¹ Ame anu yuvhu liywi lya linene kuna kutunda mu Ntembeli kuna ku tantera vano va Engeli vatano-na-vaviri ashi, ''Yendenu mukatere vino visha vyatu dukuru vitano-na-viviri vyaku yura ghugara na lishandu lya Karunga muka vitere naku vipoghomwena pa ntunda ya livhu. ² Makura mu Engeli wa kuhova ayendi aka tera naku poghomwena shisha shendi pa ntunda ya livhu; makura vimburu na vironda vya vidona vyaku kora vya viyingi avi furuka mu marutu gha vantu ovo va wano vakaro na viyivito vya shikashama, ntani nava vaku tongamena naku raperera ku lifano lya shikashama. ³ Mu Engeli wa ghuviri naye ayendi aka tera shisha shendi mu lifuta. Makura mema ghamu lifuta agha kutjindji akare honde, yaku fana yira muntu wa kufa, makura vina monyo navintje vya mulifuta kwa fa. ⁴ Mu Engeli wa ghutatu naye ayendi aka tera shisha shendi mu mema ghamu dimukuro daku pupa namu madiva ntani namu matope gha mema, makura mema agha kutjindji akare honde. ⁵ Makura ame anu yuvhu mu Engeli ogho akaro na nkondo daku pangera mema kuna ku ghamba ashi, ''Hompa Karunga, ove kwa hungama ntani kwa pongoka - ove wa kaliroko ntani ove wa karererapo, ove Mupongoki - ntani kwa kara na nkondo daku pangera navintje. ⁶ Mukonda shi vavo kwa kwata muhonde naku dipaya vantu voye vaku pongoka ntani na va Porofete voye, ove weno mbyo ghuna tapa honde yavo ku kwavo vayinwe; mukonda shi vavene va shano ghudito wa weno mbyo ghunaya papavo.'' ⁷ Makura ame anu yuvhu liywi kuna kutunda ku shidjambero kuna ku ghamba ashi, ''Mundjira, ove Hompa Karunga wa nkondo ntani ove mupangeli wa navintje, ntani ove kupangura mughuhunga namu ghushili ntani ove kwa hungama.'' ⁸ Mu Engeli wa ghune naye ayendi aka atera shisha shendi ku liyuva, makura liyuva ali kara na nkondo daku twera naku shora vantu yira mundiro waku twera. ⁹ Vantu va vayingi kwa pya naku fa ku ghupyu wa shite sha liyuva, ntani vavo kwa garapa naku shwaghura lidina lya Karunga, ogho akaro na nkondo daKu popera naku pangera mahepeko gha weno. Ano ngoli vavo kapi vavhura ku kutjindja vaku shighure ndi vatape mfumwa ku kwendi. ¹⁰ Mu Engeli wa ghutano naye ayendi aka tera shisha shendi pa shipundi sha ghuhompa wa shikashama, mu ghuntungi namu shirongo sha shikashama kwa kara mu mundema. Vantu kwa tameka ku ku shuma maruraka ghavo mukonda ya tjutju naku kora. ¹¹ Vavo kwa twikira ku shwaghura Karunga wamu liwiru mukonda ya tjutju naku kora vironda vyamu marutu ghavo, ntani nka vavo kapi vaku shighura naku tjindja ghukaro wavo wa ghudona va shayeke ku ruwana ghurunde. ¹² Mu Engeli wa ghutano-na-ghumwe naye aka tera shisha shendi mu mukuro wa ghunene, wa Eufurati. Mema ghamu mukuro kwa pwilira mo kwa tunda mo ntani kwa kara ndjira yaku yupuka yaku pita naku yenda vaHompa vaku tunda ku ghupumeyuva. ¹³ Makura ame anu mono mpepo ntatu daku nyata daku fana yira mankoghogho kuna ku tunda mu kanwa ka likongoro, namu kanwa ka shikashama, ntani namu kanwa kamu porofete wa vimpempa. ¹⁴ Dino mpepo daku nyata damu djonaghuli kwa kara nkondo daku ruwana vitetu na viyivito. Dino mpepo kwa rupuka diyende kuva Hompa navantje vamu ghudjuni kumwe naku vatantera vaponge pamwe tupu ngava rwane vita vya vinene vyamu ghudjuni opo nga litikamo liyuva lya linene lya Karunga wa nkondo nadintje. ¹⁵ (''Kenga! Ame kuna kuya yira muntu wa widi! Muntu wa lirago ndjeghu waku vangarara naku ruwana kehe pano, waku kunga vyuma vyendi vikare vina kene ntani kuna kushuka ghuye kapi nga kara muhere-here ntani kapi nga kara na ntjoni.'') ¹⁶ Dino mpepo dadidona ngadi tantera va Hompa vamu ghudjuni ngava ponge pa livhango olyo vatwenyanga mu liraka lya Ruhebeli ashi Amagedoni. ¹⁷ Mu Engeli wa ghutano-na-ghuviri naye kwa tera shisha shendi mu mpepo. Makura ame anu yuvhu liywi lya linene kuna kutunda mu ntembeli yamu liwiru ku shipundi sha ghuhompa, kuna ku ghamba ashi, ''Weno vinapu, vina shaya!'' ¹⁸ Makura aku kara marughadi ghaku vema, naku ndunduma, na livhu lyaku kankama ghunene - olyo lya piro ku karako rumwe kutunda ku lishito lya ghudjuni, lino likankamo lya livhu lya kufa naku rambuka. ¹⁹ Shino shitata sha shinene kwa shiteta shiku gaghunuke shikare pa maruha matatu, ntani Karunga kwa djonaghurapo virongo na vitata navintje vyamu ghudjuni. Ntani Karunga kwa vhuruka vantu vamu shitata shashinene sha Babiloniya ashi kwa yura ghurunde, ghuye kwa tapa nkinda ya vinyu yaghururu yaku yura ya lishandu na ghugara wendi. ²⁰ Virudi navintje kwa dongonokapo, ntani na ndundu dadire nadintje kwa lyalya kana disheta kane kumwe na livhu. ²¹ Makura mvhura ya mawe ghamukumo wa kutika ku kilogramu murongo, kwa roka yitunde ku wiru yiwere pa vantu. Vantu kwa shwaghura Karunga mukonda ya mahepeko gha mvhura ya mawe yayidito oyo ya rokiro.