¹ Oh, yimbirenu Hompa rushumo rwarupe; yimbenu kwaKarunga, namuvantje pantunda yalivhu. ² Yimbenu kwaHompa, tungikenu lidina lyendi; tantenu liyoghoro lyendi mayuva kutunda mayuva. ³ Ngambiparenu ghuntungi wendi mudimuhoko dakukushuva-shuva, virughana vyendi vyashitetu mukatji kamuhoko nadintje. ⁴ Ngoli Hompa ghuye munene ndje wakutanganga ghunene. Ghuye ndje wakutjirapo mukatji kavakarunga peke. ⁵ Ngoli vakarunga navantje vadimuhokone vintjwantjo, ano ngoli Hompa ghogho ghashito mawiru. ⁶ Maghuwa nalimoneko lyaliwa. Nkondo naghuwa ngudu mundjugho yendi vakara. ⁷ Karerenu kwaHompa, anwe rudi rwavantu, karerenu matangango kwaHompa mughuntungi naghunankondo. ⁸ Tapenu kwaKarunga ghuntungi walidina lyendi washana. Yitenu ndjambo ntani muye kulivango pongero lyendi. ⁹ Kunyongamenenu kwaHompa mughuwa walipongeko; kankamenu kumeho yendi, anwe vantunda yalivhu nayintje. ¹⁰ Ghambenu mukatji kadimuhoko, ''Hompa pangera.'' Ghudjuni nagho vaghuturapo kare; kwato kughunyunga. Ghuye kupangura vantu muhunga. ¹¹ Renkenu mawiru ghahafe, ntani nantunda yalivhu yishamberere; renkenu lifuta lipupe lyalyo ndyo lya yudango liyiyiko lyaruhafo. ¹² Renkenu mafuva ghashamberere novyo vinakaromo. Makura renkenu navitondo navintje vyamumutitu viyiyire kuruhafo ¹³ kumeho yaHompa, ngoli ghuye kunakuya. Ghuye ngaya ngapangure ntunda yalivhu. Ghuye ngaya ngapangura ghudjuni naghupongoki ntani navantu mughushiri-shiri.