¹ Tupu na kenga ame kwa mona Ndjwighona kuna yimana ku Ndundu Ya Siyoni. Ndjwighona kwa kalire na vantu vendi vaku tika ku mayovi dimurongo ne na lifere limwe na dimurongo ne-na-vane ndipo 144 000 vantu vendi ovo vatjanga lidina lyendi ntani na lidina lya Vashe pa vipara vyavo. ² Ame kwa yuvha liywi kuna ku ghamba naku dameka yira mema ghaku pupira ghama yingi ghunene ntani na marughadi ghaku ndunduma ghunene kuna ku tunda mu liwiru. Ntani ame anu yuvhu maywi gha vantu va vayingi kuna kuyimba naku veta vikitara. ³ Vano vantu ku yimba rushumo rwarupe kumeho ya shipundi sha ghuHompa na kumeho ya vikorama vine ntani naku meho ya matimbi. Kwato muntu wa peke waku vhura kuyimba runo rushumo nkwandi mbo vano tupu mayovi dimurongo ne na lifere limwe na dimurongo ne na-vane ndipo 144 000 ovo va yoghora pa ntunda ya livhu vamu ghudjuni. ⁴ Ovano mbovo vapiro ku kunyateka vavene na rushonda rwa vakamali, vavo kapi va kwara rumwe ntani kwa pongoka ntani kwa kushuka. Vavo ku kwama tupu Ndjwighona kehe kuno yina ku yenda. Vano kwava yoghora na honde ya Ndjwighona vatunde ku dimuhoko daku ku shuva-shuva ngava kare muhoko waku pongoka wa Karunga vaku hova, ovo ngava ka karo kumwe na Ndjwighona. ⁵ Mu tunwa twavo mwato vimpempa; vavo kwato ghundjoni ntani kwa pongoka. ⁶ Ntani ame anu mono mu Engeli kuna ku tuka mukatji ka maremo na liwiru, ghuye kuna kuya pa ntunda ya livhu nga yuvite Mbudi Ya Ruhafo ku vantu navantje vapa livhu - vaku virongo navintje, na dimuhoko nadintje ntani na maraka naghantje. ⁷ Ghuye kwa ghamba na liywi lya linene ashi, ''Fumadekenu Karunga naku mupandura ntani naku mutanga. Shirugho shendi shaku pangura vantu weno shina tikimo. Tongamenenu naku raperera ku kwendi, ghuye ndje mushiti wa liwiru, na livhu, na lifuta ntani na dimukuro daku pupa mema.'' ⁸ Mu Engeli ghumwe - wa ghuviri - naye akwama ko, ghuye kuna ku ghamba ashi, ''Shitata sha Babiloniya ya yinene, kuna kuwa naku rundumuka pa livhu, shitata sha karo na rushonda rwa djanyi ntani kwa shongaghura vironga vyavi yingi vinwe naku korwa mu vinyu ya nkondo ya rushonda rwendi.'' ⁹ Ame anu mono nka mu Engeli - wa ghutatu - kuna ku kwama ko, ghuye kuna ku ghamba na liywi lyaku dameka ashi, ''Kehe ghuno waku tongamena naku raperera kwa shikashama ntani naku lifano lya shikashama ntani navo vatura shiyivito sha shikashama pashipara shendi naku lighoko lya kalyo, ¹⁰ navo ngava nwa mu vinyu ya ghugara ya lishandu lya Karunga, yino vinyu ya ghugara ya lishandu lya Karunga kwayi dunga tupu naku yiwapayika yikare ngoli na ghugara mbyo vayi tera mu nkinda, shimpe kapi va haghura naku terako mema yi haghuke. Kahe ghuno waku nwa yino vinyu ndje tupu ku kapya mu mundiro wamu mawe waku pira kuveva, kumeho yava Engeli vaku pongoka va Karunga ntani naku meho ya Ndjwighona. ¹¹ Ghuno muti waku tunda mu mundiro waku pira kuveva waku tutumuka