¹ Cho Shukulu wendekele kuli Mosesa ngwendi, "Tundeni kuno, yobe na banu aba una tunditha kuje ku lifuti lya Ingitu Yeni ku lifuti lije nja li thingilileho laja kuli Abilahama, kuli Isaka na kuli Yakomba, ngwe omu njendekele ngwange, 'Njika lyana kuli chithemunwina cheni.' ² Nji twameka kangelo kange kulutwe lweni, chojo nji ka tundithamo baje ba ka Kanana, ba Amolite, ba Hitate, ba Pelizale, ba Hibate, na ba Njebusate. ³ Yeni ku lifuti lije, lije lili na ku wehumuka na mashwe na buuuki, olojo yangeni kunji i neni, mwafwa mwapwa mu banu baje ba ku kaluwa bimbunge na ku jeneka kuthziba. Cho njinatha ku minyongethela bene mungila." ⁴ Cho omo banu bathzibile awa majwi a makalu ngachije, ba lilile na kuli shoshoma, chojo na umo wabo wai ya thzalele bije bya ku thzalela thenga. ⁵ Mwafwa Shukulu wendekele kulu Mosesa ngwendi," Endeka kulu aba ba Isalela ngwobe, 'Mubanu ba ku kaluwa bimbunge. Cho umona ngwe ngwabo njiye neni amolika nameme bene a kathimbu ka kandondo lika, cho ngwe nji mi nyongetha. ⁶ Cho kumani, shululeni bije bi muka thzalela thenga byoshe mangana nji thinganyeke binji ba pande kulinga neni. ⁷ Cho Mosesa wambatele tende na ku ishimbika anja ya chilombo, kulyala kama ndondo na chilombo. Cho waitumbwile ngwendi ikeyo tende mwakuli wanena . Chojo woshe uje yalombele Njambi chuma choshe waile kuje ku tende ya kuliwanena, kunja ya chilombo. ⁸ Kumona ngwe Mosesa aya kuli ije tende ya kuliwanena, cho banu boshe bakele na kwimana ku bikolo bya bimbalaka byabo na ku talela Mosesa kweta noho na kobela mukati. ⁹ A thimbu yoshe Mosesa wakele na ku kobela mu tende, cho ngunthzi ya lishewa yakele na ku thzethzumukila athi na kwimana ku chikolo cha tende, cho na Njambi wakele na kwendeka na Mosesa. ¹⁰ A thimbu yoshe banu boshe bakele na kumona ije ngunthzi ya lishewa imana kuje ku chikolo cha tende, cho bakele na ku katuka na kulemetha, munu woshe ku chikolo cha tende yendi. ¹¹ Chojo Njambi wakele na kwendeka kuli Mosesa mesho na mesho, ngwe munu ali na kwendeka na kabuthamba kendi. Cho na hanima Mosesa wakele na kwiluka ku chilombo, olojo ngamba yendi Yoshwa muna Nunu wa munalume, uje wakele mukwenje, wakele na kukola bene muje mu tende. ¹² Cho Mosesa wendekele kuli Njambi ngwendi," Kenga, unakala na kwendeka kuli yange ngwobe, 'Twala ba banu mubungenthzi bwabo,' olojo kuwa njilekele munu ou njiya nendi. Wendeka laja ngwobe, Njikathzubuka a lithzina lyobe, cho lalo una wana kubethzika mu mesho ange.' ¹³ Chojo ngwe chilibene njina wana kubethzika mu mesho obe, cho kumani nji lekethe bingila byobe mangana chilibene njikuthzubuke bwino mangana nji twaleleleho kuwana lino lifuti likelyo bene banu bobe." ¹⁴ Cho Njambi wa kumbulwile ngwendi, " Yange babenya bene njiya nobe, cho njika kwana kuhwima," ¹⁵ Cho na Mosesa wendekele kuli ikeye ngwendi," Umononi ngwe yobe babenya ku uyi netu, cho kumani kethi utu tundithe bene kuno. ¹⁶ Mwafwa cho chikaloni bati kulinga ngwabo banu bathzubuke ngwabo nji na wana kubethzika mu mesho obe; yange na banu bobe? Kumani kuchipu lika kabanga ngwe yobe uya netu mangana yange na banu bobe tukale ba ku lyandununa na banu boshe bakala ano akaye." ¹⁷ Chojo Njambi wendekele kuli Mosesa ngwendi," Njikulingila lalo nechi bene chuma una unanjilombo, mwafwa una wana kubethzika mu mesho ange, cholalo njiku thzubuka a lithzina." ¹⁸ Ngechibene Mosesa wendekele ngwendi, "Njikulomba, ngwange njilekethe bumpau bwobe." ¹⁹ Chojo Njambi wendekele ngwendi, "Njititha bungulu bwange bwange bwoshe ku mesho obe, na kwambulula lithzina lyane 'Njambi' kumesho obe. Njikakala na ngothzi kuli uje unjika lingila ngothzi. Cholalo njika sholwela ng'eke kuli uje njika sholwela ng'eke. ²⁰ Oloni Njambi wendekele ngwendi, "Kuwatha kumona chihanga change, mwafwa na umo wai yatha kunji mona cho ayoye lalo." ²¹ Oloni Njambi wendekele ngwendi, "Kenga, kuli ou mwela kuno kuyehi nange; yobe wimana hali eli limanya. ²² Omwoni bumpau bwange bwita kuyehi, cho yobe njikwaka mwithi ya limanya na kukufwika na liboko lyange kweta bene noho njiku tubakana. ²³ Cho kathinoni njiku tunditha liboko lyange, ukamona nima yange, olojo chihanga change ku uchimono embwe."