¹ Ntani ame anu mono mu Engeli kuna ku tunda mu liwiru. Ghuye kuna kwa terere tjapi yaku shirongo shakuntji mu likwina lyaku pira ghuhura, ghuye kuna shimbi ghuketanga wa ghunene mu lighoko lyendi. ² Ghuye kwa kwata limukongoro, olyo lya kaliro liyoka pakare, ntani mudjonauli, ndi Satana, makura kwa limanga likare mumango mwaka daku tika ku liyovi limwe. ³ Lino limukongoro kwali vhukumina mu shirongo shakuntji mu likwina lya lire lyaku pira ghuhura. Lino likwina kwa lighara naku lipata mposhi limukongoro nga likare momo. Vino kwavi ruwana vikare weno mposhi limukongoro kapishi nga lipukite vantu va dimuhoko dadiyingi dogoro kuruku rwa mwaka liyovi limwe. Kuruku rwa shirugho, ntani ngava shutura limukongoro, nga litunde mumango liruwane kehe vino lina shana mu shirugho sha shifupi tupu. ⁴ Ame kwa mona vipundi vya ghuHompa. Kuna shungiripo vantu ovo wano nkondo daku pangura naku pangera. Ntani ame anu mono nka monyo da vantu ovo vadipaya ovo vateta dimutwe mukonda yaku yuvita Mbudi Ya Ruhafo naku tapa ghumbangi waku hamena kwa Jesus Kiristus ntani naku yuvita Nkango da Karunga. Vavo kwa shwena kutongamena ku shikashama ntani naku lifano lya shikashama, ntani vavo kwa shwena kuwana naku tambura naku vatura nomora na shiyivito shashikama pa shipara ndi ku lighoko. Vavo kwa vhumbuka ku ghufe, vakare na monyo waku pangera kumwe na Kiristus ghure wa mwaka daku tika ku liyovi limwe. ⁵ Ovano vantu mbo vaku hova ku vhumbuka ku mfa vakare na monyo. Vantu vaku hupako kapi vavhumbukire ku mfa dogoro kuruku rwa mwaka liyovi limwe. ⁶ Muntu wa lirago ndjeghu waku pongoka ogho ngaka vhumbuko ku mfa na vantu vaku hoverera! Mfa da ghuviri kwato nkondo pa pavo. Vavo ngava ka kara va Pirisiteli vaku ruwanena Karunga ntani na Kirisitus ntani ngava ka pangera kumwe navo ghure wa mwaka liyovi. ⁷ Kuruku rwa mwaka liyovi, makura Satana ngava kamu shutura ngaka tunda mu mango. ⁸ Ghuye ngaka pukita naku djonaghura vantu vamu virongo navintje vyamu ghudjuni vyaku maruha mane ghamu ghudjuni - kumwe namu virongo vyava Gogo nava magogo - Satana ngaka pongeka va kavita va vayingi ngava karwe vita na vantu vaku pongoka va Karunga. Shivaro shava kavita ngava ka vhuka ghunene yira musheke waku ponga pa liyenga mu lifuta. ⁹ Vakavita ngava yenda valyate ghukuruta ngava kuhanene mu ghudjuni naghuntje dogoro ngava kundurukida vantu vaku pongoka va Karunga - kumwe na shitata shaku pongoka sha Karunga osho ahora ghunene. Makura mundiro ngaghu tunda mu liwiru ngaghu vashora naku va vevekapo navantje. ¹⁰ Makura mudjonaghuli, waku konga naku vapukita vantu, naye ngava mu vhukumina mulikurudiva lyamu ndiro waku twera yira mawe ghaku pira kuveva, omo va vhukumina kare shikashama namu Porofete wa vimpempa. Vavo ngava kapya mu mundiro waku pira kuveva ntani ngava ka lira naku kema naku ku kwetja mayegho matiku na mwi shirugho na shintje dogoro naruntje naku naruntje. ¹¹ Makura ame kwa mona shipundi sha shinene sha shikenu shaghu Hompa kuna shiturapo ntani Karunga kuna shungiri pa shipuna. Livhu na liwiru kwa duka litunde pa livhango opo lya kara, ano ngoli kapi pa kalire mpito na livhango lyaku dukira lya ghuvando. ¹² Ntani ame anu mono vantu ovo vafo kare-kare pa weno kuna kara na monyo vavo kuna yimana kumeho ya shipundi sha ghuHompa - vakamakuto na vahepwe - makura ava yita mbapira odo vatjanga viruwana vya vantu vadi varure. Mbapira yaku hova kwayi fikura kwayi varura - Mbapira ya Monyo. Vantu ovo vafo kare - kare kwava pangura ku twara mu viruwana vyavo ovyo va ruwana pa ntunda ya livhu opo vakalire na monyo, kutwara momu va vitjanga mu mbapira da viruwana. ¹³ Lifuta kwa ruka naku tapa vantu vaku fa ovo va kaliromo. Ntani shirongo shakuntji shava vantu vaku fa nasho kwa tapa vantu vaku fa ovo vakaliromo, vantu vaku fa na vantje kwava pangura kehe ghuno ku twara mu viruwana vya liparu lyendi. ¹⁴ Makura mfa ntani na shirongo shakuntji sha vantu vaku fa kwava vhukumina mulikurudiva lyamu ndiro waku pira ku veva. Dino mfa damu likurudiva lyamu ndiro - kwa kalire mfa da ghuviri. ¹⁵ Kehe ghuno vapira ku tjanga lidina lyendi mu Mbapira ya Monyo, naye kwamu vhukumina mulikurudiva lya mundiro waku pira kuveva.