¹ Shukulu wendekele kuli Mosesa ngwendi, "Ya kuli Falo, njinakoletha mbunge yendi na bimbunge bya bingamba bendi. Njalingi echi na kusholola bimwetho bya binthzili byange mukati kabo. ² Njalingi lalo echi mangana mukaleke bana beni nabatekulu beni byuma binjinalingi, nomu njabanyanyamethele mwa mubi mu Ingitu, nomu njina bana bimwetho byabingi bya kulithethzathethza na nthzili yange hali bakebo. Mungilei mukathzibuke ngweni yange Shukulu." ³ Cho Mosesa na Alone baile kuli Falo nakumuleka ngwabo, "Shukulu, Njambi waba Hebelu, nendeka ngwendi: Kangaijo ukabyana kulikehetha halutwe lwange?Echa banu bange baye mangana bakanji lemethe. ⁴ Oloni ngwe ukabyana kwecha banu bange kuya, toliila, imene njikanena bimbamba mulifuti lyobe. ⁵ Bakashulitha hakamwa yalibu lyoshe mangana na umo wahi akatha kukalimona. Bakebo bakalya byoshe bya thaleleho kunyonthzi ya mamanya. Bakebo lalo bakalya miti yoshe ije ikamena mu mahya eni. ⁶ Baka shulitha binjubo byeni, bya bingamba beni byoshe, na byoshe bya ba Ingitu- byumebi kanda ba isho nambe bakuku yobe kanda babimoneho laja, byahi kanda bamone kutunda litangwa bakele hano hakaye nakulelo." Cho Mosesa watundile kumesho a Falo. ⁷ Cho bingamba ba Falo bendekele kuli ikeye, "Bithimbu bingaijo ou munalume akatuyandetha? Echa ba Isalele baye mangana bakalemethe Shukulu Njambi yabo. Kuma yobe Kuwanangukile ngwobe Ingitu yanyongo ndi?" ⁸ Mosesa na Alone babanenele lalo kuli Falo, ou wendekele kuli bakebo ngwendi, " Yeni mukalemethe Shukulu Njambi yeni. Oloni banu mukajo bakaya?" ⁹ Mosesa wamukumbulwile ngwendi, "Tubaboshe tuya na bana betu natukulakathzi betu, nabana betu babanalume naba babanakathzi. Tuya na bimanga na bimembe betu, omwo tunapande kulinga chiwano chakulemetha Shukulu." ¹⁰ Falo wendekele kuli bakebo ngwendi, "Shukulu chili bene akale neni, oshe njikamyecha kuya nabana beni babandondo baya, kenga, muli na bubi mu mbunge. ¹¹ Embwe! Kukaye banalume lika hakati keni, mukalemethe Shukuu. Omwo echi chikeko mwashakele. "Cho Mosesa na Alone babashekele kutunda kumesho a Falo. ¹³ Cho Njambi wendekelekuli Mosesa ngwendi, "Olola liboko lyobe hakamwa ya lifuti lya Ingitu kuba mbimba, mangana bakalukuke lifuti lya Ingitu na kulya miti yoshe muje, na byoshe bije byathaleleho kunyonthzi ya mamanya," ¹² Mosesa watandubwile bweti yendi hakamwa ya lifuti lya Ingitu, cho Njambi wahuwithile lihunthzi lya kutunda mungangela hakamwa ya lifuti lyoshe mutanya na butsiki. Cho mutondo, lihunthzi lya kutunda mungangela lyanenele bimbimba makumbi. ¹⁴ Cho bimbimba baile mu lifuti lya Ingitu lyoshe na kulundamamo. Kanda laja kukaleho binjame bya bimbimba bangachije milifuti, cho byahi bya chifwa ehi bikaija hanima wechi. ¹⁵ Bakebo bashulile hakamwa yoshe yalifuti cho kwathzibalele. Cho bimbimba balile biti byoshe mulifuti lya Ingitu, kukwakele muti wathaleleho, nambe byakumena mu mahya. ¹⁶ Cho Falo bwathI - bwathi wathanene Mosesa na Alone cho wendekele ngwendi, "Njinalingi bubi kumesho a Yehoba Njambi yeni na kumesho eni. ¹⁷ Cho lalo, hathimbu ino njithambetheni ku bubi bwange, na kulomba kuli Yehoba Njambi yeni mangana atundithe kuthsa echi kuli yange." ¹⁸ Ngechi Mosesa watundile kuli Falo na kulomba kuli Njambi. ¹⁹ Yehoba wanenele lihunthzi lyakama manene lya mukangombe kayambi lije lya pekumwine bimbimba na kubalundumwina boshe mundonga ya mahongo; cho kumwathalele mbimba nambe umo mu lifuti lya Ingitu lyoshe. ²⁰ Oloni Yehoba wachikaluwithile mbunge ya Falo, na Falo katabethele ba Isalela baye. ²¹ Cho Yehoba wendekele kuli Mosesa ngwendi, " Jundula liboko lyobe ulikengethe mwilu, mangana mukale lithuthulungu mu lifuti lyoshe lya Ingitu, lithuthulungu eli likathzibakana." ²² Mosesa wajundwile liboko lyendi mwilu, cho kwethzile lithuthulungu mu lifuti lya Ingitu kyoshe ha matangwa atatu. ²³ Na umo wahi wathele kumona umo na mukwabo; na umo wahi watundile mu njubo yendi ha matangwa atatu. Nambe ngocho ba Isalela boshe bakele mucheke kumutambela bakele. ²⁴ Falo wathanene Mosesa cho wendekele ngwendi, "Yeni mukalemethe Njambi. Na bi nanga byeni batha kuya neni, oloni bimuna beni banapande kuthala." ²⁵ Oloni Mosesa wendekele ngwendi, tutabetheni tulinge bing'ombelo na milambu ya kwenyeka mangana twane kuli Yehoba Njambi yetu. ²⁶ Bingombe betu lalo tunapande kuya nabo; nambe umo akathala wahi mwafwa tunapande kubambata na kulemetha Yehoba Njambi yetu. Omu kutwathubulukile bika tukalemetha nabyo Yehoba kubanga noho tuketako." ²⁷ Oloni Yehoba wachikaluwithile mbunge ya Falo, cho kabatabethele kuya. ²⁸ Falo wendekele kuli Mosesa ngwendi, "Tunda ku mesho ange! Nyanyama na chuma chimo, kethi ukajimone lalo, cho litangwa ukamona chihanga change, cho ukathsa," ²⁹ Mosesa wamukumbulwile ngwendi, " Yobe babenya unendekamo. Kunjikamono chihanga chobe lalo."