^{1 2} Njambi wendekele kuli Mosesa na Alone mu lifuti lya Ingito. Wendekele ngwendi, "Kuli yeni, ngonde eyi ikala yaku ya kuputukilako, ngonde yakulibanga mu mwaka kuli yeni. ³ Leka mbunga ya Isalela, 'Halitangwa lya bulikumi ya ino ngonde munu na munu akambata muna manga nambe muna membe, nanga yoshe yatela kulinga echi, muna manga ha nanga ya munjubo. ⁴ Oshe ngwe nanga ya munjubo yayindondo ha muna manga, munalume nauje mukwabo na lyata nendi napande kwambata muna manga nambe thitu ya muna membe yije yapande kupwithamo na theteko ya banu. Yapande kukala ya kupwithamo kulya ku boshe, cho lalo bapande kwambata thitu yayingi ya kulitha boshe. ⁵ Muna manga nambe muna membe wobe wakujeneka kapenga, nkomba ali na mwaka umo. Munatha kwambataho umo hali manga nambe bimembe. ⁶ Mwapande kumunyunga kweta halitangwa lya bulikumi na awana ha ngonde ije. Cho lalo mbunga yoshe ya Isalela banapande kuthsiya aba bimuna ha kaboko bwii. ⁷ Mwapande kwambatako maninga amo na kuwakwita ha bibuliko bya bikolo na ha kamwa ya bipamba ya bi njubo muje mukakalila yije thitu. ⁸ Mwapande kulya yije thitu buje bene buthsiki, hanima ya kuyocha na tuhya. Mukalye na likende lyaku jeneka kupangetha muthima na bithsapa - thsapa bya kulula. ⁹ Kethi mukalye eyi thitu ya yibishu ya kuteleka na mema. Olojo, mukalinge ya kwocha ha tuhya na mutwe na mendi na bya mwimo. ¹⁰ Kumwapandele kuthethzako imo kweta mutondo. Ngwe kunathaka imo thitumwapande kuyenyeka na mutondo. ¹¹ Mwapande kuyolya ngechi; na miba yeni ya kukuta manene, na bing'aku byeni kumendi na mbweti mu liboko lyobe. Mwapande kukalya bwathi - bwathi. Yinapu Paseka ya Njambi. ¹² Njambi nendeka ngwendi; Njikaita mu lifuti lya Ingito muli buje buthsiki na kuthsiya ba ntwantwa boshe ba banu na kuthsitu mu lifuti lya Ingito. Njika nyanyametha bi njambi boshe ba nu Ingito. Yange Njambi. ¹³ Maninga akewo akapwa chithzibithitho ha bi njubo byeni ha kwija kwange kuli yeni. Cho omu njikamona maninga, njikamijomboka ha kulukuka lifuti lya Ingito. Aka kayando kukukaija hali yeni nakuminyongetha embwe. ¹⁴ Eli litangwa likakala lya kwanukilaho kuli yeni, eli mukathingimika kukala chiwano cha Njambi, ya bikota byeni - lishiko lije mukanyunga myaka yoshe. ¹⁵ Mwapande kulya likende lyakujeneka ha thimbu atanu na abali. Litangwa lya kulibanga mwapande kutunditha muthima mu bi njubo byeni. Woshe munu akalya likende lya kujeneka kwaka muthima ha litangwa lyakulibanga kwetetha ha litangwa lya mu chitanu na abali yikeye kakapu lalao umo wabanu bange mu Isalela. ¹⁶ Halitangwa lya kulibanga mwapande kukunguluka kuje kwakuthzilila yange, na halitangwa lya mu chitanu na abali kukakala lalo kukunguluka. Kumwapandele kupanga bipangi ha matangwa awa, olojo munatha kubwaetha cha boshe. Chikecho lika chipangi chimunapande kupanga. ¹⁷ Nyungeni chiwano cha makende akujeneka muthima mwafwa halitangwa eli likelyo njatundithile miyati yeni mu Ingito. Cho mwatela kunyunga eli litangwa mu kuyoya cha bikota bya banu beni boshe kupwa lishiko myaka yoshe. ¹⁸ Munapande kulya likende lya kujeneka muthima kutunda ha thimbu ya kaboko bwii ya matangwa likumi na awana ku ngonde ya kulibanga mu mwaka kweta na thimbu ya kaboko bwii ya litangwa lya makumi abali na limo mu ngonde. ¹⁹ Mumatangwa a atanu na abali kethi mukakale na muthima mu binjubo byeni. Cho woshe owo akalya likende lya kupangetha muthima watela kumutetako kutunda kumbunga ya Isalela, nambe ngethzi nambe mundambo mu lifuti. ²⁰ Kumwapandele kulya chuma choshe chakupanga na muthima. Okwo koshe kumukayoyela, munapande kulya likende lyakuthzeneka muthima. ²¹ Ngechi Mosesa wathanene bakulunu boshe ba Isalela wendekele kuli bakebo ngwendi, "Yeni mukangule bi manga nambe bana aba batamo kulitha bi manga byeni cho muka thsiye manga wa chilika cha Paseka. ²² Cho neneni ka chishamo na lunembwe kambwitikeni mu lilonga muje muli maninga. Kwiteni aje maninga ha bikolo na ha kamwa ya chipamba cha njubo. Naumo wahi napande kutuhuka hanja ya njubo kweta na thimbu ya mutondo. ²³ Mafwa Njambi aka ita nakulukuka ba Ingito. Omu akamona maninga ha bibuliko na hakamwa ya chikolo cha binjubo akajomboka kaka tabetha uje mukakuthsiya kukobela mu binjubo na kumithsiya. ²⁴ Mwapande kwaka mbunge echi chilika. Echichilika chikakala lishiko lyeni nachithemunwina chenithimbu yoshe. ²⁵ Ngechi omwo mukakobela mu lifuti lya Njambi, kwetheka nomu amishikile kulinga, mwapande kunyunga chilika chendi cha kumwaletha. ²⁶ Omwo bana beni bakamihula ngwabo, "Chilika echi chemanena bikajo?' ²⁷ Mwapande kubakumbulula ngweni. 