Kuvapititili wangovera; kutunda pavishorokwa vaYeduthuni. Lipisaromu lyaAsafi. ¹ Ame nganiyiyira naliywi kwaKarunga; Ame nganiyita naliywi lyande kwaKarunga, ngoli Karunga wande ngandjuvame. ^{2 3} Muruvede rwamaghudito ghande ame nashanine Karunga; pamatiku ame kwahonyonine maghoko ghande, ngoli kapi ghavhulire kuroroka. Monyo wande washwenine kughushengawida. Ame naghayalire Karunga mukulira mundapero; Ame naghayalire Karunga opo nakalire nkondo kwato. ⁴ Ove wakwatire mantjo ghande ghapaghuke; Ame nakalire naghudito waghunene mukughamba. ⁵ Ame kwaghayalire mayuva ghakare, mayuva ghamare ghakare. ⁶ Pamatiku ame navhurukire rushumo ghoro navhulire kuyimba pashirugho shimwe. Ame ghanikughayarako nawa-nawa kumwe nakushetekerako kukwata lighano ovyo vyavhuro kushoroka. ⁷ Walye Hompa ngantwename nanaruntje? Kapi nka negheda ghufenkenda kwande? ⁸ Ndi walye likukwatakano lyendi lyaghushiri-shiri lyapita makura? Ndi walye lihuguvalito lyendi vipa nanaruntje? ⁹ Ndi walye Karunga ghavhurama kukara mufenkenda? Ndi walye ghugara wendi wadimita shihoro shendi? ¹⁰ Ame naghambire, ''Gholino ndyo liguvo lyande: litjindjo lyalighoko lyarulyo kwagho wetu wakundagha-ndagha.'' ¹¹ Ano ngoli ame nganivhuruka virughana vyoye, Hompa Karunga; Ame ngani vhurukanga virughana vyoye vyaviwa vyakare. ¹² Ame ngani vivhuruka virughana vyoye kumwe nakukuteda. ¹³ Ndjira yoye, Karunga, yapongoka; karunga munke wakushetekera kwaKarunga Wetu? ¹⁴ Ove Karunga warughanango vitetu; ove watunegheda nkondo ghoye mukatji kavantu. ¹⁵ Ove watapa kuvantu voye lifundo nankondo doye dadinene --- vakare varuvharo rwaYakobu ndi rwaYosefu. ¹⁶ Nampindi mema ghakukengire, Hompa; mema ghakukengire, ano ngoli ghagho nagho ghakalire ghoma; matondo ghakushenyine. ¹⁷ Maremo ghatelire mema; maremo ghakumawiru ghaghatapa liywi; ngumba doye ghadiviraghuka. ¹⁸ Liywi lyoye lyamaruvadi-vadi kwaliyuvire mumpepo yalikundungu; lyalyo kwatwedilire muwiru mughudjuni; livhu ghalikankama nakushenya. ¹⁹ Ndjira yoye ghayipitiri mulifuta ntani ndjira yimwe ghayipitiri mumema ghukupupa, ngoli mpadi doye kwato kudivarera. ²⁰ Ove wapititire vantu voye yira ghutanga wandjwi mulighoko lyaMosesi naAroni.