¹ Kuruku rwa vino ame anu yuvhu maywi kuna kudameka ghunene yira mbunga ya vantu va va yingi kuna kuyimba mu liwiru, kuna kughamba ashi, ''Shambererenu Hompa. Liparu na liyoghoro lya ndjo, na ghuyerere na nkondo daninene navintje vya Hompa Karunga wetu. ² Mukonda shi Ghuye ku pangura mu ghushili namu ghuhunga, ghuye kuna pangura ghuno mukadi wa rushonda mbyo ana mutengeke naku mu djonaghurapo kwavi ashonga vantu vapa ntunda ya livhu va ruwane rushonda na ghurunde wendi. Tu shambererenu Hompa Karunga wetu mukonda shi ghuye kuna tapa matengeko kwa ghuno mukadi avyute rughoko kuhamena ku honde ya vantu vendi vaku pongoka ovo adipaya.'' ³ Mbunga kwa yimba nka rukando rwa ghuviri ashi: ''Tu shambererenu Hompa! Makura muti wa ghuyingi kwa yambuka ghutunde pa rutu rwendi ghu tutumuke ghuyende mu shitata na shintje ghuyerere wendi ghupayime dogoro ku naruntje naku naruntje.'' ⁴ Makura matimbi dimurongo mbiri-na-mane ntani na vikorama vine kwaku gandera pa livhu kwa tongamena naku raperera kwa Hompa Karunga, ogho ashungiro ku shipundi sha Uhompa. Vavo kwa ghamba ashi, ''Tu shambererenu Hompa. Amen!'' ⁵ Makura liywi lya muntu kwa tunda ku shipundi sha ghuHompa, kwa ghamba ashi, ''Tu shambererenu naku fumadeka Hompa Karunga wetu, atwe vakareli vendi na tuvantje ntani natwe twamu fumadeko, tukare shi vantu vaka makuto ndi vaku pira likuto.'' ⁶ Ame makura anu yuvhu nka maywi ghaku fana yira mbunga ya vantu va vayingi, na mema gha mayingi kuna kupupira, naku ndunduma yira mvhura ya marughadi yayinene, kuna kughamba ashi, ''Shambererenu Hompa! Ghuye kwa kara na nkondo nadintje, ntani Ghuye mupangeli wa ghudjuni naghuntje. ⁷ Tu shambererenu ntani tuhafenu kumwe na kupembura naku tapa mpandu na mfumwa ku kwendi mukonda ya shipito na shilika sha nkwara sha Ndjwighona shina tikimo, nani mugholikadi wendi vana mana ku muwapayika. ⁸ Mugholikadi kuna mudwateke liwiwili lya likenu lyaku vembera naku payima lyaku kushuka.'' (Lirwakani ndi liwiwili lya likenu lyaku kushuka kutanta ashi viruwana vya ghuhungami vya vantu vaku pongoka va Karunga.) ⁹ Makura mu Engeli aghamba ku kwande ashi, ''Tjanga vino: Lirago lya linene ku kwenu anwe vayita muye ku shipito na shilika sha likwareko lya Ndjwighona.'' Ghuye aghamba nka shimpe ku kwande ashi, ''Odino nkango da Karunga da ghushili.'' ¹⁰ Makura ame anu ku gandere ku mpadi dendi kumeho yendi naku tongamena ku kwendi, makura mu Engeli aghamba ku kwande ashi, ''Nakadidishi kuruwana vya weno! Ame mukareli wa Karunga ntani mukareli ghunyoye waku twara naku ronga naku yivita mbudi ya lipuro lya ghumbangi waku hamena ku viruwana vya Yesus. Tongamane naku raperera kwa Karunga pentjendi ahuru, nkango dendi da ghushili ntani ngo ghumbangi wa ghunene wa ghushili waku hamena kwa Yesus waku hwameka naku tapa Mpepo ya ghuporofete.'' ¹¹ Ame kwa mona liwiru kuna ku gharuka, makura anu mono nkambe ya yikenu kuna yimana. Murondi wa nkambe lidina lyendi mulimburuki na ghushili. Ghuye kupangura mu ghuhunga ntani na lipenda lyaku rwa vita vyaghu hungami. ¹² Mantjo ghendi ghaku yukuma yira makara na maraka gha mundiro, ntani ghuye kwa dwata nkata da diyingi ku mutwe wendi da ghuHompa. Ghuye kwamu tjanga lidina parutu rwendi olyo vapira kuyiva navantje kwandi mwene tupu ahuru. ¹³ Ghuye kwa dwata lirwakani olyo lya karo na honde, ntani lidina lyendi Nkango ya Karunga. ¹⁴ Mbunga ya vakavita vamu liwiru kuna rondo pa nkambe dadikenu kuna dwata marwakani gha makenu, ghaku vembera, kuna kumu kwama. ¹⁵ Mu kanwa ka murondi wa nkambe kwa tundamo rufuro rwa ghutwe rwaku teta kuviri, oro aruwanitanga paku pangera virongo na dimuhoko daku pira ku limburuka, ntani ghuye ku pangera na mburo ya shikugho. Ghuye ku lyatanga vana nkore vendi yira momu vatwanga mandjembere mushinu naku ghayaveka mu mema va ghature muntjako vakameko marovhu, Hompa mo ngoli nga neyeda lishandu lyendi lya linene ku vantu va ndjo nava va ghurunde. ¹⁶ Lidina lyendi kwa litjanga pa vidwata vyendi ntani napa litungi lyendi ashi ghuye, ''Hompa wa vaHompa ntani Mupangeli wa vapangeli navantje.'' ¹⁷ Makura ame anu mono mu Engeli kuna yimana ku liyuva. Ghuye kwa yiyira na liywi lyaku dameka atantere vidira vyakulya nyama vyaku tuka kuwiru ashi, "Yenu kuno muyaponge kushipito shashinene sha Karunga. ¹⁸ Yenu kuno muyalye nyama yava na nkore va Karunga; marutu gha vahompa vapa ntunda ya livhu, nava mpititi va vakavita, na mapenda gha nkondo ghava kavita, na nyama ya nkambe ntani na nyama ya varondi va nkambe, ntani yenu kuno muyalye nyama ya vantu vamu ghudjuni, marutu gha vantu vaku manguruka na vapika, marutu gha vahepwe ntani nava kamakuto. ¹⁹ Ntani ame anu mono shikashama ntani na vaHompa vapa livhu kumwe na vakavita vavo. Vavo kuna pongo mbunga yavo varwanite murondi wa nkambe kumwe na vakavita vendi. ²⁰ Makura murondi wa nkambe kwa rwa vita naku funda naku kwata shikashama ntani namu Porofete wa vimpempa waku ruwana vitetu kumeho ya shikashama. Mukonda ya vitetu vyamu porofete wa vimpempa mbyo vapukita vantu va vayingi ovo vawano shiyivito shashikama pa shipara ntani navo vaku tongamena ku lifano lya shikashama. Shikashama namu porofete wa vimpempa navantje kwava vhukumina mulidiva lya mundiro wa mawe mughuviri wavo vavo shimpe vayumi. ²¹ Vakavita vaku hupako kwava dipaya na rufuro rwaku teta ku viri rwaku tunda mu kanwa ka murondi wa nkambe. Makura vidira kwalya marutu gha nyama ya vantu na nkambe dogoro kwa kuta.