¹ Cho Shukulu wendekele kuli Mosesa ngendi, "Ya kuli Falo cho ukamuleke ngwobe, 'Shukulu, Njambi ya ba Hebelu, nendeka ngwendi: Echela banu bange baye mangana bakanjilemethe" ² Oloni ngwe ubyana kubechela baye, ngwe uchishaka kubatumbika, ³ cho liboko lya Shukulu likatuma mushongo wakama wakukonowetha habimuna beni baje bali mulihya- tubalu, bimulu, tumelo, bingombe, na bimanga. ⁴ Oloni Shukulu akangununa hakati kabimuna ba Isalela na bimuna babaka Ingitu, cho ngechi naumo chimuna wahi waba Isalela akathsa. ⁵ Shukulu naka thimbu; nendeka ngwendi, "Imene hakeho njikalinga chuma echi mu lifuti." ⁶ Shukulu mukwakile walingile muje mwendekele: Bimuna boshe babaka Ingitu bathsile, oloni naumo chimuna wahi waba Isalele wathsile, nambe umo chimuna. ⁷ Falo wehwithithile, cho, bene, naumo chimuna waba Isalela wathsile wahi. Oloni wakaluwithile mbunge yendi manene, cho katabethele banu kuya. ⁸ Cho Shukulu wendekele kuli Mosesa na kuli Alone, Jomoneni maboko akushula a lito kutunda mulutengo. Yobe, Mosesa, ukashe lito mwilu kumesho a Falo. ⁹ Likalumuka kupwa likungu lyalilelu mu lifuti lya Ingitu lyoshe. Cho likamanetha majuja na bimbandu kukala ha banu na tuthitu mu lifuti lyoshe lya Ingitu. " ¹⁰ Cho Mosesa na Alone bambatele lito mulutengo cho bemanene halutwe lwa Falo. Cho Mosesa washele lito mwilu. Cho lito lya nenethele majuja na bimbandu kukala ha bana na tuthitu. ¹¹ Ba katufuta kubathele kwimana kuli Mosesa mwafwa wa majuja, mwafwa majuja akele hali bakebo na hali baka Ingitu boshe. ¹² Shukulu wakolethele mbunge ya Falo, cho Falo katolilile kuli Mosesa na Alone. Ngwe muje bene wendekele Shukulu kuli Mosesa omu Falo akalinga. ¹³ Shukulu wendekele kuli Mosesa, "Meneka mutondo - tondo ukemane ha lutwe lwa Falo, ukamuleke ngwobe, Shukulu, Njambi ya ba Hebelewu, nendeka ngwendi: Echela banu bange baye mangana bakanjilemethe. ¹⁴ Ha thimbu ino njikatuma mishongo yakukomoketha hali yobe babenya, hali bingamba bobe na banu bobe. Njikalinga echi mangana yobe ukathzibuke ngwobe kukwethi naumo wakufwa ngwe yange muno mu kaye koshe. ¹⁵ Hali ino thimbu ngwe njajundwile liboko lyange nakukulwitha yobe, na banu bobe na mishongo, ngwe njamitundithile mulifuti. ¹⁶ Oloni mwafwa wechi njakutabetha kuyoya yobe: mangana nji kumwethe nthzili yange, ngechi lithzina lyange bakulyambulule mu kaye koshe. ¹⁷ Cho yobe uchili na kulyametha kubanu bange mukujeneka kubatabetha kuya. ¹⁸ Tolila! Imene ha thimbu ino bene njikanena nyonthzi ya lihuthzi ya mamanya yakama, ije kanda bamoneho laja mu Ingitu kutunda litangwa lyakuputukila na kweta lelo. ¹⁹ Cho lalo, tuma banu bakungulule bimuna bobe na byuma byoshe bili mu mahya mukabitulike bwino. Munu woshe na kathitu uje ali mu mahya nauje banajeneka kunena hembo - nyonthzi ya mamanya ikanoka, cho bakatsa" ²⁰ Cho baje bangamba ba Falo bakulahelele lijwi lya Shukulu bathzambwile kunena bindungo babo na bimuna babo mu njubo. ²¹ Oloni baje bombwanethele lijwi lya Shukulu bathethzele bindungo babo na bimuna babo mu mahya. ²² Cho Shukulu wendekele kuli Mosesa ngwendi, "Jundula liboko lyobe ulinike mwilu mangana kukakale nyonthzi ya mamanya mu lifuti lyoshe lya Ingitu, habanu na tuthitu, na bimbuto byoshe bili mu mahya mu lifuti lyoshe lya Ingitu." ²³ Mosesa wajundwile bweti yendi mwilu, cho Shukulu watumine chilulumo cha nyonthzi ya mamanya na muhyato hathi. Wa nyokethele nyonthzi ya mamanya ha lifuti lya Ingitu. ²⁴ Cho kwakele nyonthzi ya mamanya na muhyato ya kukumbathana hamo na mamanya, yaibi manene, echi kanda chisholokeho laja mu lifuti lya Ingitu kutunda kukushangumuka. ²⁵ Cho mu lifuti lyoshe lya Ingitu, nyonthzi ya mamanya yathsile byuma byoshe byakele mu mahya, banu na bimuna. Yathsiile byoshe byakele mu mahya nakupokothzola miti yoshe. ²⁶ Mulifuti lya Ngoshene lika, muje mwakele ba Isalela, mukemo kumwakele nyonthzi ya mamanya. ²⁷ Cho Falo watumine banu na kuthana Mosesa na Alone. Cho wendekele kuli bakebo ngendi, "Njinalingi bubi hathimbu ino. Shukulu wa kwoloka, cho yange na banu bange tubababi. ²⁸ Lombeni kuli Shukulu, mwafwa chilulumo cha nyonthzi ya mamanya china hyanamo manene. Nji myechela muye, cho kumukakala lalo muno." ²⁹ Mosesa wendekele kuli ikeye ngwendi, "Omo yange njituukalika muno munganda, njikajundula maboko ange kuli Shukulu. Cho chilulumo chikahwa, na nyonthzi ya mamanya kuyi kanyoko lalo. Mungileyi bene ukathzibuka ngwobe kuma kaye kapwa ka Shukulu. ³⁰ Oloni yobe na bingamba bobe, njathzibuka ngwange yobe kanda uchimukomoke Shukulu Njambi." ³¹ Oloni bwanda na mbale bya bihile, omwo mbale yakele muyehi na kuhya, na bwanda bwakele na matindi. ³² Oloni tiliku kuyabihile mwafwa yikeyo te kanda ichihye. ³³ Omwo Mosesa wathethzele Falo nakutuuka munganda, wajundwile maboko endi kuli Shukulu; cho na chilulumo na nyonthzi ya mamanya yalikelele, cho nyonthzi kuya nyokele lalo. ³⁴ Omwo Falo wamwene ngwendi nyonthzi, mamanya, na chilulumo byemanene, cho walingile lalo bubi na kukaluwitha mbunge yendi, hamolika na bingamba bendi. ³⁵ Mbunge ya Falo yakaluhwile, cho katabethele banu ba Isalela baye, ngwe mujebene Shukulu wendekele hali boko lya Mosesa.