'Owu wunapu mulambu wa Paseka ya Njambi, mwafwa Njambi wajombokele ha binjubo bya ba Isalela mu Ingito. Oloni binjubo byetu wabithethzeleho." Cho bana ba thzikamene ha mabuli na kulemetha Njambi. ²⁸ Ba Isalela bayile balingile bije bya kambeyeye Njambi kuli Mosesa na Alone. ²⁹ Chasholokele mukati kabuthsiki Njambi wathsiyile ba ntwatwa mu lifuti lya Ingito. Kushangumukila kuli ntwatwa wa Falo, uje atumamene ha litanda lyendi kweta kuli ntwatwa wa bimuna. ³⁰ Falo wendukile buthsiki buje - ikeye, hamo na bingamba bendi, na banu boshe baka Ingito. Ngechi kwakele kulila kwakama manene mu Ingito, mwafwa kukwakele njubo imo yathaleleho ya kujeneka kutsa mwana. ³¹ Falo wathanene Mosesa na Alone mukati ka buthsiki buje na kwendeka ngwendi, "Katukeni, fumeni mukati, ka banu bange, yobe na ba Isalela. Yeni, lemetheni Njambi ngwe mu mwalombele. ³² Ambateni bimanga na bimembe beni, ngwe mumunendeka, muye, cho lalo mujikithwile." ³³ Ba Ingito ba thambwile kuba tuma batunde mu lifuti, mwafwa bendekele ngwabo, "Yetu boshe tuthsa nge kumutundumo muno." ³⁴ Cho baje banu bambatele bitikilo byabo bya kujeneka kwaka muthima. Bathzengelele bitikila byabo ha binanga biba mbatele ha bithili byabo. ³⁵ Cho ba Isalela balingile ngwe muje mwabalekele Mosesa. Balombele baka Ingito kubana siliba, na ngolonde, na buthzalo. ³⁶ Njambi walingithile baka Ingito kuthingimika baka Isalela. Cho baka Ingito babanene ba Isalela bije byoshe obyo balombele/Mungila eyi mukeko ba Isalela bambatele bufuko bwa baka Ingito. ³⁷ Ba Isalela batundile mu Lamesese bayile ku Sokote. Batumine kwetheketha mu 600,000 ya banalume ha mendi, kwakelako bana kathzi na banike. ³⁸ Mbunga ya kama ya banu beka baile hamo nabo, na butanga bwa bimuna bwakama manene. ³⁹ Ba mungile likende lya kujeneka muthima ha bitikilo bije batundile nabyo mu Ingito. Makende akele akujeneka muthima mwafwa baba tuhwile mu Ingito kubakele na thimbu yaku kubwaetha bya kulya. ⁴⁰ Ba Isalela bayoyelele mu Ingito myaka biita biwana na makumi atatu (430). ⁴¹ Hakukuma cha myaka biita biwana na makumi atatu (430), halitangwa bene lije, bakanthzita ba Njambi boshe batundile mu lifuti lya Ingito. ⁴² Obu bwakele butsiki bwaku tona, mangana Njambi aba tundithe mu Ingito. Obu bwakele buthsiki bwa kwanuka Njambi kuli ba Isalela mu bikota byabo byoshe. ⁴³ Njambi wendekele kuli Mosesa ngwendi, " Awa akewo mashiko a Paseka: Kukwethi ngethzi akalyako ku kulya cha chiwano cha Paseka. ⁴⁴ Nambe ngocho ndungo woshe waba Isalela, yibalanda na bimbongo, natha kulya ngwe bamutuhula laja. ⁴⁵ Mungethzi nambe ngamba wa kukumuna kapandele kulya byakulya obyo. ⁴⁶ Byakulya ebi bakabilile lika mu njubo imo. Kumwapandele kutundutha thitu haja ya njubo, ngechi kethi muka pokole chitsiya cha uje kathitu. ⁴⁷ Mbunga yoshe ya Isalela bana pande kunyunga chiwano echi. ⁴⁸ Woshe ngethzi ali mukati keni akatonda kulemetha Paseka ya Njambi, na pande kutuhula ba ka njubo yendi boshe ba banalume. Cho atha kwija na kulemetha. Akakala ngwe banu baje bathemukila muje mu lifuti. Nambe ngocho, munu woshe uje kanda bamutuhule kapandeke kulya bya kulya obyo. ⁴⁹ Lushiko bene olu lukapwe lwa banu boshe bamu lifuti na baje ba ngethzi batunga neni." ⁵⁰ Cho boshe ba Isalela balingile ngwe omu Njambi wa kambeyelele Mosesa na Alone. ⁵¹ Chasholokele halitangwa lije bene Njambi watuhwile ba Isalela mu lifuti lya Ingito kwitila mu byendo bya baka nthita babo.