¹ Cho Mosesa wakungulwile ndandanga yoshe ya Isalela na kwendeka kuli bakebo ngwendi, " Ebi bikebyo byuma bya na mishiki Njambi ngwendi mulinge. ² A matangwa a tanu na limo munatha kupanga bipangi, olojo kuli yeni, lije litangwa lya muchitanu na abali lyapande ku kala litangwa lya kuthzila, litangwa lya Sapalalo ya kuhwima mwoshe, lije lyaku thzila kuli Njambi. Chojo woshoni uje ya linga chipangi chili choshe a litangwa lije banapande lika ku mu thsiya. ³ Kumwa pandele numba kubweka lika tuhya mu bi njubo byeni a litangwa lya Sapalalo." ⁴ Mosesa wendekele lalo ku ndandanga yoshe ya Isalele, ngwendi, "Echi chikecho cha na kambeya Njambi. ⁵ Neneni mulambu kuli Njambi, yeni mubaboshe muli na mbunge ya kuthzanga kulinga ngocho. Neneni mulambu kuli Njambi - ngolinde, siliva, bunengu, ⁶ bya ku thzibuluka, bya kubenguluka, na maaka a kubanga na minanga bya bibwa bya linyu; maaka a bimembe; ⁷ bilambu bya bankomba ba tununu bya kumbwitika mu bulombo bwa kubenga na bilambu bya ku futungula bwino; biti byakukola bya akasiya; ⁸ mathzi a kwaka mu bindeya bya mulili (chibatulo cha) kuthzila muje mu njubo ya malombelo, ng'undu ya kwaka mu mathzi a kubwabetha na kwaka insense ya kunikila lwengo lwa lubwa, ⁹ mamanya a mingolila ya bulombo bwa kuli thethzathethza namamanya a kwabo a theo (ndando) ya kama a kwaka kangamwina na a kananga kaha nulo. ¹⁰ Woshe uje nalilongetha chipangi na ku chitanekeya bwino akati keni napande kwija nakulinga chije choshe Njambi na kambeya - ¹¹ mbalaka na tende yayo, nebi bya ku ifwikamo, na mashemi ayo, na bibuliko byayo, na mambanthze, na bimanda, na mathanda, ¹² cho lalo na chikasha na mikambo yacho, na chifwiko, na libamba lya kuchi shwekamo. ¹³ Cho banenele metha na mikambo yayo, na bibala byayo byoshe, na likende lya mulambu; ¹⁴ na chitumbikilo cha bindeya, na bibala byacho, na bindeya byacho, na mathzi a mu bindeya; ¹⁵ na mutula wa kwenyekelaho insense na mikambo yawo, na mathzi a ku bwabetha na insense ya ku nikila lwengo lwa lubwa; na libamba lya ku chikolo cha mbalaka; ¹⁶ na mutula wa milambu ya kulumba na lipito lya bunengu na mikambo yalyo na bibala byalyo; na mbashiya yakama ya ku jwelela na lithanda lyalyo. ¹⁷ Cho banenele mabamba a ku chipango na bimanda byacho na mathanda, na libamba lya lu chikolo cha chipango; ¹⁸ na bipambalingo bya ku tende ya ku mbalaka na ku chipango; na bipambalingo bya ku tende ya ku mbalaka na ku chipango, na mikole yacho. ¹⁹ Cho banenele buthzalo buje bubatungile mwa butongwe manene ngechi ba bu pangethe muje mu mwela wa kuthzila, buje buthzalo bwa kuthzila bwa ku thzala kapilisitu Alone na bana bendi ba banalume, mangana bathe kupanga ngwe tupilisitu." ²⁰ Kathinoni miyati yoshe ya Isalele ya tundile ku mesho a Mosesa na ku li ila. ²¹ Cho woshe uje mbunge yendi ya mutwamenenenemo na munthzinthzime wendi wa mu thzangethelecho wethzile na ku nena mulambu kuli Njambi wa ku tungitha