Lriwaketa njaji ooni iyadaoca jipandadalri ricó, njite corrin njamiñaca imjeco njaji iyadaoca. ⁹ Dio iita lriecoa jliaji kérri, Lricadaa iyadaoca iitacan pjiomini. ¹⁰ Lrikjenanata ooni yekjoete naco, cadaocadalri iocacawa camarrai iapiya. ¹¹ Eenocoma irrocawa naco itetjewa Dio icoita cádanacon. ¹² Dio Jiida sho Lrimananita jliaji Macapawan cafaina cádanacon. Jliatsa iino jliaji maficalri ooni ricoda Rahab-dalri iipitana. ¹³ Lripjianialre sho lripiyo eenocoma yekjoete. Jliida sho lriwitita jliaji omawalri ipitocadatjawa Lrioya. ¹⁴ Njaji Dio inaitjalri, lricañjata shopa wacapa tsopetsa Lritaita catsa lrinaitjaca cocacatsa. Lriacoami memadalritsa cafaina pjemicani. ¿Corrin coca itaita yanjica coanshopaca Jliida kjaidadalri naco?"