Lipisaromu lyaAsafi. ¹ Karunga, vantunda virongo vayamu pingwavoye; vavo vayadjonaghulire ntembeli yoye yakupongoka; vavo vayatjindjire Yerusalema likare livango lyaghudjonaghuki. ² Vavo marutu ghavimpu vyavakareli voye ashi ndya kuvidira vyakutuka muwiru, marutu ghavantu vakukarerango mughushiri-shiri kutapa kumangwandjwa ghapantunda yalivhu. ³ Vavo kwapita honde yira mema ghakundurukido Yerusalema, ngoli kwato wakuvavhumbika. ⁴ Atwe tunakara vidaneno kuvanankore, kututinda nakutushwaghura ovo vatukundurukido. ⁵ Ruvede munke ngavighupa, Hompa? Ngoli ngaghukara naghugara nanaruntje ndi? Shirugho shakutika kuni mfudu yaghugara ghoye ngayi shora yira mundiro? ⁶ Terangoli ghugara ghoye kwadimuhoko ghodo dakudiro kukuyiva ntani ghuntungi ghogho wadirango kukarera lidina lyoye. ⁷ Vavo vamyona vaYakobu nakudjonaghura dimukunda dendi. ⁸ Washa tufutita ndjo davakurona vetu dikare ghunkore natwe; ngoli virughana vyaghufenkenda vitumonekere, ano atwe twakudidipita. ⁹ Tuvatere, Hompa Karunga waliyoghoro lyetu, mulidina lyaghuntungi walidina lyoye; tupopere nakutughupirapo maghundjoni mulidina lyoye. ¹⁰ Nkevyo dighambera dimuhoko, ''Kuninko Karunga wavo?'' Ngoli renka honde yavakareli voye oyo yatekiro yivyute rughoko dimuhoko kumeho yoye. ¹¹ Ano ngoli ndi shiliro shandapero shavanadorongo shikare kumeho yoye; naghunene nkondo doye pungura vanuke vakufa vakare vayumi. ¹² Vyavyutire marukushi hambombiri kwavi virongo vyamaparambo kutwara mwavyo vakushwaghura,Hompa. ¹³ Ngoli atwe vantu voye namalyero ghavindjwi vyoye ngatu tapa mpandu nanaruntje. Atwe ngatu kutangaghuka kuruvharo roye naruntjeya.