Marushumo ghaAsafi. ¹ Yuva marongo ghande, vantu vande teghererenu kunkango damukanwa kande. ² Ame ngani yashameka kanwa kande muvishwewe; Ame ngani yimba vininke ovyo vyahoramo vyakare. ³ Vino mbyo vininke ovyo twayuva nakukuronga, vininke ovyo vaturongire vakurona vetu. ⁴ Kapi ngatuvipungura kuvakaruvharo rwavo. Atwe ngatu tantera ruvharo rwakukwamako vyakuhamena kutangango lyalinene lyavirughana vyaHompa, nkondo dendi, navitetu ovyo ghuye gharughana. ⁵ Ngoli ghuye ghatulirepo likukwatakano lyavighamba muYakobu kumwe nakutura veta muIsraeli. Ghuye gharawili vakurona vendi ashi ndi ngavavishonge kuvana vavo. ⁶ Ghuye gharawili vino mposhi ruvharo rwakukwamako ngaruyive vighamba vyendi, kwavana ovo vadira kuyita shimpe, ghare wakuvhura kuvatantera vantunde kuvana vavo vanaghumwavo. ⁷ Makura vavo ghavatura lihuguvaro lyavo mwaKarunga kumwe nakudira kuvhurama virughana vyendi kumwe nakupungura dimuragho dendi. ⁸ Mposhi kapishi ngava kare yira vakurona vavo, ovo vakaliro ghushuntu naghukorokoshi, ruvharo rwakaliroshi dimutjima davo kapi dahungamine, waronka mpepo davo kapi dakutuliremo nakukarera ghushiri kwaKarunga. ⁹ VaEfiramiteshi kwakuwapayikire namaghuta, ano ngoli vavo vavyukire kumaruvede ghavo ghavirwanangana. ¹⁰ Vavo kapi vavhulire kukwama likukwatakano lyavo naKarunga, nkavavo vashwenine kukwama veta yendi. ¹¹ Vavhuramine virughana vyendi, vininke vyaviwa ovyo ghuye ghavaneghedire. ¹² Vavo vavhuramine vininke vyavitetu ghuye ghavarughanine mumantjo ghavakurona vavo mushirongo shavaEgipute, mulivango lyaZayani. ¹³ Ghuye ghahangura lifuta nakuvapitititra varute; ghuye ghamangire mema ghayimane yira makuma. ¹⁴ Paruvede rwamwi ghuye kwavapititire naliremo ngoli matiku ghavapititire nashite shamundiro. ¹⁵ Ghuye ghahanaghura mawe mumburundu, ghuye ghavapa mema ghamangi, ghakuyuda ghunena walifuta. ¹⁶ Ghuye gharenke mema ghapite ghatunde muliwe ngoli ghaghapupu yira mukuro. ¹⁷ Ano ngoli vavo shimpe ghavatwikiri kudjona naKarunga, kurwanita ghunkore nogho wakundagha-ndagha mumburundu. ¹⁸ Vavo kwamushetekire Karunga mudimutjima davo mukupura kundya mposhi vakutite mapumba ghavo. ¹⁹ Vavo vaghambire vyankore naKarunga; Vavo vaghambire, ''Karunga kuvhura ghatuyarere ndishe mumburundu ndi? ²⁰ Kenga, opo ghuye taghulire liwe, mema ghaghapoposha ghatundeme ngoli vidiva ghaviyura-yura. Ano ngoli ghuye ghatapa mboroto nka? Ngoli ghuye ngatapa nyama kuvantu vendi?'' ²¹ Opo Karunga ghayuvire vino, ghuye ghagarapa; ano ngoli mundiro wendi ghaghushoro ghunkore wavaYakobu, ano ngoli ghugara wendi ghaghurwanita vaIsraeli, ²² mukonda vavo kapi vapulire mwaKarunga waronka kapi vahugualire muliyoghoko lyendi. ²³ Ngoli ghuye gharawili maremo ghakuwiru ghagharuke mavero ghakuwiru. ²⁴ Ghure kwarokitire manna valye, waronka ghavapa mbuto dakutundilira muliwiru. ²⁵ Vantu valire mboroto davaengeli. Ghuye kwavatuminine ndya mughungi wado. ²⁶ Ghuye kwayungitire likundungu lyaghupumeyuva kumaremo, ngoli munkondo dendi ghuye kwapititire likundungu lyaghutokero. ²⁷ Ghuye kwavarokitire nyama yira mbundu, vidira mughungi wavyo yira musheke wamulifuta. ²⁸ Vyavo kwawelilire mukatji ntanta davo, vikukundurukide ntanta davo. ²⁹ Ngoli vavo valire nakukuta. Ghuye kwavapire ovyo vashanine kulya. ³⁰ Ano ngoli vavo kapi valire ovyo vashanine kulya. ³¹ Makura Karunga ghagarapa nakuvahomona ghadipagha ovo vakaliromo vankondo mukatji kavo. Ghuye ghaghupumo vakafumu vavanuke vamuIsaraeli. ³² Nampiri vyashorokire vinya, vavo vatwikilire kudjona nakudira kupura virughana vyendi vyaviwa. ³³ Ano ngoli Karunga ghafufupita mayuva ghavo; mwaka davo davhukire viponga. ³⁴ Nkehe pano Karunga kavarughananga vyavidona, vavo kuvhareka kumushana, kuvhareka kuvhuka kwendi kumwe nakukara pepi naye. ³⁵ Vavo kuvhurukashi Karunga shiri liwelyavo nakuyivashi Karunga wakundagha-ndagha ghakalire mupopeli