¹ Hompa Karunga kupangera; renkenu ntunda yalivhu yikushambere; renkenu mayenga ghamafuta nagho ghahafe. ² Maremo namundema ghamukundurukida. Ghupongoki naghumanguruki ndjo litateko lyashipuna shendi. ³ Mundiro kwamupititiranga ntani kudjonaghura vankore kwankehe ruha. ⁴ Ruvadi rwendi kutwedera ghudjuni; vantunda yalivhu kuvikenga nka vavo kukankama. ⁵ Ndundu kuyengumuka yira shera kumeho yaHompa, Karunga wantunda yalivhu. ⁶ Mawiru kungambipara ghumanguruki wendi, ntani dimuhoko nadintje kukenga ghuntungi wendi. ⁷ Kwanavantje ovo vakarerango vintjantjwo ngavashaghuka, nambovo vakukupandayika mwavikarunga vyavintjantjwo--- navo kukunyongamena kwendi, vanakarunga vavo! ⁸ Siyoni yayuvire ntani ghayi hafa, nadoropa davaYuda kwashambilire mukonda yaghupongoki ghoye waghambire, Hompa. ⁹ Ngoli nwe, Hompa, Karunga wakundaghandagha kwanavintje vyantunda yalivhu. Ove wayeruka ghure kuwiru yavakarunga navantje. ¹⁰ Ogho ghahoro Hompa, ghanyenga ghudona! Ghuye kukunga maparu ghavantu vaghushiri-shiri ntani ghuye kuvaghupamo vatunde mulighoko lyavantudona. ¹¹ Ghukenu kwaghukuna muvapongoki ntani ruhafo kwavo vakaro namutjima daghushiri. ¹² Hafenu mwaHompa, anwe vapongoki; ntani mumupe mpandu opo ngamuvhurukanga ghupongoki wendi.