ghuyende muwiru ku hepeka ghunene vantu, virugho navintje matiku na mwi kwato ku pwiyumuka - ovino mbyo ngavi kashoroko ku vantu vaku tongamena ku shikashama ntani naku lifano lya shikashama, ntani na vantu ovo karo na shiyivito sha lidina lya shikashama. ¹² Vantu va Karunga vaku limburuka naku tikitamo nkango dendi na veta dendi ntani na vipango vyendi, ntani na vantu ovo vapuro naku huguvara mwa Yesus, kuna hepa ku kara na lipuro na lihuguvaro ntani na lididimiko lyaku tikiliramo.'' ¹³ Ame anu yuvhu liywi kuna ku tunda mu liwiru kuna ku ghamba ashi, ''Tjanga vino ashi: Lirago ghunene waku fera mwa Hompa Karunga ku tunda pa weno.'' Mpepo Ya Karunga ayi ghamba ashi, ''Ghushili, mo ngoli.'' '' Vavo ngava kawana lipyiyumuko ku viruwana vyavo vya vidito, mukonda shi viruwana vyavo vya viwa vya ghuhunga ovyo varuwana pa ntunda ya livhu ngavi vakwama.'' ¹⁴ Ame kwa ka nkuka kuwiru, anu mono liremo lya likenu. Ame anu mono ghumwe kuna shungiri pa liremo waku fana yira Mona Muntu. Ghuye kuna dwata nkata ya nkondo pa mutwe wendi ntani kuna kwata mu lighoko shitjaha shaghutwe shaku tetita mbuto. ¹⁵ Ame anu mono nka mu Engeli ghumwe kuna kurupuka mu ntembeli, kuna ku ghamba na liywi lyaku dameka atantere ogho ashungiro pa liremo ashi: ''Shirugho shina tikimo shaku teta mahangu naku yangura mbuto, weno kwata nawa shitjaha na shitetito shoye. Weno muyangu wa mahangu ghuna wapa, shirugho shina tikimo shaku teta naku yangura naku pongeka mbuto yamu ghudjuni.'' ¹⁶ Makura oghu ashungiro pa liremo atoghona shitjaha na shitetito shendi pa ntunda ya livhu, makura ava tete muyangu naku pongeka mbuto yi tundemo mu ghudjuni. ¹⁷ Mu Engeli ghumwe arupuka nka naye mu ntembeli yamu liwiru; naye kuna kwaterere mu lighoko shitjaha shaku tetita shashitwe. ¹⁸ Mu Engeli ghumwe naye arupuka nka kuna ku tunda mu ntembeli ku shidjambero, ntani ghuye kwa kara na nkondo daku pangera mundiro. Ghuye kwa ghamba na liywi lyaku dameka atantere mu Engeli ogho akaliro na shitjaha sha ghutwe ashi, ''Ghupa shitjaha shoye shaghutwe, yenda mu shipata, teta di mutavi dina kara na mandjembere ghupongeke tundundu twa tuyingi, ntani pongeka dino ndundu da mandjembere ghaku pya yikare ndundu yimwe tupu ya yinene. ¹⁹ Makura mu Engeli atoghona shitjaha shendi shashitwe pa ntunda ya livhu atete naku yangura naku pongeka mandjembere. Karunga kwa tura naku rundika mandjembere mu likwina lyaku dama ghunene makura ava lyata naku runga naku kama mandjembere shikare shiyivito shaku neyeda lishandu lya Karunga na mpanguro yendi ya ghugara ku vantu. ²⁰ Lino likwina lya mandjembere lyaku dama kwa kara pandje ya shitata, paku lyata mandjembere vinyu kupupa yira honde, ntani yino honde ku kara yira mema ghamu mukuro wa litondo; muna ghure wa mukuro kutika ku kilo-metera 300; ntani mughudami wa mukuro rutu rwa nkambe na nturo kupwera mo ku hupako tupu liyuru.