¹ Kuruku rwa vino ame kwa mona nka mu Engeli ghumwe kuna kutunda muliwiru kuna ku ghurumuka. Ghuye kwa kara na nkondo da dinene, ntani kwa kara na shite shaku tema ngudu shaku tapa ghukenu pa livhu na pantje. ² Ghuye kwa yiyira na liywi lya linene, ashi, ''Shitata sha Babiloniya yayinene, kuna ku djonaghukapo! Ntantani kuna kara ghuvando na ghuturo wa mpepo da didona, ntani na ghuvando na ghuturo wa mpepo daku nyata, ntani na ghuvando na ghuturo wa vidira vyaku nyata vyaku ku shuva-shuva. ³ Dimuhoko damu ghudjuni nadintje kwa nwa naku korwa ghugara wa vinyu ya rushonda rwendi. Va Hompa vapa livhu navantje kwa shondera naye. Ghudjuni naghuntje kwa kara na limona lya liyingi lyaku tunda ku ghungagho wa kutunda ku nkondo da rushonda rwa liparu lyendi.'' ⁴ Makura ame anu yuvhu nka liywi limwe kuna kutunda mu liwiru kuna ku ghamba ashi, ''Anwe vantu va muhoko wande, rupukenumo mutunde mushitata sha Babiloniya, mposhi ngamu pire ku hamena ku ndjo dendi, ntani ngamu pire kuwana mpanguro na matengeko ntani na mahepeko. ⁵ Mukonda shi ndjo dendi dina vhuka mbyo dina yingipa mbyo dina rondo dogoro dina katika mu liwiru, weno Karunga ana mona ndjo dendi mbyo ana vhuruka viruwana vyendi vya vidona. ⁶ Mufutitenu naye yira momu afutitanga ghuye vantu va ghunyendi vaku ku karera, ntani ghuye afute ruviri ku ndjo na viruwana vyendi vya vidona ovyo aruwana ku vantu; mu nkinda yendi yimwe tupu turenu mo marutugho maviri ghavirurupita ghakare ghururu ghunene, mu mupe anwe naye yimu pwere. ⁷ Shitata sha Babiloniya kwa fana yira mukadi waku kufumadeka naku kunenepita mwene mbyo aku yerura ghunene kumwe naku tikitamo madogho ghamu mutjima, weno naye kuna hepa kuwana mpanguro na matengeko ghaku kora ghunene nga kare mu liguvo lya linene. Ghuye kwa ghamba mu mutjima wendi ashi, ''Ame kwa shungiri ku shipuna sha ghuHompa ntani ame ku pangera yira Hompa wa mukadi; Ame kapishi mukadi waku fita muka fumu wendi, ntani ame kapi nganu kara mu liguvo yira mukadi waku fita muka fumu wendi. ⁸ Ano ngoli liyuva kuna kuya lya: mfa, na malirankali ntani na lirumbu. Ghuye ngava mu shwakerera mu mundiro, mukonda shi Hompa Karunga wa nkondo nadintje ngamu pangura ku twara mu viruwana vyendi.'' ⁹ Va Hompa vapa livhu ovo kava shonderango naye ntani navo vakalire na madovo ku kwendi, kwa lira naku kema kumwe naku mukenyaghukira paku mu mona mukadi omo ana kupya mu mundiro. ¹⁰ Vavo ngava yimana ku ghure naye, ngava tetuka paku mu mona ntani ngava kara na ghoma yira ku vhura navo vawane ko ku matengeko ghendi, vavo ava ghamba ashi, ''Lihudi lya linene, ku Babiloniya, shitata sha shinene, ntani shitata sha nkondo! Matengeko ghoye kunaya pa wangu-wangu mu shirugho sha shifupi tupu." ¹¹ Va ghuliti ngeshefa vamu ghudjuni kwa lira naku kema naku guva, ntani navantje kwa shayeka kughura ngeshefa ku kwendi - ¹² ghushwi wa ngorodo, na siliveli, na tuwe twa ndiro, na makwarara, na makeshe ghama kenu, na makeshe gha maghurenga, na makeshe ghama geha, na vituku, na vishongaghura vyaku ku shuva-shuva, na mbinga dava ndjovhu, na vininke vya marudi ghaku ku shuva-shuva vya mulyo wa kuyeruka, ovyo varuwana na ngoporo, na lirova, na vikugho, na siliveli, na mawe gha ghufughuli, ¹³ kwato nka ogho avhuliro ku ghura mberera yendi, na vitovalita, navi tutumukita vya muti vya lidumba lyaliwa, na dimurora, na sende, na vinyu, na maghadi ghamu ndya, na ghutura wa ghuwa, na rukokotwa, na ngombe, na vindjwi, na tukambe na matemba gha karu-kara, na vapika ntani na monyo da vantu. ¹⁴ Limona lyenu na lintje olyo mwa weka lina lina tundupo ntani dongonokapo. Ghungawo wenu na ruviya rwenu na limona lyenu lina dongonokapo, kapi nka ngamu limona. ¹⁵ Vaghuliti va ngeshefa yendi ovo va wano limona lya liyingi lyamu shitata, weno vana kara kughure naye mukonda shi vana kara na ghoma wa ghunene naye, kapi vana shana ashi navo ngava kalire, naku kora ntani na liguvo lya linene. ¹⁶ Vavo ngava kalira ashi, ''Lihudi lya linene, kuna shoroka ku shitata sha shinene osho va yenga, mbyo va shidwateka vyuma vya ghufughuli, na vyuma vya maghurenga na vyuma vya vigeha vyaku vembera vya ndiro, ntani kwa dwata vyuma ovyo varuwana na ngorodo, na mawe ghafughuli ghandiro. ¹⁷ Ano ngoli mu shirugho sha shifupi tupu olino limona na lintje lya ndiro kwa dongonokapo.'' Vaweki vikepa na vakurona vamu vikepa, nava shingi va vikepa nava ruwani vamu vikepa ntani nava rondi vamu vikepa, kumwe navo va wana ngo liparu mu lifuta kwa duka vayende kwa ghure vatunde mo mu shitata. ¹⁸ Vavo kwa takuma naku lira na liywi lya linene paku mona mundiro waku twera ghunene. Vavo kwa ghamba ashi, ''Shitata munke sha shinene shaku pitakana pa shino?'' ¹⁹ Vavo kwaku kwita mutwitwi na mbundu pa dimutwe davo va neyede malira nkali na maruntjodi ghavo, ntani na liguvo, vavo kwa ghamba ashi, ''Lihudi lya linene, kuna shoroka mu shitata sha shinene osho shatapango limona naghu ngagho ku vantu vaku shinga vikepa vaka shane limona naghu ngagho wamu lifuta. Ano ngoli navintje vino ngavi tundapo naku dongonokapo mu shirugho sha shifupi tupu.'' ²⁰ Makura ghumwe wamu liwiru aghamba ashi, "Karenu na ruhafo mukatji kenu, anwe vamu liwiru, nanwe vapongoki, na va Apositoli ntani na vaporofete, weno Karunga kuna pangura ghuno mukadi ku twara mu viruwana vyendi!'' ²¹ Makura mu Engeli ghumwe wa nkondo adamuna limuwe lya linene lyaku djamita mahangu ali vhukumini mu lifuta, ntani aghamba ashi, ''Anwe vantu mwa tungo mu shitata, sha Babiloniya, shitata sha shinene ngava shi vhukuma na nkondo yira momu vana vhukuma lino liwe litunde po, makura kapi nka ngashi karapo. ²² Mu shitata shenu kapi nka ngava vetamo vikitara, kapi ngava yimba mo marushumo, kapi ngava veta ngoma vadane, ntani kapi ngava veta naku shiva marumbendo. Vikare viruwana vyaghu konentu navi vyaghu nkurungu kapi nka ngavi karamo mu shitata. Nampili mpumo dapa rupare nadi muntje daku twa mahangu kapi nka ngadi karamo naku yuvika mo mushitata. ²³ Shite sharamba na ghukenu kapi nka ngaghu tema mo mu shitata. Vantu vaku yimba pa likwareko lya nkwara da murume na mukadi kapi nka ngavi shoroka mo mushitata, ntani na ngeshefa damu shitata dadinene damulyo ngadi djonaghuka po nadintje dapa livhu, ntani shino shitata kwa ruwanita ghupure na ghurodi muku pukita vantu vamu virongo vyaku ku shuva-shuva. ²⁴ Shino shitata kwa dipaya vaporofete na vantu vaku pongoka va Karunga kumwe na honde ya vantu vamu ghudjuni ovo wa dipaya.''