wavo. ³⁶ Ano ngoli vavo kumushopa natunwa twavo kumwe nakumukonga nankango davo. ³⁷ Ngoli vavo dimutjima dakalire tupu pamwe kwendi, vavo kapi vakalire naghushiri-shiri mulikukwatakano lyendi. ³⁸ Ngoli ghuye, ghaferenkenda, ghavaghupiripo vidjona vyavo ngoli kapi ghavadjonaghulire. Vyaghushiri, rwarungi ghuye ghakuvyutire ghugara wendi nka kapi ghaghurupwitire naghuntjeya. ³⁹ Ghuye kwavavurukitire ashi vavo kwavashita munyama, vavo lira likundungu lyakupita lyakukadira kavyuka. ⁴⁰ Kurungapi vakara ghunkore naye mumburundu nakumuguvita mushirongo shamuporongwa! ⁴¹ Shimpe nka waro vavo ghavamusharura Karunga kumwene nakutinda vapongoki vamuIsraeli. ⁴² Vavo kapi vaghayalire nkondo dendi, omo ghavapopelire kuvanankore vavo ⁴³ opo ghaneyedire vitetu vyendi muEgipute naghuwawendi mumukunda waZoyana. ⁴⁴ Ghuye kwatjindjire dimukuro davaEgipute kuhonde mposhi kapishi vanyemo mudimukuro davo. ⁴⁵ Ghuye kwavatuminine magculi ghavalye namankovovo ghadukaghane mulivhu lyavo. ⁴⁶ Ghuye vimenwa vyavo kwavitapire kumambonde nampadi-mpadi. ⁴⁷ Ghuye kwadjonaghulire vikunino vyavo namvhura yamawe navitondo vyavo kwadjonaghukire kumvhura yayinene yamawe. ⁴⁸ Ghuye kwarokitire mvhura yamawe kungombe davo namaruvadi ghakucukaghuka ghadipayiro vimuna vyavo. ⁴⁹ Ghugara wendi waghunene ghaghuvatetaghurapo. Ghuye kwatumine ghugara, nyanya, nashiponga yira mutumi wakuyita maghudito. ⁵⁰ Ghuye kwaneghedire ndjira yendi yaghugara; ghuye kapi ghavahupitire vadire kufa ano ngoli kwavapire vamone vitetu. ⁵¹ Ghuye kwadipayire vambeli navantje vamuEgipute, vambeli vavo ovo vahuguvalire vankondo muntanda yaHamu. ⁵² Ghuye kwapititire vantu vanaghumwendi yira vindjwi kumwe nakuvapititira vayende mumburundu yira ghutanga wandjwi. ⁵³ Ghuye kwavapititire mumpora nka kwato ghutjirwe, ano ngoli mafuta gharovitire vanankore vavo. ⁵⁴ Makura ghuye ghavayita kuliyenga lyapepi nashirongo shakupongoka, kuno nko kundundu ghawawanine ghuturo walighoko lyendi lyarulyo. ⁵⁵ Ghuye ghashingimo vatungi vadimuhoko peke kumeho ghavapire shikare ghupingwa wavo. Ghuye ghavapa rudi rwava Israeli vatungemomo muntanda davo. ⁵⁶ Ano ngoli vavo shimpe ghavamusheteke nakumushadaghura Karunga wakundagha-ndagha kapi wakwamine marawiro ghendi. ⁵⁷ Vavo kapi rughanine vyaghushiri-shiri nka virughana vyavo vyakufanine yira vyavashavo; Vavo vakalire kwato ghukorero yira ghuta wankandja wakuvipa. ⁵⁸ Ngoli vavo vamurenkirenkitire ghagarape namavango ghavo ghakuwiru waronka vamusharaghulire ghakare namfudu yaghugara navintjantjwo vyavo. ⁵⁹ Opo ghaviyuvire Karunga vino, ghuye ghagarapa mpopo ghuye ghashwenene vyaIsraeli. ⁶⁰ Ghuye ghatundumo mughupongero waShilohi, muntanda ghoyo ghatungire mukatji kavantu. ⁶¹ Ghuye mpoghapulidire nkondo dendi vadikwate kumwe nakupa ghuntungi wendi mulighoko lyavanankore. ⁶² Ghuye ghatapa vantu vendi kumarufuro, ghuye kwagarapire navapingwa vendi. ⁶³ Mundiro ghaghuvareke kumyona vakafumu vavo vavanuke, ntani navakamali vavanuke kwatonka marushumo ghalikwareko ghakaliropo. ⁶⁴ Vakareli vavo kwafira fire kumarufuro, ngoli vafitavya kapi vavhulire kulira. ⁶⁵ Makura Karunga gharambuka yira wapaturo, yira murwi wavita wakuyiyira mukonda yavinyu. ⁶⁶ Ghuye ghavyuta vanankore vendi; ghuye vavatura vashwaghuke nanaruntje. ⁶⁷ Ghuye ghashwena ntanda yaYosefu, kapi ghahorolire rudi rwavaEfiramu. ⁶⁸ Ghuye mpoghashorolire rudi rwavaYuda nandundu yaSiyoni oyo ghahora. ⁶⁹ Ghadikipo ndjugho yendi yaghupongero yira mawiru, yira ntundayalivhu ovo ghatulirepo nanaruntje. ⁷⁰ Ghuye ghashororora Daviti, mukareli wendi, kwamushimbire ghuye mutakamiti vindjwi. ⁷¹ Ghuye kwamushimbire kukukwamakwama vindjwi kadi navana vyavo, ngoli ghuye ghamuyita ghakare mukungi waYakobu, vantu vendi, vaIsraeli, vapingwa vendi. ⁷² Daviti ghatakamitire ghukonentu wamutjima wendi, kumwe nakuvapititira naghuyivi wamaghoko ghendi.