¹ Ame anu mono nka shiyivito sha shinene shaku tetukita kuna kara mu liwiru: Ame kwa mona va Engeli vatano-na-vaviri vavo kuna kara na mahepeko na viponga vitano-na-viviri, vino viponga vyaku hulilira, makura lishandu lya Karunga nga litikilire mo naku shaya. ² Ame anu mono yira lifuta lya mema kuna kara munda ya likende ntani mema kuna ku vhongo na mundiro. Ntani ame anu mono vantu ovo vafundo shikashama ntani kapi va tongamena shikashama naku lifano lyasho ntani kwato nomora na shiyivito ntani na lidina lya shikashama. Vavo kuna yimana ntani kuna kwaterere naku veta vikitara ovyo atapire Karunga ku kwavo. ³ Vavo kuna ku yimba rushumo rwa Moses, mukareli wa Karunga, ntani na rushumo rwaku panda Ndjwighona ashi, ''Hompa Karunga wa nkondo, ove ku pangera vishita navintje vyamu ghudjuni, ove kwa kara na nkondo dadinene daku ruwana viruwana vya vinene ntani na vitetu. Ndjira yoye ya ghushili ntani kwa hungama, ove kupangera dimuhoko nadintje damu ghudjuni. ⁴ Hompa Karunga, are waku pira ku kara na ghoma ku koye, ntani are waku pira fumadeka lidina lyoye? Ove tupu pentjoye mupongoki. Dimuhoko damu ghudjuni nadintje ngadiya ngadi tongamena kushipara shoye mukonda shi ove kwa neyeda viruwana vyoye vya nkondo vyaku hungama ntani ove ku pangura mu ghushili. ⁵ Kuruku rwa vino ame anu mono, ntembeli yamu liwiru kuna paturuka, ntani nkonda yaku pongoka yina gharuka, ntani ame anu mono limbangu lyama gwanekero kuna kara munda. ⁶ Makura ame anu mono va Engeli vatano-na-vaviri kuna ku rupuka mu ntembeli vatunde mu nkonda yaku pongoka vavo kuna kwaterere mahepeko matano-na-maviri gha lihamba lyaku ku shuva-shuva. Vavo kuna dwata marwakani ghaku kushuka, gha makenu na makeshe ghaku rerema ntani vavo kwa manga ngama ya ngorodo mu mbunda na marughodi ghaku vindakana panturo. ⁷ Makura shikorama shimwe pa vino vikorama vine kwa tapa kuva Engeli vatano-na-vaviri visha vya tudukuru vya ngorodo vitano-na-viviri vyaku yura lishandu na ghugara wa Karunga, wa monyo wa naruntje na naruntje. ⁸ Mu ntembeli kwa yura muti na shite na ghuyerere wa nkondo da Karunga. Kwato waku vhura kungena mo mu ntembeli dogoro mahepeko matano-na-maviri ogho vatapire kuva Engeli vatano-na-vaviri ghaku ku shuva-shuva kwapwa naghantje.