¹ Caaco pja Job, lriaco: ² ''Cayoji ajádalri capisho caafica Dio, Jliaji corridalri ioma inaitjaca norso matsia, jliaji Jidati iminalri, Jliaji icadalri kerroaca njoa, ³ niini cafi cádanaco toa njoa, Dio icadaa cádanaco toa njorra carrotoa caolri njotaco lrico, cayoatsa nonaitjaca. ⁴ Corriotsa nonoma imotoitácarro yacoti matsiperri, corri tsakjaotsa noenene icatsatá carroca; ⁵ corriotsa nocaité carroca ajádalripeca njaji yacoti icaiterri norso; corri coca naco nomatada, cayotsa nocaiteca nonacowaca a kjerrecatsa mayami njoa. ⁶ Caafi cádanacotoa njoa corriotsa yami carroca njoa nocaitecawa nonacowaca mamatsicanadalri catsa njoa. Caafi cádanaco njoa corriotsa nonaitjá carroca nomatsicanawa icadacape namacoadataca njoa. ⁷ Nacapaotsa maatsi narso njaji nocoema pacapacaji narso njaji inaicape maatsi. Nacaitepeotsa maatsi lrinaco jliaji yemalri nokjoete. ⁸ Ima, ¿cocao matsiadalri lriwapa Dio iinai jliaji atsia maatsídalri corri capoa lrioma Dio lrirsowao, Dio jita cádanaco lrioya lricafica? ⁹ Corriotsa Dio jimí carroca lriya cádanaco naikjaote njaji matsiperri inolri lrikjaolre. ¹⁰ Corriotsa catimá carrocani Dio iinai, corrin tsakjaotsa lritaitá carroca lritatjaca Dio iinai lrioma cádanaco. ¹¹ Nocananta watsa sha DIo jiida naco; corriotsa nodawá carroca ioya Dio iwaopiakje. ¹² Icapa, njite pjiomi sha icapjentsa coajidalrica Dio jiida; niini ¿coada caco sha macadatsa? ¹³ Icatsa cayoji Dio icada jlirrapitaca jliaji inaiki matsidalritsa, Jidati iminalri imatsietanda lripia jliaji jirrapitetacada apjetsida: ¹⁴ Narso cádanaco aima nenipe, icamitsa nainocana matseta sho; njite njaji nanakjoiteperri corriotsa narsocarroca aima naiñjaope. ¹⁵ Njite njaji yomjéperri naoya yococaperri inocaotsana, njite corriotsa madoiyoanaipe iiyácarroca nanaco. ¹⁶ Lriwaketa cadaa aima lripalrataniwa jiipai imaimaca sho, njite aima lritsayan caalri imaimaca sho, ¹⁷ lriwaketa aima jlietacashopawa, mitsa nja watsa sheta lrioyana njaji inaiki matsiaperritsa, njite njaji mamatsicanaperritsa naawatsa narsowaca njaji lripalratanim. ¹⁸ Lrinaitja lriipanao cayoji eeni inaitja capisho lriipanao, cayoji iwapacaperri yacaalre inaitja capisho nawapa carroda lrico. ¹⁹ Lriorsoawa canaanidalri imaa capisho lriorsoa carroda lrico, mitsa corriotsa cayocarro minitsani; ima nawayacacaotsawa lrioya pjiomi njaji lrirsonipe pia. ²⁰ Ima aima matsiperri íno caotsa lrinacojle cayoji ooni iowapoa íno capisho paikjaolre; caolri kjaidadalri idee caotsani deepi ricó. ²¹ Jliaji caolri ipiacada jérri imotolri njiteo lridee caotsani teeco, lripeeco caotsani teeco lriipana ioya. ²² Jliaji caolri kjaidadalri lria mayacan lrikjaolre, njite corrin kjena lricapaca lrirso lriñá cádanaconi. ²³ Lriñaa lricaapi ricó lricácarro lricao; lriwiñja lrirso tekjoitetsa lrimotoitá carroni lriipana ioya.