mbalaka, na kunenamo bibala byoshe bya ku pangetha muje, na buthzalo bwa kuthzila bwa muje. ²² Cho bethzile, na banalume na banakathzi, boshe baje bakele na mbunge ya kuthzanga kulingamo. Ngechi banenele bimande bya ku balama, bimbilingwa, tuthzeya, na bikwabo bya kunena mbwathe mu njubo, byuma bya miyati yoshe bya kupanga na ngolinde. Boshe ba nenele milambu ya ngolinde kupwa mulambu wa ku jundula kuli Njambi. ²³ Uje woshe ya kele na bwanda bwa ku thzibuluka, bwa kubengaluka, indi bwa kubenga, nanga ya ibwa ya linyu, maaka a membe, bilambu bya bankomba ba tununu bya bulombo bwa kubenga, indi bilambu bya ku futungula bwino wabi nenele. ²⁴ Uje woshe ya lingile mulambu wa siliva indi wa bunengu wa unenele ngwe mulambu kuli Njamb,i na uje woshe ya kele na biti bya ku kola bya akasiya bya kwatha ku pangetha muli bije bipangi wa binenele. ²⁵ Cho munakathzi woshe wa kulilongetha kwombola bwanda wombwele bwanda na maboko endi na kunena bije bya ombwele - bwa ku thzibuluka, bwa ku benguluka, indi bwa ku benga ngengu, nambe nanga ya linyu. ²⁶ Boshe banakathzi baje bimbunge byabo bya ba twamenene cholalo bali longethele butongwe bwa kwombola bombwele maaka a bimembe. ²⁷ Cho ba ntwama banenele mamanya a mifunda ya bulombo bwa miyati ya ingi na mamanya a kwabo a theo a kwaka mu kangamuna na a nanga ya ha nulo; ²⁸ cholalo banenele ng'undu na mathzi a kwaka mu bindeya, na mathzi a ku bwabetha, na mu insense ya lwengo lwa lubwa. ²⁹ Cho ba Isalele banenele kuli Njambi mulambu wa chithzango cha munu babenya; munalume woshe na munakathzi woshe uje mbunge yendi ya thzangele wanenele bya ku pangetha kuli bije bipangi byoshe Njambi wa ba kambeyeye kulinga kwitila muli Mosesa. ³⁰ Cho Mosesa wendekele kuli ba Isalele ngwendi, "Kengeni, Njambi na thana lithzina ou Mbezalelu; muna Uli wa munalume muna Heli wa munalume, wakumuyati wa Yunda. ³¹ Nashulitha munthzinthzime wendi muli Mbezalelu, ngechi a mwane maana, ku thzibithitha, na ku theubuka, bya kulikwathetha mu bipangi byoshe bya butongwe, ³² mangana athe ku shoba na ku shobahana bije bya butongwe bya ku lithethzathethza na ku panga mu ngolinde, siliva, na bunengu, ³³ cho lalo na mu kuteta na kulamuna mamanya na ku wa lameka bwino na ku shonga mabaya - na kulinga bipangi byoshe bya ku nungathana nungathana na butongwe. ³⁴ Chojo nakechi mu mbunge yendi mangana a longethe, yikeye hamo na Oholiambu muna Ahisamaki wa munalume, wa kutunda ku muyati wa Ndani. ³⁵ Naba shulithamo na butongwe bwa kulinga bipangi byoshe bya ku lithethzathethza, ku panga ngwe banu baka butongwe, ngwe baka ku taleka a mamanya na a bibala bikwabo, ngwe baje baka ku chela binanga bya linyu na bwanda bwa bulombo bwa kuthzibuluka, ku benguluka, na kubenga ngengu, cholalo ngwe baje baka kutenga binanga. Chojo ba napu batongwe mu bipangi byoshe bya kuli thethzathethza, cholalo banapu ba butongwe mu bipangi bya kunungathana nungathana na mu kutunga.