1 Hompa, Karunga ogho ghavyutango rughoko, Karunga wakuvyuta rughoko, twedera natuvantje. 2 Shapuka, pangura ntundayalivhu, tapa kuvanene mbyovyo vashama 3 Shirugho shakutika kuni vantudona, Hompa, shirugho shakutika kuni vantudona ngavakushamberera? 4 Vavo kurupwita nkango davo daghugara; navantje ovo varughanango ghudona kukukanganga. 5 Vavo vadjonaghulire vantu voye, Hompa Karunga; vavo vahepekire dimuhoko odo dahameno koye. 6 Vavo kwadipaghire vafitavya navantunda virongo ovo vayatungiro mushirongo shavo, ntani vayadipayire vapirivasha. 7 Vavo vaghambire, ''Hompa Karunga kapi ngakenga, Karunga wavaYakobu kapi ngavi dimburura.'' 8 Kwatenu lighano, anwe vantu vaghuvaya! Anwe magova, ruvede munke ngamukurongerapo? 9 Ghuye ogho ghashito litwi, kapi kapighuye ghayuvanga ndi? Ghuye gho ghatendo lintjo, kapi ghakenganga ndi? 10 Ghuye kutapa matengeko kwadimuhoko, kapi ghuye ghawapukururanga ndi? Ghuye ndje ghatapango ghuyivi kwamurwana. 11 Karunga ghayiva maghayadaro ghamuntu, ashi vavo vanwi honde. 12 Ogho vatungika muntu ghogho varawiranga, Karunga, ndje wavhuranga kushonga vyakuhamena kuveta yoye. 13 Ove kumupa lipwiyumuko mumaruvede ghamaghudito dogoro likwina vanalitimi lyavarughanidona. 14 Ngoli Karunga kapi ngashuvilira vantu vendi ndipo ghavakengerere mughupingwa ghavo. 15 Ngoli nka lipanguro ngalikara lyaghupongoki; ntani vahungami dimutjima navantje ngava kwama. 16 Ghare ngashapuko ghampopereme ghunkore kuvarughanidona? Ghare ngashapuko ghunkore name anwe varughanidona? 17 Nkwandi Hompa ghakalire mbatero yande, Ame ntantani nganirare mulivango lyashipore-pore. 18 Opo naghambireme, ''Lighuru lyande nakusheneta,'' likukwatakano lyoye lyamughushiri- shiri, Hompa, kwankwatilire ame nayimana. 19 Nangeshi kunashipakere mbili mukatji kande vangi, mashengawido ghoye ame kumvhatera. 20 Ndi walye shipundi shaghudjonaghuli ngashikara ghundambo nanwe, ghumwe ogho ghaneghediro mango yalifano? 21 Vavo kukuyonga kumwe vaghupepo liparu lyavapongoki ntani kurwanita vanongo dogoro kumfa. 22 Ano gnoli Karunga ghakara ngundi yande yayire, nka waro Hompa Karunga wande ghakalire liwe lyande lyaghuvando. 23 Ghuye ngayitira ndjo danaghumwavo ntani ngadiva dipagha naghumwavo muvirughanadona vyanaghumwavo. Hompa Karunga ngava tunditako.